Ձեր վստահելի աղբյուրը

«Մենք ունենք իրավիճակ, որտեղ Թուրքիան շարունակում է Մեծ Թուրան ձևավորելու իր նկրտումները, ամեն օր աշխատում է, Ալիևն ու Էրդողանը համատեղ իրենց երջանկություններն են փորձում կյանքի կոչել»,- «Հայաստանն ու Արցախը պատերազմից հետո. արտաքին քաղաքական մարտահրավերները» թեմայով քննարկմանն ասաց «Մարդկային զարգացման միջազգային կենտրոնի» ղեկավար Թևան Պողոսյանը:

Նա նշեց՝ օրերս Էրդողանը հետաքրքիր արտահայտություն է արել, որ իր համար Նախիջևանից Ադրբեջան ճանապարհն ավելի մեծ նշանակություն ունի, քան իրենց կողմից գրավված մյուս տարածքները:

Թ. Պողոսյանի խոսքով, Իրանը գիտակցում է բոլոր խնդիրները, որ այդ տարածքները նույնձև  օգտագործելու են իր դեմ, ՌԴ-ն շատ լավ հասկանում է, որ իր համար այստեղ մեծ ճնշումների  դաշտ է բացվելու. որ վայրկյանին կենտրոնանում է  Արցախի մասի վրա, Թուրքիան Սիրիայում է ակտիվանում, կամ հակառակը: Ըստ նրա, Վրաստանը  իր բաժին վախերն է ձեռք բերել ադրբեջանական հաղթանակից:

«Այս բոլոր խնդիրներում ամենացավալին մեր ներքին կյանքն է: Մեր ներքին կյանքում չենք գիտակցում, որ իրավունք չունենք գոնե մեկ օր պառակտված լինենք: Ցանկացած էլեմենտ, որ մեզ պառակտման է տանում, կապ չունի որ կողմից, նպաստում է, որ ուրիշներն իրենց շահերը տանեն առաջ, մենք մնանք: Հասկանալի է, որ Ռուսաստանը երկար կմնա Արցախում:

Պատերազմը չի ավարտվել, պետք է արագ պատրաստվենք հաջորդ պատերազմին, իսկ մենք զբաղված ենք  այլ խնդիրներով»,- ասաց Թ.Պողոսյանը:

Քննարկմանը ներկա  քաղաքագետ Սուրեն Սարգսյանը դժվարացավ ասել՝ Հայաստանն արտաքին քաղաքականություն ունի, թե չունի, ունենալու է, թե չի ունենալու, ինչպես է Հայաստանն ընդհանրապես նոր իրողությունների պայմաններում դիրքավորվելու արտաքին քաղաքականությունում, դիվանագիտության մեջ: 

«Այսօր ունենք մի իրավիճակ, երբ պատերազմն ավարտվել է, բայց կարծես որևէ մեկը գոհ չէ արդյունքներից, պատերազմում ներգրաված որևէ կողմ բավարարված չէ այն իրավիճակով, որ  ունի: Ադրբեջանը բավարարված չէ, ըստ էության, ամբողջ Արցախն էր ուզում, ստացել է 7 շրջանն ու Արցախի գրեթե կեսը:  Թուրքիան դժգոհ է, որովհետև ցանկանում էր այլ տեսակի ելք՝ ուղիղ ցամաքային կապ Ադրբեջանի հետ, խոսքը գնում է Սյունիքի տարածքով Ադրբեջանի հետ ուղիղ կապ ունենալու մասին: Ռուսաստանը չէր պլանավորել խաղաղապահներ տեղակայել Արցախի մի տարածքում:  Հայաստանն էլ, բնականաբար, չի կարող գոհ լինել այն իրավիճակից, որ այսօր կա:

Այս ամենը հաշվի առնելով, կարծում եմ, դեռևս այս լարածությունը չունի պակասելու միտում, ոչ միայն այն պատճառով, որ Հայաստանի ներքաղաքական կյանքում լուրջ հետցնցումներ են տեղի ունենում, այլ որովհետև իրավիճակից գոհ չէ ոչ մեկ»,- նշեց քաղաքագետը:

Ըստ նրա, Վրաստանն էլ գոհ չէ, որովհետև իր հարևանությամբ ՌԴ ներկայությունը մեծանում  է: Ս. Սարգսյանը չի բացառում, որն Ռուսաստանը մոտ ժամանակներս  ցանկություն հայտնի նաև հայ-վրացական սահմանի պահպանության հարցը բերել օրակարգ, քանի որ հայ-վրացական սահմանը ոչ միայն ԵԱՏՄ, ՀԱՊԿ արտաքին սահման է, նաև ԱՊՀ արտաքին սահման է:

«Իրականում մեզ մոտ բարդ իրավիճակ է, պատերազմից հետո բարդությունների, դժվարությունների երկրորդ փուլն է: Ըստ էության, նույնքան բարդ է լինելու հաղթահարել, որքան այս պատերազմը կամ հետպատերազմյան պրոցեսը»,- ասաց Սուրեն Սարգսյանը: