Ձեր վստահելի աղբյուրը

Մեկ օրում  ռուս խաղաղապահների  հետ համագործակցության արդյունքում Հայաստանի տարածքից Լեռնային Ղարաբաղ է վերադարձել 2 431 մարդ։ Այսօր նման տվյալներ է հրապարակել ՌԴ պաշտպանության նախարարությունը։

Ըստ աղբյուրի, նոյեմբերի 14-ից մինչ օրս իրենց նախկին բնակավայրեր են վերադարձել 23 514 փախստականներ։

«Ռուս խաղաղապահներն աջակցություն են ցուցաբերում Ստեփանակերտի թիվ 8 դպրոցում ուսումնական գործընթացի մեկնարկի ուղղությամբ։ Այս օրվա դրությամբ վերականգնված են էլեկտրամատակարարումն ու ջեռուցումը, փոխված են կոտրված ապակիների 90 տոկոսը։ Դպրոցների բացումը նախատեսված է դեկտեմբերի 2-ին»,-ասված է հաղորդագրության մեջ։

Նշվում է, որ խաղաղապահները շարունակում են Լեռնային Ղարաբաղի տարածքներում ականազերծման աշխատանքները։  Ընդհանուր առմամբ ականազերծվել է 24.67 հա տարածք, 8.2 կմ ճանապարհ, 83 բնակելի շինություն, 3 սոցիալական նշանակության օբյեկտ, հայտնաբերվել ու վնասազերծվել է 766 պայթուցիկ առարկա։

«ՌԴ խաղաղապահ ուժերի ու ԿԽՄԿ-ի համակարգմամբ շարունակվում դիերի որոնումներն ու  հայկական և ադրբեջանական կողմերի միջև դրանց փոխանակումը»,-նշված է հաղորդագրության մեջ։