Ձեր վստահելի աղբյուրը

Բրիտանիայում և Բրազիլիայում 20 հազար կամավորների մասնակցությամբ փորձարկումների վաղ վերլուծությունը ցույց է տալիս, որ Օքսֆորդի համալսարանի և AstraZeneca-ի համատեղ կորոնավիրուսի դեմ պատվաստանյութը առնվազն 70 տոկոս արդյունավետ է։ Կամավորների մոտ, որոնք հատուկ ռեժիմով ստացել են դեղաչափի կես չափաբաժին,ապա լրիվ դեղաչափը, այդ ցուցանիշը հասել է 90 տոկոսի: Պատվաստանյութ ստացածներից ոչ մեկի մոտ չի առաջացել ծանր COVID-19: Այս մասին գրում է Ամերիկայի Ձայնը։

Օքսֆորդի պատվաստանյութերի խմբի տնօրեն Էնդրյու Փոլարդն ասել է. «Իրոք, հիանալի է, որ այժմ մենք ստացել ենք բազմաթիվ պատվաստանյութեր: Եթե մենք կարողանանք դրանք հնարավորինս արագ տարածել, մեծ արդյունք կունենանք»:

AstraZeneca-ն նախատեսում է տարեվերջին մատակարարել հարյուր միլիոնավոր չափաբաժիններ՝ կախված կարգավորող մարմնի հաստատումից: Բժիշկներն ասում են, որ պատվաստանյութի մի քանի հատկություններ այն հարմար են դարձնում գլոբալ տարածման համար:

Օքսֆորդի համալսարանի համաշխարհային առողջապահության փորձագետ, դոկտոր Փիթեր Դրոբակն ասում է. «Առաջինն արժեքն է: Այս պատվաստանյութի գինն ավելի ցածր է, քան Pfizer-ի և Moderna-ի մշակած պատվաստանյութի գները»:

AstraZeneca-ն խոստացել է, որ համաճարակի ընթացքում պատվաստանյութից շահույթ չի ստանա:

Առողջապահության համաշխարհային փորձագետ, Օքսֆորդի համալսարանի դոկտոր Փիթեր Դրոբակն ասել է. «10 երկրներում այն արդեն արտադրվում է: Հնդկաստանում արտադրական շատ մեծ գործընկեր կան: Մենք հույս ունենք, որ շատ մեծ քանակությամբ դոզաներ շատ արագ հասանելի կդառնան: Այս պատվաստանյութը միայն սառնարանային ջերմաստիճանի է պահանջում»:

Մինչդեռ Pfizer պատվաստանյութը պահանջում է պահեստավորում մինուս 70 աստիճան ցելսիուսում: Զարգացող երկրներում շատ առողջապահական համակարգեր չունեն սառնարանային պայմաններ դեղերը չափազանց ցուրտ ջերմաստիճանում պահելու համար:

Մինչ այժմ 188 երկիր ստորագրել է մի նախաձեռնություն, որը կոչվում է COVAX, որտեղ ավելի հարուստ երկրները ներդրումներ են կատարում մի քանի պատվաստանյութերի և դրանց ամբողջ աշխարհում տարածման համար անհրաժեշտ ենթակառուցվածքների մշակման մեջ:

Ըստ դոկտոր Փիթեր Դրոբակ՝ «Կատարյալ նպատակը կլինի այն, որ COVAX-ին մասնակցող երկրներից յուրաքանչյուրը մինչև 2021 թվականի ավարտը պատվաստանյութ ստանա իր բնակչության 20 տոկոսի համար: Հիմա դա, իհարկե, ձգտում է, ոչ թե երաշխիք: Բայց դա թույլ կտա յուրաքանչյուր երկիր գոնե սկսել ծածկել առավել խոցելի խմբերին, առաջնագծի աշխատողներին և այլն»:

Հնարավոր է, որ առաջիկա շաբաթների ընթացքում կարգավորող մարմինների կողմից պատվաստանյութերի առաջատար թեկնածուներին տրվի արտակարգ կիրառման հաստատում՝ հույս ունենալով, որ աշխարհը համաճարակի դեմ պայքարում լուրջ առաջխաղացման եզրին է:
Միևնույն ժամանակ, բժիշկներն ասում են՝ կարևոր է, որ մարդիկ հետևեն վիրուսի փոխանցումը կանխող միջոցներին: