Ձեր վստահելի աղբյուրը

«Իրավական ճշգրիտ փաստարկների ներկայացումը շատ կարևոր է, որովհետև հակառակ դեպքում, եթե բավարար չափով հիմնավորված չլինի ռազմական դրության չեղարկումը՝ այն անմիջապես մեկնաբանվելու է որպես քաղաքական նպատակներով երկարաձգման փաստ»,- Աժ արտահերթ նիսում հայտարարեց «Լուսավոր Հայաստան» խմբակցության պատգամավոր Արկադի Խաչատրյանը՝ հիմնավորելով ռազմական դրության վերացման անհրաժեշտությունը:

Նա կարծիք հայտնեց, որ այս իրավիճակում առաջին հերթին քաղաքական մեծամասնությունը պետք է շահագրգռված լինի ազատվել ռազմական դրությունից՝ նման քաղաքական մեկնաբանություններից խուսափելու համար:

Պատգամավորն իր զարմանքը հայտնեց այն փաստի առթիվ, որ կառավարության կողմից որպես հարակից զեկուցող նշանակվել է ոչ թե ՊՆ գլխավոր շտաբը,  այլ Առողջապահության նախարարությունը, այն դեպքում, երբ խոսվում է ՀՀ ինքնիշխանության, տարածքային ամբողջականության և անվտանգության սպառնալիքների և դրանց վերացման անհրաժեշտությունների մասին: 

Ըստ Խաչատրյանի, կառավարության փաստարկներն առողջապահության և հումանիտար ոլորտից  են և չեն կարող ուժեղ լինել:

Նկատելով, որ կառավարության հիմնական փաստարկը հումանիտար աղետն կանխարգելելու համար հարկային արտոնությունների պահպանումն է՝ Արկադի Խաչատրյանը  շեշտեց, որ նման արտոնություններ սահմանելու համար մի շարք այլ ճանապարհներ կան:

Շեշտելով, որ ռազմական դրության համար պետք է լինի 6 սպառնալիք՝ պատգամավորը նկատեց, որ, ըստ կառավարության, հարկային արտոնություններն էին խանգարում, որպեսզի այդ սպառնալիքները դիտարկվեին:

Արկադի Խաչատրյանը, որպես Ֆինանսաբյուջետային և տնտեսական հարցերի մշտական հանձնաժողովի նախագահ, հայտնեց, որ  կառավարությունը կարող է ներկայացնել ապրանքների ցանկ, որոնք ռազմական դրությունից հետո հանգիստ կընկնեն հարկային արտոնությունների տակ:

Արկադի Խաչատրյանը ակնկալում էր, որ պաշտպանության գերատեսչությունից կներկայացվեր պահի իրական սպառնալիքները, այլ ոչ թե դրանք կկապվեր թշնամիների ագրեսիվ հռետորաբանության հետ, որոնք լինելու են միշտ և չեն կարող համարվել մշտապես ռազմական դրություն հայտարարելու հանգամանք:

Պատգամավորը հիշեցրեց նախորդ օրը հանձնաժողովի նիստում ԳՇ ներկայացուցչի այն փաստարկը, որ նախարարությունը կողմ է ռազմական դրության վերացմանը, եթե կարողանան ապահովել եռամսյա հավաքները:

Խաչատրյանի խոսքով, այն կարգավրորված է «Զինվորական ծառայության և զինծառայողի կարգավիճակի մասին» օրենքով և ցանկացած պահի կառավարությունը եռամսյա հավաքի որոշումը կարող է ընդունել ու առաջ գնալ:

Արկադի Խաչատրյանը հայտնեց, որ ռազմական դրության ժամանակ շատ դժվար է երկրում պատկերացնել բնականոն տնտեսական կյանք, տնտեսական ակտիվության վերականգնում, առավել ևս՝ ներդրումների ներգրավում, մարդկանց աշխատատեղերի վերականգնում:

Նրա խոսքով, ռազմական դրության ժամանակ, փոխվում է քաղաքացիների և տնտեսվարող սուբյեկտների վարքագիծը, որը իր արատացոլումն է գտնում ֆինանսական շուկաներում, ինչն անթուլատրելի է և պետք է օր առաջ վերացնել ռազմական դրությունը, լուրջ քայլեր կատարել տնտեսական ակտիվությունը վերականգնելու ուղղությամբ: