Ձեր վստահելի աղբյուրը

«Հույս ունեմ, որ Ռուսաստանի  հետ Հայաստանի իշխանությունները գոնե այս ժամանակահատվածում, երբ դեռևս ստիպված նրանք հանդիսանում են իշխանություն, կկարողանան որոշակի հայանպաստ պայմաններ ապահովել բանակցային գործընթացում»,- Ազատության հրապարակում Նիկոլ Փաշինյանի հրաժարականի պահանջով հանրահավաքից հետո լրագրողների հետ զրույցում ասաց «Հայրենիք» կուսակցության նախագահ, ԱԱԾ նախկին տնօրեն Արթուր Վանեցյանը։

Հարցին՝ Ռուսաստանի կողմից աջակցություն նկատո՞ւմ եք Նիկոլ Փաշինյանի իշխանությանը, նա պատասխանեց. «Ես չեմ ուզում նկատել ոչ Ռուասաստանի, ոչ այլ երկրների կողմից աջակցություն Հայաստանի իշխանություններին։ Մենք պետք է ինքնիշխան երկիր լինենք, այս հարցին չեմ կարող հստակ  պատասխան տալ»։

Անդրադառնալով այսօր հանրահավաքի ընթացքում արված բացահայտմանը Իջևանի դեպքերի հետ կապված և հարցին՝ հնարավո՞ր է կառավարության կողմից այն հերքվի, Ա. Վանեցյանն ասաց.
«Չեն կարող  ժխտել իմ ասածները։ Ես շատ ավելի մանրուքներ էլ կարող եմ պատմել այդ դեպքի հետ կապված»։

Նա պատմեց, որ այդ ժամանակ աշխատանքային այցով Արցախում էր, իրեն փոխարինում էր իր տեղակալ Էդուարդ Մարտիրոսյանը. «Ասում է՝ վարչապետը հանձնարարել է Իջևան տանենք Ա վարչության, որը ժողովրդի մեջ հայտնի է «Ալֆա» ջոկատայիններ, որ մարդկանց ծեծեն։ Ասացի՝ հանկարծ նման բան չանեք, այդ վարչությունը նախատեսված է  հակաահաբեկչական գործողություններ իրականացնելու համար։ Նիկոլ Փաշինյանը զանգում էր ինձ ու ասում՝ ջարդեք, սատկացրեք, սպանեք, արյան գետեր եմ ուզում տեսնել։ Պատասխանում էին, որ չի կարելի։

Մեկնեցի այնտեղ։ Իմ ու այդ ժամանակվա ոստիկանապետ Վալերի Օսիպյանի աշխատանքի արդյունքում է, որ չտրվեցինք այդ ապօրինի հրամանների կատարմանը, կարողացանք առանց արյան գետերի կանխել այդ ապօրինի գործողությունը, որ իրականացնում էին Իջևանի, հարակից բնակավայրերի բնակիչները։

Ապացույցներ... իմ խոսքն ապացույց է, կարծում եմ պարոն Օսիպյանի խոսքն էլ ապացույց կլինի»,- մանրամասնեց նա։

Նա  մեկ այլ բացահայտում էլ արեց. «Երբ որ Երևանի ավագանու ընտրությունների ժամանակ հնչեց սև ու սպիտակ եզրույթը, որպես ԱԱԾ տնօրեն,  դրա մեջ ռիսկեր գնահատելով, որ ի վերջո բերելու է  հասարակության պառակտմանը, ասացի՝ այդ եզրույթը վտանգավոր է, անմիջապես պետք է վերջը դրվի, փակվի այդ թեման։

Վարչապետի  պաշտոնը զբաղեցնող անձն ինձ ասաց՝ «քաղաքականությունից չես հասկանում, պետք է կիսել սևերի ու սպիտակների, սպիտակները հաղթողներն են ու լավերը, այսինքն մենք, սևերը՝  պարտվողներն ու վատերը, այսինքն նախկինները։ Քանի դեռ կան սևեր ու սպիտակներ, ուրիշ ոչ մեկ չկա, մարդիկ պետք է ընտրություն կատարեն՝ կամ լավի ու հաղթողի հետ են,  կամ վատի ու պարտվողի»։

Ինքը արհեստական բաժանելով հասարակությանը սև ու սպիտակի, քանդեց քաղաքական կուսակցությունների քաղաքական օրակարգերն ու բերեց օրակարգ սև, սպիտակ, ատելություն, մարդն այլ ընտրություն չուներ, կամ սև կամ սպիտակ պետք է լիներ։ Եթե մարդ մերժում էր այդ գույները, ասում էին՝ դավաճան է։

Դա է ամենամեծ խնդիրը՝ մանիպուլյացիա։ Այս մարդիկ ուրիշ որևէ բան չեն կարողանում անել բացի սևեր, սպիտակներ, նախիններ, դավաճաններ, ներկաներ բաժանելուց։  Ամենամեծ դավաճանն իրենք են։ Ով ինչ արած լինի, Արցախի 70 տոկոսը հանձնած մարդուց մեծ դավաճան այլևս երբեք չի լինելու։ Նիկոլի անունը հայոց լեզվի  բացատրական բառարանների մեջ դավաճանի հոմանիշն է լինելու։ 

Ժողովուրդ, հասկացեք, երկիր ենք կորցնում, երկիր ենք կորցրել։ Մեղրիի տարածքով ճանապարհ ենք տվել ադրբեջանցիներին, որ գնան, կպեն Նախիջևանին։ Ադրբեջանն ու Թուրքիան այդքանով չի բավարվելու»։

Հարցին՝ արդյո՞ք հիմա էլ Նիկոլ Փաշինյանը կտա ապօրինի հրահանգներ, Ա. Վանեցյանն ասաց. «Երեկվա դեպքերը, որ եղան Հանրապետության հրապարակում, դրա վառ ապացույցն է։ Դրոշը ծածանելու համար երիտասարդ աղջիկների, տղաների ծեծելով, ջարդ ու փշուր անելով՝ բերման ենթարկեցին։ 85 մարդ է երեկ բերման ենթարկվել։ Նիկոլ Փաշինյանը ի տարբերություն մեզ, շատ լավ գիտի հանրահավաքներ կազմակերպելու, հետևաբար դրանք խանգարելու տեխնոլոգիաները։  Հենց առաջին վայրկյանից բիրտ ուժ է կիրառում, որ վախեցնի մարդկանց դուրս գան փողոց։ Բայց անհնար է անվերջ մարդկանց վախեցնել»։ 

Հարցին՝ ձեզ մեղադրում են, որ պետք է ժամանակին խոսեիք այդ ամենի մասին, կանխել, նա պատասխանեց. «Ժամանակին, երբ տվեցի հրաժարական, իմ հրաժարականի տեքստը խորն իմաստ ուներ։ Տեսնում ենք, որ ամեն օր այդ ամենն իրողություն է դառնում։ Կորցրեցինք Արցախի 70 տոկոսը,  շուրջ 5000 զոհ ունեցանք, Կովիդի արդյունքում հազարից ավելի զոհեր ունենք, փլուզված տնտեսություն։

Հասկանում եք, որ տնտեսությունը, երկիրը քանդվում է, էլ տեղ չունենք, օդանավարը որ սկսեն թռնել, ազգի 50 տոկոսն արտագաղթելու է։

Ես խոսել եմ, բարձրաձայնել եմ, դիմացել եմ ստոր, սուտ, նվաստացուցիչ արարքներին, որոնք տարածվել են»։

Մի քաղաքացի դիմելով Վանեցյանին ասաց՝ «ասեք, թե երբվանից է երկիրը քանդվում»։

Ա. Վանեցյանն արձագանքեց. «30 տարի է  քանդվում է։ Նիկոլի կողքն եմ եղել, հավատացել եմ, արել եմ ամեն ինչ, որ նորմալ երկիր դառնա,  տեսել եմ, որ քանդվում է, չի կարողանում երկիրը կառավարել, ասել եմ՝ Նիկոլ կանգ առ ու դուրս եմ եկել»։

Ըստ Ա. Վանեցյանի, Նիկոլ Փաշինյանի ամենակարևոր խնդիրն այն է, որ վերջնական որոշում չի կայացրել ոչ մի տեղ, մինչդեռ պետության ղեկավարի պարտականությունն է որոշումներ կայացնելն ու պատասխանատվություն վերցնելը։

«Եթե սխալվում ես, ընդունում ես սխալդ ու հեռանում։ Հիմա ինքը սխալվել է, պետք է հեռանա»,- ընդգծեց ԱԱԾ նախկին տնօրենը։

Նա նշեց, որ ուզում են նորմալ, հանգիստ երկրում արժանապատիվ ապրել, լինի կանխատեսելի ղեկավարություն։

«Նիկոլ Փաշինյանի գնալուց հետո պետք է հասկանալ, թե ով է այն մարդը, որը իր վրա վերցնելու է այդ պատասխանատվությունը, պետք է փորձել փլուզված երկիրը ոտքի կանգնեցնել։ Այո, ես պատրաստ եմ իմ վրա վերցնել պատասխանատվությունը, բայց որտեղ կլինեմ մեր հայրենիքի փրկության գործընթացում, մենք կորոշենք բոլորս։ Ես չեմ ասել, որ պատրաստ եմ լինել վարչապետ, ասել եմ, որ պատրաստ եմ  իմ վրա վերցնել պատասխանատվություն, էլի պատրաստ եմ, պատասխանատվությունից երբեք չեմ փախել»,- ասաց Ա. Վանեցյանը։