Ձեր վստահելի աղբյուրը

16։15
ՀՅԴ անդամ Գեղամ Մանուկյանն ասաց, որ հաջորդ հանրահավաքի մասին հատուկ տեղյակ կպահեն։
Հանրահավաքի ժամանակ երգչուհի Շուշան Պետրոսյանը  կատարեց Հայաստանի բանակի հիմնը՝ «Երազ իմ երկիր հայրենի» երգը։

Մինչ այդ նա ասաց. «Երբեք չեմ ասել, որ սիրում եմ ձեզ, խոնարհվում եմ ձեր առջև։ Ես այդպես սիրով ու խոնարհումով ապրել եմ միշտ, ապրում եմ ու պետք է ապրեմ։ Մի երգ եմ ուզում երգել, որը մեր բանակի խորհրդանիշն է։ Այդ բանակը կայացավ ու մեծացավ մեր գրկում, ուրեմն մենք իրավունք չունենք իրեն դավաճանելու, պետք է սպեղանենք վերքերը, ամրացնենք բանակը։
Նիկոլը դավաճան է»։

16։10
Պրոդյուսեր Ռուբեն Մխիթարյանն իր ելույթում ասաց. «Նիկոլ Փաշինյանը երկիրը 2,5 տարի պահել է ստի, կեղծիքի մեջ։ Այդ ամեն ինչի հանրագումարը մենք տեսանք 44-օրյա պատերազմի ընթացքում։

Հիմա ասում է՝ եթե ինձ 6 ամիս ժամանակ տանք, լուրջ եմ ասում՝ ամեն ինչ լավ կլինի։ Բայց արդյոք մենք վստահում ենք Փաշինյան դավաճանին, արդյոք նրան համարում ենք ադեկվատ ղեկավար»։

Հավաքված քաղաքացիները գոռում էին՝ «Ոչ»։ 

Ռ. Մխիթարյանի խոսքով, գեներալ Մովսես Հակոբյանն այնպիսի հայտարարություններ արեց, որ դրանից հետո իրեն հարգող  ցանկացած ղեկավար ոչ թե գետինը պետք է փորեր, մտներ մեջը, այլ լուսին թռներ։

Նա նշեց, որ Նիկոլ Փաշինյանն անընդհատ խոսում էր ինչ-որ քաղաքական գործիչների, մարդկանց պատմության աղբամանը նետելու մասին. «Ցավն այն է, որ տարիներ անց հայ ազգը քո կառավարման ժամանակահատվածը հենց այդպես անվանելու է՝ պատմության աղբաման:

Այնուհետև նա աղբամանի մեջ նետեց «Հայկական ժամանակ» թերթը, Նիկոլ Փաշինյանի «Երկրի հակառակ կողմը» գիրքը։«Պարզվեց, որ պետք է կոչվեր՝ երկրի անառակ կողմը»,-ասաց պրոդյուսերը:Աղբաման նետեց նաև «ՀՀ հպարտ քաղաքացու անձնագիրը», որը բաժանում էր Փաշինյանի նախատեսված  հանրաքվեից առաջ, ԱԺ փախնախագահ Լենա Նազարյանի, «Իմ քայլը» խմբակցությունից Անդրանիկ Քոչարյանի, Լիլիթ Մակունցի լուսանկարները։

15։18
ՀՅԴ-ական Արծվիկ Մինասյանն իր ելույթում նշեց, որ նոր որակի իշխանությունը պետք է իրականացնի Հայաստանի արժանապատվության վերականգնում, արտաքին այնպիսի քաղաքականություն վարի, որը կբացառի պատերազմը։ Ըստ նրա, եթե Նիկոլ Փաշինյանը շարունակի պաշտոնավարել, մեր ժողովրդին սպառնում է  նոր պատերազմ, նոր արհավիրք։
«8 ամսում Նիկոլ Փաշինյանը և իր կառավարությունը «ապահովեց» 8000 զոհ՝ ռազմաճակատում, կորոնավիրուսից։ Սրա թիվ մեղավորը Նիկոլ Փաշինյանն ու իր կառավարությունն է։ Հետևաբար բոլոր այս հանցագործները պետք է կանգնեն դատարանի առաջ, կրեն պատասխանատվություն, որպեսզի բացառենք հետագայում որևէ ազգադավ, հայրենադավ, նման հանցավոր իշխանության գոյությունը մեր երկրու»,- նշեց նա։

Ա. Մինասյանի խոսքով, պետք է վերականգնել կոտրված տնտեսությունը, ստեղծել աշխատատեղեր, վերանայել արտաքին պարտքը, փոխել սոցիալական աննորմալ համակարգը։
«Կանգնում են ու անամոթաբար հայտարարում՝ եթե ավելի վաղ համաձայնվեինք ռազմական գործողությունների դադարեցմանը, մեզ կմեղադրեին Շուշին հանձնելու մեջ։ Այսինքն ի՞նչ՝ մեր զավակներին կոտորել եք տալիս, որպեսզի հետո պիառ անեք, թե կռվելով եք հանձնե՞լ։ Դուք մարդ ե՞ք, թե՞ անասուն։ Այս երևութը վերացնել է պետք»,- ասաց ՀՅԴ-ական գործիչը։

14։44
ՀՅԴ ԳՄ անդամ Գեղամ Մանուկյանը թվարկեց երեկ Նիկոլ Փաշինյանի հրաժարական պահանջող ակցիաների մասնակիցներից մի քանիսի անունը, որոնք բերման էին ենթրակվել։ Նա նշեց, որ բերման ենթարկված երիտասարդները բոլորը պատերազմի մասնակից են, նրանցից ոմանք վիրավորված են եղել, նոր են ապաքինվել ու այդպես ոստիկանները նրանց քարշ տալով տարել են ոստիկանություն։

«Հրանտ Մելիք-Շահնազարյան... Լսիր Նիկոլ, դու առաջին պատերազմից փախած էիր, Հրանտ Մելիք-Շահնազարյանի հայրը՝ Լևոն Մելիք-Շահնազարյանը Իգոր Մուրադյանի հետ Կիրովաբադի հայության փրկությունն էր կազմակերպում։ Արցախի գերագույն խորհրդի  պատգամավորներից էր։
Տիգրան Աբրահամյան՝ Արցախի նախկին նախագահ Բակո Սահակյանի խորհրդական, օր ու գիշեր առաջնագծից տուն չէր գալիս, երեկ տանում էիք ոստիկանատուն»։

14։36
Իրավապաշտպան Ռուբեն Մելիքյանն ասաց, որ անփառունակ պարտությունից հետո  Նիկոլ Փաշինյանը պետք է հեռանա։ Նա նշեց, որ երկրում ռազմական դրության շարունակումն ապօրինի է, շարունակվում է  բացառապես հավաքները խոչընդոտելու նպատակով։

«Հայաստանում քաղաքական ճգնաժամ է, տնտեսական ճգնաժամն է հասունանում, իրավական ճգնաժամ է, որովհետև ոստիկական ուժերով խոչընդոտում են սահմանադարական իրավունքների իրականացմանը։ Բայց ամենակարևորը՝ մեր երկրում արժանապատվության ճգնաժամ է, որովհետև մարդիկ, կորցնելով արժանապատվությունը, աթոռներին կպած փորձում են պաշտոնավարել Արցախը հանձնելուց, թշնամուն առջև ծնկելուց հետո»,- ասաց Ռ.Մելիքյանը։

«Նիկոլ դավաճան», «Նիկոլ դավաճան» կարգախոսներով Ազատության հրապարակում մեկնարկում է ընդդիմադիր ուժերի հանրահավաքը՝ վարչապետ Նիկոլ Փաշինյանի հրաժարականի պահանջով։
Լրագրողների հետ զրույցում ՀՀԿ-ական Էդուարդ Շարմազանովն ասաց, որ Նիկոլ Փաշինյանը պետք է հրաժարական տա, նա այլ ելք չունի, ավարտված գործիչ է։

«Գնալու է  Ալիևի հետ հանդիպման, ինչպե՞ս է խոսելու,  ինչպե՞ս է պաշտպանելու մեր շահը։ Տեսանք՝ ինչպես էր պաշտանում 44 օր։ Կապիտուլյացիայի պատճառը մի հոգի է՝ Նիկոլ հողատուն»,-ասաց նա։

Քաղաքական գործիչն ընդգծեց, որ կնքված արձանագրությունը դառը, դաժան իրողություն է, որին բերել, հանգեցրել է Նիկոլ Փաշինյանը։

ԲՀԿ խմբակցության անդամ Նաիրա Զոհրաբյանն ասաց, որ Մովսես Հակոբյանի բացահայտումները լիուլի բավարար են Նիկոլ Փաշինյանի դեմ քրեական գործ հարուցելու համար։

«Մեր ցույցերը լինելու են խաղաղ, հանուն Հայաստանի, հանուն Արցախի։ Նիկոլ Փաշինյանը պետք է հեռանա, որպեսզի Հայաստանն ունեն ապագա, Նիկոլ Փաշինյանը վտանգում է Հայաստանի անվտանգությունը»,- ասաց նա։