Ձեր վստահելի աղբյուրը

«Մենք պարտվել էինք այն ժամանակ, երբ ապաստարանները դարձրել էինք ուտելու և փող աշխատելու, շատ ուտելու և շատ փող աշխատելու վայրեր, ավելի շատ ուտելու և ավելի շատ փող աշխատելու օբյեկտներ»,- Երևանի ավագանու այսօրվա նիստում հայտարարեց «Իմ քայլը» խմբակցության անդամ Արման Անտոնյանը:

Նրա խոսքով, Երևանի քաղաքապետարանից տարիներ շարունակ ներկայացվել են փաստաթղթեր, ըստ որոնց, երևանցիների գրեթե 90 տոկոսը ապահովված է թաքստոցներով և ցանկացած տագնապի դեպքում նրանք պաշտպանված են ռմբակոծությունից:

Աշխատանքային խմբի քննարկումների ժամանակ Արման Անտոնյանը պարզել է, որ նկարված թվերով փաստաթղթերը նաև այս պատերազմական իրավիճակում են ներկայացվել համապատասխան պետական գերատեսչությանը:

Վերջինս կարծիք հայտնեց, որ անհիմն թվերով փաստաթղթեր ներկայացրած պաշտոնյաները պետք է անհապաղ ենթարկվեն պատասխանատվության, քանի որ նրանց նկարած թվերն ուղիղ կապ ունեն մարդկանց կյանքի հետ:

Ըստ նրա, մենք շարունակում ենք պարտվել, քանի որ այդ մարդիկ մինչ օրս չեն կրել պատասխանատվություն հանրության առաջ:

«Այդ ապաստարանները ե՞րբ և չգիտես ինչպե՞ս սեփականաշնորհվեցին, չգիտես ո՞ւմ թեթև ձեռքով և մտքով որոշվեց, որ դրանք մեզ այլևս պետք չեն գա»,- հարց հնչեցրեց ավագանու անդամը և նկատեց, որ դրանք կարող էին պետք չգալ, եթե կա մարտունակ, մինչև ատամները զինված բանակ և գերզարգացած պետություն:

Նա լրագրողներին կոչ արեց հարցումով պարզել, թե քանի՞ քաղաքացի գիտի տագնապի ազդանշանի դեպքում որտեղ պետք է պատսպարվի: 

Նկատելով, որ պատերազմը դեռ չի ավարտվել՝ ավագանու անդամը Երևանի գործադիր մարմնին կոչ արեց վերանայել այս քաղաքականությունը և կրպակներից մաքրել մետրոյի մուտքերն ու անցումները, ինչը խանգարում է պատսպարման գործընթացին: