Ձեր վստահելի աղբյուրը

«Սահմանն անցնում է գրեթե Սոթքի ոսկու հանքի միջով։ Սոթքի ոսկու հանքի և տարածաշրջանի հետ կապված ռուսական կողմից նախապես ձեռնարկվել էին անվտանգային միջոցառումներ տարածքի պաշտպանության համար»,- ասուլիսում ասաց ՀՀ Զինված ուժերի ԳՇ պետի առաջին տեղակալ Տիրան Խաչատրյանը։

Նա նշեց, որ պետական սահմանից հանքի եզրագծով ցանկապատվել էր, իսկ ճանապարհի վրա անցակետ էր տեղադրվել։

«Սա կատարվել է ռուսական կողմի ուժերով և իրենց անվտանգության խնդիրները լուծելու  նպատակներից ելնելով, ռուսական ընկերության նախաձեռնությամբ։ Այս խնդրի կատարման կամ դրա իրականացման հարցում մեր Զինված ուժերն ընդգրկվածություն չեն ունեցել։ Սահմանային ուղեկալի նման և այդ արգելափակոցների տեղադրման հետ կապված աշխատանքները  նախաձեռնվել և իրականացվել են ռուսական կողմի նախաձեռնությամբ և իրենց ուժերով»,- մանրամասնեց Տ. Խաչատրյանը։

Հարցին՝ «Գեոպրոմայնինգ» ընկերությա՞նը նկատի ունեք, Զինված ուժերի ԳՇ պետի առաջին տեղակալն ասաց, որ այո, այն  շահագործում է հանքը, որն էլ իր նախաձեռնությամբ և ուժերով է իրականացրել այդ աշխատանքները։

«Մեր զորքերն անվտանգության գոտու ապահովման, պաշտպանության խնդիրներ իրականացնելու հարցերում ընդգրկվածություն չեն ունեցել»,- կրկնեց նա։

Տ. Խաչատրյանի ներկայացմամբ, ադրբեջանական զորքերը Քարվաճառի տարածք մտնելուց հետո հանդիպելով արգելափակոցների, ուղեփակոցի, խնդիր են բարձրացրել, որ մեր տարածքն է, այդտեղից այն ուժերը, որոնք իրականացնում են տարածքի պահանություն, պետք է դուրս գան։

«Բարձրախոսով կապի են դուրս եկել մեզ հետ՝ պահանջելով դուրս գալ այդ տարածքից։ Մեր կողմից  զգուշացվել է, թե սա ինչ պատկանելիություն ունի, ում կողմից է, մեր կողմից զգուշացվել է  ռուսական կողմին, որ նման պահանջներ կան։ Ռուսական կողմի և Ադրբեջանը ներկայացնող համապատասխան զինվորականների հետ իրականացվել է բավական երկար բանակցություններ, որից հետո ինչ համաձայնություն են ձեռք բերել, հետագայում  ինչպիսի զարգացում կունենա, չեմ կարող ասել։ Այդ պահպանության գոտուց համապատասխան անձնակազմը դուրս է եկել»,- ասաց Տ. Խաչատրյանը։

Նա նշեց, որ մեր զորքերը սահմանի պաշտպանությունը զբաղեցնում են մեր պետական սահմանի նախկինում գոյություն ունեցող եզրագծով. «Որևէ տեղ մենք չունենք սահմանից հետ տեղադրված դիրքերը։ Իհարկե, դա կարող է հետագայում որոշակի քննարկումների, անհամաձայնությունների  առիթ դառնալ, որ մեր զորքերը գտնվում են սահմանից բավական առաջ։ Մենք չունենք որևէ տեղ դիրք, որը գտնվի սահմանագծից հետո»։

Տ. Խաչատրյանն ասաց, որ իր ունեցած տեղեկություններով՝ Քարվաճառի դարպասները չեն կոտրվել, բացվել են։

Հարցին՝ այն հատվածը, որտեղ մոտեցել են ադրբեջանական զորքերը, ի սկզբանե նախատեսված եղե՞լ է, որ անցնելու է Ադրբեջանի ենթակայության տակ, նա պատասխանեց. «Համաձայն հայտարարության, ամեն դեպքում մենք այդտեղ չպետք է լինեինք։ Բայց եթե այդ տարածքը, թեկուզ ռուսների վերահսկողությամբ, գտնվում էր ոչ իրենց հսկողության տակ, մեզ համար ձեռնտու տարբերակ էր»։

Հարցին՝ հանքը  ո՞ւմ է պատկանում, նա պատասխանեց. «Կիսով չափ մեզ, կիսով չափ ընկնում է իրենց տարածքում։ Հանքի շահագործողը լինելու է հանքի տերը»։ 

Տ. Խաչատրյանն ասաց, որ հանքի ղեկավարությունը տեղյակ է հանքի, ըստ վարչատնտեսական բաժանման գտնվելու վայրի մասին,  չգիտի, թե ինչ պայմանավորվածություն ունեն հակադիր կողմի ներկայացուցիչների հետ, միգուցե շարունակելու են նույն բնականոն ընթացքով շահագործել այդ հանքը, մարդիկ, որոնք աշխատել են, շարունակեն աշխատել։ 

«Սահմանի այն մասը, որտեղ մենք պետք է ծառայություն իրականացնենք, իրականացնում ենք»,- ընդգծեց նա։ 
Տ. Խաչատրյանը նշեց, որ Սոթքի հանքավայրի այն մասը, որը ՀՀ տարածքում է, Հայաստանի Հանրապետություն է։

«Այն պարագայում, երբ ինչ որ անվտանգային տեսակետից սպառնալիք լինի, մեր միջամտությունը լինելու է»,- ասաց Զինված ուժերի ԳՇ պետի առաջին տեղակալը։

Ինչպե՞ս է ստացվել, որ այդ հատվածի այդ մասի հսկողությունը ոչ թե հայկական բանակն է իրականացել, այլ մասնավոր ընկերությունը որոշել է իր համար անցակետ բացի,  նա նշեց, որ դա սահմանի մաս չէ, սահմանի  այն մասը, որտեղ պետք է ծառայություն իրականացնեն, իրականացնում են։

«Այն, ինչի մասին խոսվում է, սահմանից դեպի Քարվաճառի շրջանում է գտնվում։ Այն հատվածում, որը քննարկման թեմա է, թափոնների արտանետման տարածք է։Հանքի տվյալ հատվածում այսօր մարդ չի եղել»,-ասաց նա։

Հակառակորդն այսօր մտե՞լ է Սոթքի հանքավայրի տարածք, նա պատասխանեց, որ մտել են, երեք դիրք են տեղադրել այդ տարածքում, ընդ որում՝ մեկն անմիջապես հանքի եզրագծով:

Տ.Խաչատրյանի խոսքով,  մեր տարածքով չեն մտել. «Այն, ինչ վերաբերում է հայկական սահմանին և հայկական սահմանից դեպի արևմուտք գտնվող տեղամասին՝ չեն մտել»:

ԳՇ պետի առաջին տեղակալը նշեց, որ այն տարածքը, որը գտնվում է հայկական ԶՈւ հսկողության տակ, անհանգստանալու խնդիր չկա՝ անվտանգությունն ապահովված է:

Ինչպե՞ս կարող է մասնավոր ընկերությունը սեփական միջոցներով կոնֆլիկտային գոտում կազմակերպի պահպանություն պետական սահմանին հարցին ի պատասխան,  Տ.Խաչատրյանն ասաց. «Սա եզակի դեպք էր, հիմա սենց է ստացվել»։

Հարցին՝ ԳՇ-ում պաշտոնանակություններ սպասվում են,  կարճ պատասխանեց՝ ոչ։