Ձեր վստահելի աղբյուրը

Վարչապետ Նիկոլ Փաշինյանը հանձնարարել է փոխվարչապետի գլխավորությամբ ստեղծել անհետ կորած զինծառայողների հարցերով միջգերատեսչական հանձնաժողով։ Այս մասին ՊՆ դիմաց  անհետ կորած զինծառայողների ծնողներին ասաց վարչապետի օգնական Նաիրի Սարգսյանը։

Նա նշեց, որ վարչապետը նաև պատրաստվում է հանդիպել ծնողների հետ։ Ծնողները ցանկություն հայտնեցին, որ հիմա վարչապետը գա այստեղ ու հանդիպի իրենց հետո։

«Հոկտեմբերի 5-ից խաբար չունենք մեր երեխաներից, նոր հանձաժողով եք ստեղծո՞ւմ։ Այսինքն եթե Սասուն Միքայելյանը վիրավորվում է, բոլորն իմանում են, մեր երեխեքը 50 օր է կորել են, դուք տվյալ չեք տալի՞ս։ Դա ճի՞շտ է»,- ասաց ծնողներից մեկը։

Մարտական գործողությունների ընթացում գերեվարված, անհետ կորած զինառայողների, այլ անձանց հանձնաժողովի նախագահ Վիտալի Ոսկանյանն ասաց, որ Մատաղիսից, Մարտունիից, դեպի աջ գնացող կետերից դիակներ են հանել։

«Հադրութի մասերում ողջեր կան, նրանց հանեք»,- ասաց ծնողներից մեկը։

«Պարոն Ոսկանյան, ասում եք՝ 30 անհետ կորած զինվոր ենք գտել, 30-ից երկուսի անունն ասեք, մենք ծնողներին տեսնենք։ Չկա։ Սուտ եք խոսում, 30 զինվոր չեք գտել»,- նշեց ծնողներից մեկը։

Ոսկանյանն արձագանքեց, որ առանձին իրեն մոտենան, կհայտնի։ 

«Երեխու հայրը երկու օր առաջ տեսնում է, որ իր երեխուն գերի են վերցնում։ Եթե հետաքրքրվեիք, կարող էր այդ երեխան մեզ մոտ լիներ, ոչ թե թուրքի»,- նշեց քաղաքացիներից մեկը։

Անհետ կորած զինծառայողներից մեկի հայրն ասաց. «Թող այս 40 օրը մեզ զենք տայինք, մենք գնայինք, հանեիքն մեր երեխեքին»։

Ծնողներից մեկն ասաց, որ իր երեխան 12-հոգանոց խմբով ողջ է, նոյեմբերի 16-ին զանգել են ընկերներից մեկի համար, մի քանի վայրկյան զանգ է գնացել։  
«Իմ տղան՝ լեյտենան,  չի գցել 18 տարեկաններին, հրամանատարը փոխել է։ Մեզ ոչ մեկ չի լսում։ Ես չեմ էլ ամաչում, ասում եմ՝ եթե Հայաստանը չի կարողանում մեզ տեր կանգնել, ուզում եմ ինքս Պուտինին դիմել, իմ երեխեն ինձ համար ավելի թանկ է»,- ասաց անհետ կորած զինվորի մայրը։ 
Մեկ այլ քաղաքացի նշեց, որ ամեն տարածք տալու օր ու ժամ են որոշում, իսկ  գերիներին, անհետ կորածների կետը...
«Չենք գնալու այստեղից։ Թող չգցեն վաղվան, թող հիմա գան։  Մեր երեխաները բաց երկնքի տակ են, ինչի՞ մի գիշեր էլ իրենք գնան, հանգիստ քնեն»,- նշեց ծնողներից մեկը։
«Չէի պատկերացնում, որ հայ զինվորի հետևից չեն գնա»,- ասաց մայրերից մեկը։