Ձեր վստահելի աղբյուրը

«Այս պատերազմը Նիկոլ Փաշինյանի ապաշնորհ կառավարման հետևանք էր»,- հայտարարեց ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանը «5-րդ ալիք»-ի «Հարցազրույցի» եթերում։

Նրա խոսքով, ապաշնորհ կառավարումն արդեն դավաճանություն է, եթե մարդը չի կարողանում կառավարել, հասկանում է՝ ի վիճակի չէ երկիրը ղեկավարել բարդ իրադրության պայմաններում, ապա պարտավոր է կանգնել հանրության առաջ ու ասել՝ ժողովուրդ կներեք, չի ստացվում, ես գնամ, թող խելոք մարդիկ գան ու մեզ էս պրոբլեմից հանեն։

Վանեցյանը հիշեցրեց՝  ավելի վաղ արած իր ահազանգերն ու բարձրաձայնած մտահոգությունները. «Նիկոլ Փաշինյանի կողմից տարվող ապաշնշոհ ու ապիկար արտաքին քաղաքականության արդյունքում մենք ունենալու ենք պատերազմ։ Արդյոք մեզ պատերազմ պետք է, թե ոչ»։

Նա այսօր էլ համոզված է՝ ԼՂ հակամարտության խնդիրը կարելի էր լուծել դիվանագիտական խողովակներով, բանակցային գործընթացի շրջանակում։

«Մինչդեռ Նիկոլ Փաշինյանն իր յուրաքանչյուր քայլով տանում էր մեզ պատերազմի»,- ասաց նա։

ԱԱԾ նախկին տնօրեն Ա. Վանեցյանը հիշեցրեց՝ հրապարակային կերպով հարց էր ուղղել Փաշինյանին, թե ինչի շուրջ է բանակցում Արցախի հարցով, իսկ Փաշինյանը «ցինիկ» պատասխան էր հնչեցրել «Ինչի շուրջ ուզում եմ, նրա շուրջ բանակցում եմ»։

«Տեսանք, ինչի շուրջ էր բանակցում։ Եթե իր տրամաբանությամբ մոտենանք հարցին, ապա նա բանակցում էր Արցախի 100 տոկոսանոց կապիտուլյացիայի շուրջ»,- հայտարարեց Վանեցյանը։