Ձեր վստահելի աղբյուրը

Երևանի ընդհանուր իրավասության դատարանի Շենգավիթ նստավայրում ավարտվել է ԱԺ աշխատակազմի նախկին ղեկավար Արա Սաղաթելյանի ձերբակալության իրավաչափության բողոքարկան քննարկումը։ Որոշումը կհրապարակվի այսօր մինչև 20։00-ն։  Այս մասին Panorama.am-ի հետ զրույցում ասաց Արա Սաղաթելյանի փաստաբան Հակոբ Ենոքյանը։

Նա կարծում է, որ ձերբակալումը կճանաչվի ոչ իրավաչափ։

«Հիմքում դրված փաստաթղթերում ահագին հակասություններ կային։ Պարզվում է՝ պարոն Սաղաթելյանը բերման է ենթարկվել 15։00-ին, այլ փաստաթղթով զեկուցագիր կա, որ 15։10-ին ինչ-որ հավաքի կազմակերպման, փողոց փակելու հետ կապված գործողություն է  անում։ Օբյեկտիվորեն հնարավորություն չուներ այդ ժամին  ինչ-որ բան կազմակերպեր։ Փաստաթուղթ կազմող անձի հենց մատնանշմամբ է, որ նա ձերբակալվել  է, մատնանշել է իրեն որպես հանցանք կատարողի, հակասական տվյալներ է  տվել նախաքննությանը։

Կարծում եմ, որ ոչ հավաստի կգնահատվի այդ ամեն ինչը, առնչակցությունը չի հիմնավորվի»,- ասաց Հակոբ Ենոքյանը։

Հիշեցնենք, որ  Արա Սաղաթելյանին երեկ ոստիկանության աշխատակիցները բերման ենթարկեցին Բաղրամյան պողոտայից Նիկոլ Փաշինյանի հրաժարականի պահանջով անհնազանդության ակցիայի ընթացքում։ Նրան ձերբակալել են քրեական օրենսգրքի 225.1 հոդվածի 1-ին մասի հատկանիշներով արարք կատարելու կասկածանքով։

Քրեական օրենսգրքի 225.1 հոդվածը վերաբերում է  Օրենքով սահմանված կարգի խախտմամբ հավաք կազմակերպելուն և անցկացնելուն.  «Օրենքով սահմանված կարգի խախտմամբ հավաքը դիտավորությամբ կազմակերպելը և անցկացնելը պատժվում են տուգանքով՝ նվազագույն աշխատավարձի երկուհարյուրապատիկից երեքհարյուրապատիկի չափով, կամ կալանքով՝ առավելագույնը երկու ամիս ժամկետով»։