Ձեր վստահելի աղբյուրը

«Արթուր Դանիելյանին, Նարեկ Մալյանին, Միհրան Հակոբյանին, Ռոբերտ Մելքոնյանին քիչ առաջ ձերբակալեցին։ Կասկածանքը՝ Քրեական օրենսգքրի 225.1 հոդված»,- ասաց փաստաբան Տիգրան Աթանեսյանը։

Նա նշեց, որ շինծու կասկածանք է, որով չէր կարելի ձերբակալել Արթուր Դանիելյանին, Միհրան Հակոբյանին, քանի որ մինչև 8 տարեկան երեխա ունեցողին ձերբակալելն անթույլատրելի է այս հոդվածքով։

«Սա պարզապես խայտառակություն է։ Սա անուն չունի, օրենք գոյություն չունի, նույնիսկ ապացույց չեն կեղծում, մի սուտ վկա չեն գտնում։ Պարզապես մարդ լինի, հոդված կգտնենք սկզբունքն է գործում։ Իրավական մսաղաց է, որ սրիկա, տականք, ազգադավ կուռքը տարածել է մեր երկրում։ Հիշում եք չէ՝ երջանիկ Հայաստանում ենք ապրում, որտեղ նաև իրավունքը զրոյացվել է»,- ասաց պաշտպանը։

Տ.Աթանեսյանն ասաց, որ ձերբակալումը կբողոքարկվի, կսպասեն դատական համակարգի արձագանքին։

Հիշեցնենք, որ Քրեական օրենսգրքի  225.1 հոդվածը սահմանում է.

«Օրենքով սահմանված կարգի խախտմամբ հավաք կազմակերպելը և անցկացնելը↩
1. Օրենքով սահմանված կարգի խախտմամբ հավաքը դիտավորությամբ կազմակերպելը և անցկացնելը`
պատժվում են տուգանքով` նվազագույն աշխատավարձի երկուհարյուրապատիկից երեքհարյուրապատիկի չափով, կամ կալանքով` առավելագույնը երկու ամիս ժամկետով:
2. Հավաքը դադարեցնելու վերաբերյալ ոստիկանության ներկայացուցչի օրինական որոշմանը չենթարկվելուն ուղղված կոչերը`
պատժվում են տուգանքով` նվազագույն աշխատավարձի երեքհարյուրապատիկից հինգհարյուրապատիկի չափով, կամ կալանքով` մինչև երեք ամիս ժամկետով»։