Ձեր վստահելի աղբյուրը

«Կան հարցեր, որոնք հայտարարության մեջ ներառված չեն: Օրինակ` Լեռնային Ղարաբաղից սիրիացի վարձկանների դուրսբերման հարցը, ինչպես նաև Լեռնային Ղարաբաղի հետագա հնարավոր կարգավիճակի հարցը»,- մամուլի ասուլիսի ժամանակ ասել է Ֆրանսիայի արտաքին գործերի նախարարության պետքարտուղար Ժան-Բատիստ Լըմուանը:

Նրա խոսքով, կայունության և անվտանգության ապահովման խնդիրներ կան, այդ իսկ պատճառով հարկավոր է, որպեսզի բանակցությունները շարունակվեն ԵԱՀԿ Միսկի խմբի համանախագահության շրջանակում:

Ժան-Բատիստ Լըմուանը նշել է, որ նման ցանկությունը հայտնել են ինչպես հայկական, այնպես էլ ադրբեջանական իշխանությունները:

Ըստ Ֆրանսիայի արտաքին գործերի նախարարության պետքարտուղարի, նախագահ Էմանուել Մակրոնն առաջինն էր, որ իրերն անվանել է իրենց անուններով և նշել, որ Թուրքիայի կողմից սիրիացի վարձականներ են տեղափոխվել Լեռնային Ղարաբաղի հակամարտության գոտի:

«Ֆրանսիան կոնկրետ գործողություններ է սպասում Թուրքիայից, որպեսզի այդ երկիրը հանի վարձկաններին տարածաշրջանից: Ֆրանսիան ցանկանում է նաև, որ իր եվրոպական գործընկերները քննարկեն Թուրքիայի նկատմամբ պատժամիջոցներ կիրառելու հարցը: Բնականաբար, կշարունակենք հետևողական լինել այս քաղաքական խնդիրներին, որպեսզի կարողանանք հանգել այս արդյունքներին»,- եզրափակել է Լըմուանը: