Սահմանափակումները, որոնց անհրաժեշտությունը չկա, բերում են տնտեսական ծանր հետևանքների. Գորգիսյան
«Ռազմական դրություն հայտարարելու որոշման ընդունման համար հիմք հանդիսացած հանգամանքներն այլևս չկան, ուստի մենք առաջարկում ենք ընդունել ԱԺ որոշում՝ վերացնելու ռազմական դրությունը»,- խորհրդարանում ասաց ԱԺ «Լուսավոր Հայաստան» խմբակցության պատգամավոր Գևորգ Գորգիսյանը՝ ներկայացնելով «Ռազմական դրությունը վերացնելու մասին» ԱԺ որոշման նախագիծը։
Պատգամավորը հիշեցրեց, որ սեպտեմբերի 27-ին Արցախի դեմ թուրք-ադրբեջանական տանդեմի սանձազերծած ագրեսիայից հետո ՀՀ Կառավարությունը հայտարարեց ռազմական դրություն, հիմնավորմամբ, որ առկա է ադրբեջանական զինուժի՝ ՀՀ տարածք ներխուժելու անմիջական վտանգ, ինչը սպառնում է ՀՀ ինքնիշխանությանը..., անվտանգությանը։
«Բայց կապիտուլյացիայի հայտարարությունից հետո ավարտվեցին ռազմական գործողությունները։ Իսկ «Ռազմական դրության իրավական ռեժիմի մասին» օրենքով ասվում է՝ ռազմական դրություն հայտարարելու համար հիմք ծառայած հանգամանքների վերացման դեպքում ռազմական դրությունը կարող է ամբողջությամբ կամ մասնակի դադարեցվել։ Դա կարող է անել Կառավարությունը, կարող է անել նաև խորհրդարանը»,- ներկայացրեց Գևորգ Գորգիսյանը։
Պատգամավորը նաև տեղեկացրեց, որ երեկ պաշտպանության և անվտանգության հարցերի մշտական հանձնաժողովի նիստ է եղել, որի ընթացքում Կառավարությունը ներկայացրել է ռազմական դրությունը վերացնելու հետ կապված որոշակի առարկություններ։
«Առողջապահության նախարարի առաջին տեղակալը, հղում կատարելով Կառավարության երկու որոշումներին, պնդում էր, որ ռազմական դրությունն անհրաժեշտ է, որպեսզի կարողանանք հումանիտար նշանակության ապրանքներ ներկրել՝ առանց մաքսային վճարների։ Միանշանակ ակնհայտ է, որ այդ որոշումները փոփոխման ենթակա են, և դա կարելի էր անել վերջին է 16 օրերի ընթացքում։
ԳՇ ներկայացուցիչ գեներալ Ալբերտ Բաղդասարյանն էլ նշում էր, որ անվտանգության տեսանկյունից կարծես թե խնդիր չի առաջացնում ռազմական դրության վերացումը, քանի որ իրենք արդեն իսկ պատրաստել են համապատասխան որոշումների փաթեթ, որը պատրաստ է ներկայացվել Կառավարություն, և այդ փաթեթի ընդունման պարագայում բոլոր խնդիրները կարող են լուծվել՝ առանց ռազմական դրության»,- տեղեկացրեց պատգամավորը։
Գևորգ Գորգիսյանը նշեց, որ ռազմական դրության պահպանումն ունի նաև տնտեսական ծանր հետևանքներ.
«Բազմաթիվ քաղաքացիներ, որոնք ունեն երկքաղաքացիություն, այսօր չեն կարողանում դուրս գալ ՀՀ-ից, որպեսզի կարողանան իրականացնել տնտեսական գործունեություն, կամ մեկնել արտագնա աշխատանքի, որպեսզի գումար ուղարկեն և հանեն մեզ տնտեսական ճգնաժամից։ Սրան գումարած, կան քաղաքացիներ, որոնք զորակոչվել են և դեռևս գտնվում են տարբեր զորամասերում, մշտական տեղակայման վայրերում, և որևէ մարտական առաջադրանք չեն կատարում։ Նրանք ևս հնարավորություն չունեն այժմ զվաղվել տնտեսական գործունեությամբ։ Այսինքն՝ սահմանափակումները, որոնց անհրաժեշտությունը չկա, բերում են տնտեսական ծանր հետևանքների»։
Հարակից հրապարակումներ`
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
