Ձեր վստահելի աղբյուրը

«Մեզ պետք է լեգիտիմ, չպարտված բանակցող, որը կկարողանա խնդիրները բարձրաձայնել, բայց, կարծում եմ, գերիների վերադարձը չի կարելի կապել իշխանափոխության հետ»,- այսօր խորհրդարանում լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը։

Ըստ պատգամավորի, գերիների վերադարձի գործում մեծ դեր ունի ՌԴ-ն, քանի որ վերջինիս միջնորդությամբ է եղել հայտարարության ստորագրումը, և այս պահին հենց ՌԴ-ն է հետևում, թե որ կետը որ պահին կիրականացվի.

«Ռուսական զորքն է հետևում ժամկետներին, հայ և ադրբեջանական զորքերի տեղակայմանը, և ես պահանջով դիմել եմ ՌԴ նախագահին, որ գերիների հարցին ևս անդրադարձ լինի։ Մենք լուրեր ունեինք, որ հաղթական շքերթի ժամանակ Ադրբեջանը կարող է մեր գերիներին և մեզնից վերցված տեխնիկան ցուցադրել, ուստի ես ներկայացրել եմ նաև, որ գերիների ցուցադրումն արգելված է Ժնևյան կոնվենցիայով։ Իսկ Ադրբեջանը հանդիսանում է այդ կոնվենցիայի կողմ։ ՄԱԿ-ից և ԿԽՄԿ-ից արդեն որոշակի ուղերձներ են գնացել Ադրբեջան, որ իրենք իրավունք չունեն գերիներին ցուցադրելու»,- ներկայացրեց պատգամավորը։

Էդմոն Մարուքյանի խոսքով, իրենք դիմել են նաև Խոշտանգումների կանխարգելման կոմիտեին, և պահանջել, որ վերջինս չպլանավորված այց իրականացնի ադրբեջանական բանտեր. դա կօգնի  տեղեկություն ստանալ բանտերում պահվող հայ ռազմագերիների և քաղաքացիական անձանց մասին, ինչպես նաև փրկել նրանց կյանքերը։ Բացի այդ, պատգամավորի խոսքով, այդ չպլանավորված այցի արդյունքում պարզ կդառնա՝ քանի հայ գերի կա ադրբեջանական բանտերում.

«Ամենօրյա ռեժիմով նաև այլ քայլեր ենք անում. օրինակ, առաջարկել ենք, որ եռակողմ հանձնաժողով ստեղծվի՝ Հայաստանի, Ադրբեջանի և Ռուսաստանի մասնակցությամբ, որպեսզի ադրբեջանական ներկայացուցիչը ռուս ներկայացուցչի հետ կարողանա գալ մեր բանտեր և տեսնել՝ իրենց գերիները ոնց են, իսկ հայ ներկայացուցիչը ռուս ներկայացուցչի ուղեկցությամբ կարողանա գնալ արբեջանական բանտեր և տեսնել՝ գերիներն ուր են, ոնց են, քանիսն են»։

Դիտարկմանը, որ եթե տարածքները հանձնելու վերաբերյալ հստակ ամսաթվեր են նշվում, ապա գերիների փոխանակման առումով որևէ հստակ ամսաթիվ չկա ստորագրված հայտարարությունում,  Էդմոն Մարուքյանն արձագանքեց՝ դա բացթողում է։

«Բայց դա չի նշանակում, որ կարելի է ռազմագերիներին անորոշ ժամանակով պահել։ Վերջին հաշվով փոխանակման կետը կա, հիմա դա պետք է իրացնել։ Մենք ՌԴ-ից պահանջում ենք, որ որպես այս հայտարարության երաշխավոր, նա պահանջի գերիների փոխանակման իրականացում։ Կարծում եմ՝ այդ առումով քայլեր արվելու են»,- շեշտեց նա։

Հարցին, թե արդյոք Կառավարության քայլերը բավարար են, հաշվի առնելով հանգամանքը, որ անհայտ կորած կամ գերեվարված զինծառայողների ծնողները շարունակում են ակցիաները, ընդդիմադիր պատգամավորը պատախանեց՝ Կառավարությունն այսօր էլ կարող է քայլեր անել.

«Բայց ես չեմ տեսնում՝ այդ քայլերն իրականացվում են, թե՝ ոչ, քանի որ այդ մասով հրապարակային որևէ բան չկա, և մեր զինվորների հարազատներն ուղղակի անորոշությունից գժվում են, չգիտեն՝ ինչ անել, դրա համար գնում են Կառավարության մոտ, հետո ՌԴ դեսպանատուն, հետո՝ ԿԽՄԿ..., դա պարզ է։ Քանի որ այդ մարդկանց անորոշության մեջ են պահում և չեն ասում՝ ինչ քայլեր են ձեռնարկվում, մարդիկ այդ վիճակից դուրս չեն գալու։ Հայկական կողմն իր ստանձնած պարտավորությունները ճշգրիտ կատարում է, հիմա մնում է մյուս կողմից նույն քայլը սպասել։ Մենք նաև չգիտենք՝ Ադրբեջանն ինչ է ասում՝ գերիներին տալի՞ս է, չի՞ տալիս, տասը օրի՞ց է տալիս, քանի՞ գերի կա...։ Այս առումով արագ քայլեր են պետք»։