Ձեր վստահելի աղբյուրը

Կառավարության դիմաց Նիկոլ Փաշինյանի հրաժարականով անժամկետ հացադուլ հայտարարած դաշնակցական գործիչ Գեղամ Մանուկյանին, ՍԴ նախկին անդամ Կիմ Բալայանին այցելած «Հայրենիք» կուսակցության նախագահ Արթուր Վանեցյանին անհետ կորածներից մեկի հարազատը հարցրեց՝ ի՞նչ եք անում անհետ կորածների հարցով։

«Այսօր դա ամենակարևոր խնդիրն է։ Ցավոք սրտի, ընդդիմության հնարավորությունները շատ սահմանափակ են։ Ուզում ենք բացատրել այս իշխանություններին, որ իշխանության համար պայքարելու փոխարեն առաջնահերթ պետք է զբաղվել անհետ կորածների ճակատագրով։ Պաշտոնի գալը, գնալը...այդ ամեն ինչը զրո է մի զինվորի գտնելու համեմատ»,-ասաց Վանեցյանը։

Նա հիշեցրեց՝ ինքը երկար տարիներ աշխատել է Ազգային անվտանգության ծառայությունում, ունի շատ մեծ կապեր, բայց երբ զանգ տա մի ընկերոջը, կառավարության շենքում նստած մարդը վեր կկենա ու կասի. «Վանեցյան Արթուրը գնացել է, ըսենց բան է արել, սրա շպիոնն է։ Հիմա ես ասում եմ, թող ասեն, քաղաքական տարաձայնությունները մի կողմ ենք դնում, այս կարևոր հարցով աշխատենք միասին։ Նա մեզ չի լսում, առավոտից երեկո ասում է՝ դավաճան եք։ Խոնարհվում եմ, ցավակցում եմ բոլոր զոհվածների հարազատներին։ Ինձ եթե ասեն, գնա, այս հարցերով զբաղվի, որևէ քաղաքական գործընթացի չեմ մասնակցի։ Նորից եմ ասում, մենք այս դերում որևէ լիազորություն չունենք։ Ասում ենք, այս անկարող մարդկանց ուղարկենք, թող գան կարող մարդիկ»։

Լրագրողների հետ զրույցում, անդրադառնալով Փաշինյանի այն հայտարարությանը, թե հասարակությունը չողջունեց Նիկոլ Փաշինյանի հրաժարականի վերաբերյալ ընդդիմության պահանջը, Վանեցյանն ասաց, այսօր հասարակությունում վիշտ, սուգ ու անհասկանալի վիճակ է։

«Միգուցե շատ կոպիտ հնչի, բայց Փաշինյանի այս հայտարարությունը սրիկայություն է, սրիկայությունն այլ կերպ չի լինում, այն այլ տեսք չունի։ Օր առաջ, վայրկյան առաջ իշխանության մեջ գտնվողները պետք է քայլեր ձեռնարկեն անհետ կորածների ճակատագիրը պարզելու, գերեվարվածներին վերադարձնելու ուղղությամբ։ Շատ պարզ է, մարդիկ սգում են, չեն ցանկանում մասնակցել քաղաքական գործընթացի, բայց ես հայտարարել եմ, սա զուտ քաղաքական գործընթաց չէ, սա պայքար է՝ հանուն հայրենիքի փրկության»,-հայտարարեց Ա. Վանեցյանը։

Ի պատասխան Փաշինյանի «ցինիկ» հայտարարության՝ Վանեցյանը կոչ արեց մարդկանց դուրս գալ տներից ու մասնակցել Փաշինյանի հրաժարականի պահանջով անցկացվող հավաքներին։

Անդրադառնալով վերջին հանրահավաքում իր հնչեցրած այն հայտարարության վերաբերյալ հարցին, թե Իջևանի դեպքերի ժամանակ Նիկոլ Փաշինյանը հայտարարել է, որ ցանկանում է  արյան գետեր տեսնել, ԱԱԾ նախկին տնօրենն ասաց՝ Փաշինյանն աչքի է ընկնում ապօրինի հանձնարարականներ տալով, օրինակ կառավարության նիստում ԱԱԾ պետին կարող է հանձնարարել գազալցկայաններում ՀԴՄ կտրոնի տրամադրումը ստուգել։

«Փոխարեն ԱԱԾ-ն զբաղվի ազգային անվտանգության սպառնալիքներով, որոնք մեզ բերեցին ու հասցրեցին այս արհավիրքին, գոնե ինֆորմացիա ստանային, որ «Բայրաքթարներ»-ն արդեն սկսել են կիրառել, և ի՞նչ է պետք անել, որ դրանց դեմն առնենք, դրա փոխարեն հանձնարարում է գնալ սատանա բռնել։ Հետո էլ իր ընտանիքին պատկանող թերթով հարցում է  ուղարկում ԱԱԾ՝ ի՞նչ եղավ, սատանաներին բռնեցի՞ք։ Այսինքն, նվաստացնում է պետական կառավարման մարմինների դերը, պետական կառավարման համակարգը հիմնահատակ քանդել է։ Ինչո՞ւ չեն կարողանում զբաղվել անհետ կորածների հարցով, որովհետև չկա պետական համակարգ, մարդիկ չգիտեն՝ ո՞նց զբաղվեն, ո՞նց գտնեն նրանց»,-ասաց Վանեցյանը։