Ձեր վստահելի աղբյուրը

Եվրոպայի խորհրդի Նախարարների կոմիտեն դեկտեմբերի 1-ից 3-ը հանդիպումներ կանցկացնի, որոնցում քննարկվում են Մարդու իրավունքների եվրոպական դատարանի (ՄԻԵԴ) վճիռների և որոշումների կատարումն անդամ երկրների կողմից։

Նախարարների կոմիտեի օրակարգում է, ի թիվս այլ գործերի, «Չիրագովն ու այլոք ընդդեմ Հայաստանի»,  «Սարգսյանն ընդդեմ Ադրբեջանի» ՄԻԵԴ վճիռները։

Հիշեցնենք,  որ «Չիրագովն ու այլոք ընդդեմ Հայաստանի» գործը վերաբերում է ադրբեջանցի 6 փախստականների, ովքեր, ինչպես նշում է ՄԻԵԴ-ը, չեն կարողացել վերադառնալ Լաչինում գտնվող իրենց սեփականությունները, որտեղից ստիպված են եղել փախչել 1992թ․-ին Լեռնային Ղարաբաղի հակամարտության ժամանակ։ «Չիրագովն ու այլոք ընդդեմ Հայաստանի» գործով ՄԻԵԴ-ը գտել էր, որ տեղի է ունեցել Մարդու իրավունքների եվրոպական կոնվենցիայի 1-ին արձանագրության 1-ին հոդվածի (սեփականության պահպանում), 8-րդ հոդվածի (սեփականության, անձնական ու ընտանեկան կյանքի հարգման իրավունք), 13-րդ հոդվածի (իրավական պաշտպանության արդյունավետ միջոցի իրավունք) խախտումներ։

Երկրորդ՝  «Սարգսյանն ընդդեմ Ադրբեջանի», գործը վերաբերում է հայ փախստականին, ով ստիպված է եղել հեռանալ Ադրբեջանի Շահումյանի շրջանում գտնվող իր սեփականությունից 1992թ․-ին Լեռնային Ղարաբաղի հակամարտության ժամանակ ու նրան մշտապես մերժել են իր գյուղ վերադառնալու ու իր սեփականությունն օգտագործելու իրավունքը։ Այս գործով ևս ՄԻԵԴ-ն արձանագրել է Կոնվենցիայի 1-ին, 8-րդ և 13-րդ հոդվածքների խախտում։

Հանդիպման ընթացքում Նախարարների կոմիտեի կողմից ընդունված որոշումները կհրապարակվեն դեկտեմբերի 4-ին:

Լեռնային Ղարաբաղում պատերազմից ու իրավիճակի փոփոխությունից հետո, թե ինչպիսի որոշումներ կարող են կայացվել Նախարարների կոմիտեի կողմից, մնում է սպասել։

Նշենք, որ Մարդու իրավունքների եվրոպական կոնվենցիայի 46-րդ հոդվածի համաձայն, Մարդու իրավունքների եվրոպական դատարանի վճիռները պարտադիր են կատարման շահագրգիռ պետությունների կողմից: Նախարարների կոմիտեն վերահսկում է վճիռների կատարումը։