Այս հրադադարը չափազանց անհրաժեշտ էր, բայց այն խաղաղության պայմանագիր չէ. վերլուծաբան Թոմ դե Վալ
Միջազգային հանրությունը մեծ հաշվով համակարծիք է՝ ԼՂ հակամարտության շուրջ վերջին հրադադարը ուղղված է պատերազմի դադարեցմանը, սակայն դա վերջնական կարգավորման համաձայնություն չէ, որի համար անհրաժեշտ է բանակցային գործընթաց: ԵՄ-ն ևս կիսում է այս մոտեցումը:
Ռազմական գործողությունների դադարեցումն ընդամենն առաջին քայլն է Լեռնային Ղարաբաղի երկարատև հակամարտության կարգավորման ուղղությամբ, ասված է ԵՄ հայտարարության մեջ։ ԵՄ-ը գտնում է, որ անհրաժեշտ է ջանքեր գործադրել հակամարտության համապարփակ և կայուն կարգավորման համար, որը կներառի նաև Լեռնային Ղարաբաղի կարգավիճակի հարցը: Իր հայտարարության մեջ Բրյուսելը վերահաստատել է իր լիակատար աջակցությունը ԵԱՀԿ Մինսկի խմբի ձևաչափին համանախագահների գլխավորությամբ: Այս մոտեցումը կիսում են Վաշինգտոնում ու Փարիզում: Այս մասին գրում է Ամերիկայի Ձայնը։
Քարնեգի հիմնադրամի վերլուծաբան Թոմ դե Վալն իր վերջին հրապարակման մեջ կարծիք է հայտնում, որ Արևելյան գործընկերության երկու երկրների՝ ՀՀ և Ադրբեջանի միջև զինված հակամարտությունը մարտահրավեր է ԵՄ՝ Հարավային Կովկասում ռազմավարական դեր ստանձնելու ձգտումներին, գրում է դե Վալը՝ ընդգծելով, որ ԵՄ-ը պարզապես չունի ինստիտուցիոնալ գործիքներ այս ճգնաժամը հաղթահարելու համար: Այս օրերին ԼՂ հարցում արևմտյան տերությունները հայտնվել են խաղից դուրս վիճակում, և այժմ պետք է ջանքեր գործադրեն դիրքերը վերականգնելու համար, ընդգծում է նա:
«Այս հրադադարը չափազանց անհրաժեշտ էր, սակայն սա խաղաղության պայմանագիր չէ»,- գրում է դե Վալը, ով չի բացառում, որ ՌԴ առաջնորդ Պուտինը կարող է քայլեր ձեռնարկել վերջնական կարգավորման ուղղությամբ, որը կբարելավվեր կողմերի միջև հարաբերությունները: Նա, սակայն, ավելի հակված է, որ ՌԴ-ի գերխնդիրն է Հարավային Կովկասում իր ազդեցության ուժեղացումն ու առևտրային ուղիների վերահսկումը երկարաժամկետ խաղաղության փոխարեն, ուստի ռազմական գործողությունների վերսկսման վտանգի պահպանումը կնապստի ԼՂ-ում ռուսական խաղաղապահ ուժերի պահպանմանը, նշում է նա:
Հիշեցնենք, որ ՌԴ-ը՝ որպես ԵԱՀԿ Մինսկի խմբի համանախագահ և հրադադարի հիմնական բանակցող, առարկություն չի հայտնել բանակցույունների վերսկսման ուղղությամբ: Մոսկվայում, սակայն, ընդգծում են՝ այսօր Լեռնային Ղարաբաղում առաջնային խնդիրն է խաղաղ կյանքի վերականգնումը: Ռուսական հեռուստաընկերությանը տված իր հարցազրույցում ՌԴ նախագահ Վլադիմիր Պուտինն ընդգծել է, որ այսօր կողմերը համաձայնվել են պահպանել առկա ստատուս քվոն, իսկ հետագա խնդիրները պետք է կարգավորվեն ապագայում կամ ապագա ղեկավարների ու գործընթացի մասնակիցների կողմից: Նա նաև չի բացառել, որ ԼՂ կարգավիճակի խնդիրը կարող է կարգավորվել բնականոն կյանքի պայմանների, Հայաստանի և Ադրբեջանի միջև հարաբերությունների և հակամարտության գոտում խաղաղ գոյակցության վերականգնումից հետո:
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
