Ձեր վստահելի աղբյուրը

«Հանուն սոցիալական արդարության» կուսակցության կենտրոնական գրասենյակում այսօր տեղի է ունեցել հանդիպում Շուշիի քաղաքապետ Արծվիկ Սարգսյանի և Շուշիի մի քանի  բնակիչների հետ, որոնք պատերազմի օրերին տեղափոխվել էին Երևան:

Կուսակցության տարածած հաղորդագրության համաձայն, շուշեցիները կուսակցության անդամներին ներկայացրել են ստեղծված իրավիճակը, այն խնդիրները, որոնք ունեն հարազատ քաղաքան ու իրենց տները  Ադրբեջանի վերահսկողության տակ անցնելուց հետո։

Բնակիչներին առավել շատ մտահոգում է իրենց կարգավիճակի հարցը, մինչ այժմ հստակեցված չէ՝  իրենք փախստակա՞ն են համարվում, թե՞ ոչ և ըստ այդմ էլ ինչ աջակցություն կարող են ակնկալել պետությունից:

Շուշիի բնակիչները նաև մի շարք այլ խնդիրների մասին են խոսել, օրինակ, բանկային ավանդների, վարկերի, իրենց սեփականության՝ անշարժ և շարժական գույքի և այլնի վերաբերյալ:

ՀԱՍԱԿ-ի նախագահ Արման Ղուկասյանը հավաստիացրել է, որ ուշադրության կենտրոնում կպահեն այս հարցերը, կներկայացնեն դրանք պատկան մարմիններին՝ հնարավորինս փորձելով օր առաջ աջակցել դրանց հիմնավոր կամ ժամանակավոր լուծումներ գտնել։

Պայմանավորվածություն է ձեռք բերվել ևս մեկ հանդիպում անցկացնել ամփոփելու արդյունքները, ինչպես նաև նման ձևաչափի հանդիպումներ անցկացնել Արցախի այլ բնակավայրերի բնակիչների հետ: