Ձեր վստահելի աղբյուրը

Ազատության հրապարակից մեկնարկեց միաբանության երթը։ Այն կազմակերպում է դերասան Հրանտ Թոխատյանը, կինոպրոդյուսեր Արմեն Գրիգորյանն ու ռեժիսոր Մհեր Մկրտչյանը։ Նպատակն է աջակցել անհետ կորած, գերեվարված զինվորների և զինծառայողների հարազատներին և հասարակության ձայնը հասցնել միջազգային բոլոր հեղինակավոր կառույցներին, նպաստել գերիների օր առաջ վերադարձին:

Դերասան Հրանտ Թոխատյանը հայտնեց, որ այսօր գնալու են ՀՀ-ում Ռուսաստանի դեսպանություն՝ հանձնելու նամակ։ Առաջինն ընտրել են հենց այդ երկրի դեսպանությունը, քանի որ, նրա խոսքով, Ռուսաստանն է, որ այս գործընթացում մասնակցություն է ունեցել և ունենում է։ 

Նա հայտնեց, որ միաբանության երթի մասնակիցները կարող են իրենց ձեռքում պահել միայն պատերազմի ընթացքում զոհված զինծառայողների նկարները։

Պրոդյուսեր Ռուբեն Մխիթարյանը վստահություն հայտնեց, որ եթե նոյեմբերի 10-ից հետո պետական պատկան մարմիններից տեսնեին հստակ գործողություններց, իրենց այդ մարմինների դռներն էլ կգնային, կաջակցեին հենց այդ մարմիններին։ 

«Պատերազմի դադարից հետո անցել է ժամանակ։ Մենք այս ճանապարհով ենք գնում՝ հասկացնելով միջազգային կառույցներին, որ այս խնդրում ծնողները միայնակ չեն մնացել։ Այդ տղաները բոլորիս համար են կռվել»,- նշեց նա։ 

Նրա խոսքով, արդեն կա ստորագրված հայտարարություն, արդեն մտել է  գործողության մեջ, արդեն տարածքներ են հանձնվում։ 

«Ամբողջ խնդիրն այն է, որ  տարածքը տալիս ենք, գոնե մեր երեխեքին հետ տա»,- ասաց Ռ.Մխիթարյանը։ 

Նա նշեց, որ իրենք նպատակ ունեն ամեն օր գնալ մի դեսպանություն, հանձնել նամակ, հորդորել իրենց ազդեցությունն օգտագործել, որպեսզի  Ադրբեջանից կարողանան հայ տղաներին օր առաջ վերադարձնեն՝ զոհված կամ ողջ։