Ձեր վստահելի աղբյուրը

«Հայաստանում իշխանություն գոյություն չունի, իշխանությունը, որը կարող է որևէ հարց լուծել, բանակցել դաշնակից, թշնամու հետ»,- լրագրողների հետ զրույցում ասաց ռեժիսոր Մհեր Մկրտչյանը, որը մի շարք մշակույթի գործիչների, մտավորականների, քաղաքացիների հետ միասին մասնակցում է միաբանության երթին դեպի ՀՀ-ում ՌԴ դեսպանություն՝ նամակ հանձնելու գերիների վերադարձի, անհետ կորած զինծառայողների հարցով։

Նշենք, որ հենց Մհեր Մկրտչյանի, դերասան Հրանտ Թոխատյանի, կինոպրոդյուսեր Արմեն Գրիգորյանի նախաձեռնությամբ է կազմակերպվել միաբանության երթը։  Նպատակն է աջակցել անհետ կորած, գերեվարված զինծառայողների հարազատներին և հասարակության ձայնը հասցնել միջազգային բոլոր հեղինակավոր կառույցներին:

Հրանտ Թոխատյանը չկարողացավ ասել, թե գերիների վերադարձի հարցին որքանով կօգնի իրենց այս ակցիան. «Որքանով կհասնենք արդյունքի, չգիտեմ, բոլորիս ցանկությունն է, որպեսզի հասնենք արդյունքի։ Մենք այսօր անում ենք այն, ինչը գտել ենք ամենագործնականը»։

Նրա խոսքով, հրաշք կլինի, եթե հասարակությունը գոնե այս հարցի շուրջ համախմբի, քանի որ հրատապ, կարևոր հարց է։

Նամակը դեսպանատուն հանձնելուց հետո՝ Հ. Թոխատյանը հույս հայտնեց, որ այն կընթերցվի, կստանան պատասխան, որի մասին անպայման կտեղեկացնեն։

«Պետք է շարունակել գնալ մյուս դեսպանատները, մանավանդ Մինսկի խմբի համանախագահող երկրների, այսօր Ռուսաստանն էր, կլինի նաև ԱՄՆ-ը և Ֆրանսիան, նաև կանցնենք այն միջազգային կազմակերպությունները, որոնք կոչված են զբաղվել այս հարցով»,- նշեց դերասանը։

Նր գնահատմամբ, շատ լավ աշխատանք է տանում ՀՀ ՄԻՊ-ը և ՄԻԵԴ-ում ՀՀ ներկայացուցիչը, փորձում են իրենց քայլերը համապատասխանեցնել նրանց հետ, որպեսզի հանկարծ չանեն մի բան, որը հանկարծ կաշխատի ի վնաս մեր տղաների, ում համար իրենք փորձում են պայքարել։

Հ.Թոխատյանը հայտնեց, որ ակցիան այսօր կավարտվի, իսկ վաղվա համար կմտածեն և կասեն։

«Խնդրում եմ չքաղաքականացնել այս ամենը, դրա նապատակը չկա։ Բնականաբար, հարթակը բաց է, կարող են բարձրանալ մեր բոլոր գործընկերները, բայց մեզանից յուրաքանչյուրն ունի իր մտածելակերպը։ Այսօր որևէ նշանակություն չունի, գոնե այս ակցիայի համար, միայն նշանակություն ունի այն հարցը, որի շուրջ մենք հավաքվել ենք։ Եթե որևէ մեկը փորձում է դրանից շեղել, այս ամենին տալ ինչ-որ քաղաքական կոնտեքստ, դա պարզապես հիմարություն է և տվյալ դեպքում՝ թշնամություն ուղղակի»,-ասաց  Հրանտ Թոխատյանը։

Պրոդյուսեր Արմեն Գրիգորյանը նշեց, որ երթերն անհրաժեշտ են ցույց տալու, որ չեն հանգստանալու, տղաներին հետ են բերելու։

«Այս ֆոնի վրա, ով որ պետք է, զբաղվում է ավելի կոնկրետ աշխատանքներով։ Հիմա այսպես է վիճակը, կառավարությունը չի զբաղվում, զբաղվում ենք ուրիշ տեղերով։

Մենք այդքան նայիվ չենք, որ մտածենք, որ եթե երթ անենք, ադրբեջանցիները կհուզվեն և մեր տղաներին հետ կբերեն։ Այս երթերը անհրաժեշտ են նրա համար, որ դեսպանատներին ցույց տանք, որ մենք չենք հանգստանալու և մեր տղաներին հետ ենք բերելու»,- նշեց նա։

Երթի մասնակից երգիչ Արսեն Գրիգորյանն ասաց, որ  եթե այսօր գերիների, անհետ կորածների ծնողները բողոքում են, փորձում են միջամտել, իրենք էլ նման երթեր են կազմակերպում ու կոչով դիմում, նշանակում է՝ իշխանության կողմից գործ չի արվել կամ լիարժեք չի արվել։

«Լիարժեք կլիներ, եթե բոլոր գերիներին մինչև տարածքներ հանձնելը հետ բերած լինեինք։ Այն տարածքները, որոնք ընդհանրապես թուրքը ոտք չէր դրել, միգուցե մենք պահեինք, օրինակ, Քարվաճառը, գերիների փոխանակումը լիներ, նոր այդ գործով զբաղվեինք։ Մենք որևէ քաղաքական բան չունենք, սա մարդկային է, մեր ազգի լավագույն զավակներն այսօր թուրքերի ձեռքում են և ինչերի՞ են ենթարկվում։ Ուզում ենք, որ օր առաջ հետ գան, հետ բերենք իրենց,  տիրություն անենք իրենց, ինչպես իրենք փորձեցին տիրություն արեցին մեզ բոլորիս»,- նշեց երգիչը։