Ձեր վստահելի աղբյուրը

«Այո, ես ասում և պնդում եմ, որ Շուշիի հանձնումն ավելի շատ քաղաքական որոշում էր. այն պարզ պատճառով, որ պայմանավորվածության ստորագրման պահին Շուշիում շարունակում էին մնալ Արցախի պաշտպանության բանակի ստորաբաժանումները»,- այսօր հրավիրված ասուլիսում ասաց «WarGonzo»-ի հեղինակ Սեմյոն Պեգովը՝ ներկայացնելով Արցախյան 44-օրյա պատերազմի վերաբերյալ իր տպավորությունները։

Նա նշեց՝ պատասխանատվությունի կվերցնի ասելու, թե քաղաքն ամբողջովին գտնվում էր Արցախի պաշտպանության բանակի վերահսկողության տակ, դժվար է դա պնդել, որովհետև Ադրբեջանի զինված ուժերի ծառայողներ էլ կային այնտեղ.

«Բայց ստորագրման պահին քաղաքի համար կռիվ էր ընթանում, և դա ինձ համար անվիճելի փաստ է: Ես դա գիտեի, որովհետև նախ զանգահարում էի առաջնագծի տղաներին, և երկրորդ, նոյեմբերի 9-ի առավոտյան ժամը 5-ին, երբ ես եկա, Շուշիից մոտ 2 կիլոմետր հեռավորության վրա գտնվող բարձունքում կար մոտ 400 հոգի, որոնք պատրաստ էին գնալ և «մաքրել» Շուշին»։

Ըստ Սեմյոն Պեգովի, այդ դիրքից կարելի էր նույնիսկ նկարահանել, թե որտեղ են գտնվում Արցախի պաշտպանության բանակի զինվորները: Նրա խոսքով, զինվորների ամենաքիչը երկու խումբ գտնվում էր Շուշի քաղաքի տարածքում:

«Դա նշանակում է, որ Ադրբեջանը նույնպես լիովին չէր վերահսկում քաղաքը: Բացի այդ, ես գիտեմ, որ նոյեմբերի 7-ին, երբ Ալիևը հայտարարեց Շուշիի գրավման մասին, այդ պահին քաղաքում գտնվում էին մի քանի դիվերսանտներ, որոնք իրոք կարողացել էին ներխուժել, զբաղեցնել որոշակի կետեր, այդ կետերից կրակ բացել ստորաբաժանումների, մեքենաների վրա»,- տեղեկացրեց նա։

Սեմյոն Պեգովը կարծիք հայտնեց, որ ընդունված որոշումներն ավելի շատ քաղաքական են, քան ռազմական:

«Ինձ համար հիմա դժվար է գնահատել Հայաստանի ու Արցախի ղեկավարության որոշման ճշտությունը, որովհետև երևի միայն նրանք գիտեին, թե ինչքան պահուստ կար մարտական գործողությունները շարունակելու համար»,- ասաց նա։

Ինչ վերաբերում է հարցին, թե ո՞վ էր ղեկավարում Շուշիի համար մղվող մարտերը, ռուս լրագրողը նշեց.

«Ես գիտեմ, որ իրավիճակը ամբողջությամբ վերահսկում էր Արցախի պաշտպանության նախարարը։ Նոյեմբերի 7-ին այնտեղ էր նաև պաշտպանության փոխնախարարը»։