Ձեր վստահելի աղբյուրը

«Դուք հիմա մի ամբողջ ժողովրդի, հանրության պահում եք ռազմական դրության ծանր ռեժիմի տակ միայն նրա պատճառով, որ որպես գերատեսչություն չեք աշխատել հեռատեսորեն և չեք կատարել ձեր տնային աշխատանքը»,- ԱԺ այսօրվա նիստում առողջապահության փոխնախարար Անահիտ Ավանեսյանին դիմեց «Լուսավոր Հայաստան» խմբակցության  պատգամավոր Անի Սամսոնայնը:

Առղջապահության փոխնախարարը, ներկայացնելով ռազմական դրությունը չեղարկելու մասին օրենքի նախագծի վերաբերյալ կառավարության բացասական կարծիքը,  հայտարարեց, որ այն չեղարկելու դեպքում հումանիտար օգնության ստացման գործընթացը կխաթարվի:

«Ձեր գերատեսչության ծուլության և անհեռանկար քաղաքականության հետևանքով, մենք հիմա որպես արհեստական խոչընդոտ տեխնիկական հարցերն ենք դիտարկում ռազմական դրությունը չեղարկելու համար»,-նկատեց Անի Սամսոնյանը և շեշտեց, որ այդ նպատակով կան հարկային արտոնություններ տրամադրելու մեխանիզմներ, ինչպես նաև առանց ռազմական դրություն հաստատելու հումանիտար օգնություն ստանալու հնարավորություններ:

Առողջապահության փոխնախարար Անահիտ Ավանեսյանը համաձայնեց, որ կառավարությունը ունի հարկային արտոնություններ սահմանելու լիազորություն և բարեգործության մասին օրենք, որը հնարավորություն է տալիս հումանիտար գործընթացները կարգավորել, բայց այդ իրավակարգավորումներն ստեղծված իրողություններում չեն կարող օպտիմալ ձևով ծառայել իրենց նպատակներին:

Անի Սամսոնյաը հռետորական հարց ուղղեց, թե Առողջապահության նախարարությունը արդյոք չէ՞ր մտածում, որ Հայաստանը առաջիկա 5 տարիներին հումանիտար օգնություն պետք է ստանա, որովհետև այդ տարիներին շատ դժվար է լինելու մեղմել հումանիտար աղետը և ինչո՞ւ ռազմական դրության ռեժիմից դուրս օգնություն ստանալու մեխանիզմներ մինչ օրս չեն մշակվել: