Ձեր վստահելի աղբյուրը

Անհետ կորած զինծառայողների ծնողները Էջմիածնում զորամասի մոտ ակցիա անելուց, Երևանում ՌԴ դեսպանությանը նամակ հանձնելուց հետո հավաքվեցին պաշտպանության նախարարության դիմաց: Նրանք պահանջում են հանդիպում պաշտպանության նախարար Վաղարշակ Հարությունյանի հետ:

Նրանց ներկայացմամբ, 34 զինծառայող Զանգելանի շրջանում թշնամու կողմից շրջափակման մեջ են ընկել:

«Թեկուզ դիակ բերեք, դիակ տվեք, մեր տուն տանենք: Որ իրենց տղերքից մեկի վզից բռնեինք, տանեինք թուրքի հողում գլխից խփեինք, ասելու էին՝ մեր տղեն այնտեղ է, պետք է դիակը բերենք, բայց մենք եթե հնարավորություն չունենք,  ուրեմն պետք է մնան այնտե՞ղ: Համ ընդունում են, որ գերիներ կան, անտառներում կորածներ կան, բայց հազար պատճառ են բերում, որ չեն կարող փնտրել ու գտնել՝ թշնամին է այնտեղ, նենգ են, Ռուսաստանը խաղաղապահ չունի այդտեղ»,- ասում են անհետ կորածների հարազատները:

Նրանք ընդգծում են՝ հիմա իրենց ոչ մի լուծում չեն տալիս, ասում են՝ չեն կարող:

Այն դիտարկմանը, թե կառավարությունում վարչապետի օգնական Նաիրի Սարգսյանը խնդրի լուծման երկու տարբերակ է առաջարկել՝ կամ դիմել ՌԴ-ին, կամ պետք է պատերազմել, ծնողներից մեկն արձագանքեցին.

«Այդ հարցը մեզ տուպիկի առաջ է կանգնեցնում, որ չիմանանք՝ ինչ խոսենք: Մենք չէինք ուզում դիմել ռուսին, քանի որ ունենք կառավարություն, պետականություն: Բայց այսօրվա օրով մեր ղեկավարությունն ասում է՝ գնացեք, դիմեք ռուսին: Պետությո՞ւն ենք»։

Անհետ կորած զինծառայողներից մեկի եղբայրն էլ ասաց. «Տարել են ու անկազմակերպվածության, բարդակի պատճառով մեր տղերքին կոտորել են, կեսն ընկել է շրջափակման մեջ, կեսը գերի, 10-ի դեմ ելել է 100 հոգի: Ոչ զրահաբաճկոն են ունեցել, ոչ նորմալ ուղեկցող, ոչ նորմալ տվյալներ, ոչ նորմալ ռացիա: Իրենց ասել են՝ այնտեղ 30 հոգի են, դիմավորել են 400 հոգի լավ տեխնիկայով»:

Ակցիայի ժամանակ մասնակիցները նշեցին, որ ՊՆ-ից իրենց հայտնել են՝ 4 հոգու կարող են ընդունել, սակայն ծնողները դեմ են, նշելով՝ իրենք այդքանով հասել են այստեղ, թող որևէ մեկը դուրս գա ու իրենց հարցերին պատասխանի: 

«Լավ, ես չեմ հասկանում՝ չորս հոգու ներս հրավիրելը ո՞րն է։ Ախր կռիվը սկսելու ժամանակ մենք տե՞նց ենք վարվել մեր պետության հետ, մեր գեներալների ու հրամանատարության հետ։ Այդ դասալքությունը հենց այտեղից է սկսել, անկազմակերպ լինելուց: Ով հասկացել է, որ վիճակը սենց է, թողել, փախել է։ Հիմա էլ հեռուստաընկերություններով ասում են՝ դասալքություն է եղել։ Խի էս ազգը էդ ազգն է եղել, որ դասալքության գնա, էս ազգից թասիբով ազգ կա՞։ Էս ազգին մի քիչ դուխ տային, հնարավորություն տային, հասկանար ազգը, որ գլխներին կա հրամանատար, Բաքու էլ չէ, Աֆրիկա էլ կհասներ էս ազգը։

Բայց բոլորիս կոտրեցին, սկզբից ասեցին կարիք չկա, հետո ասեցին ձեր կարիքը լինի կկանչենք, լիքը մարդ գնացել է, հետ են ուղարկել զինկոմիսարիատներից։ Այ հենց այսպես առավոտ արթացանք, տեսանք, որ կրվել ենք։

Ես տունը նստած եմ եղել, 27 տարեկան եմ, ինչի ինձ թուղթ չի եկել, վզիցս չեն բռնել, տարել այնտեղ, թե տղերքի կողքը կանգնի: Ախպորս, որ հիմա անհետ կորած է, զանգում, ասում էի գալիս եմ, ասում էր՝ կամավոր չգաս, որովհետև բարդակ է կամավորների վիճակը, մինչև թուղթ չգա, չգաս»,- ասաց անհետ կորած զինծառայողներից մեկի եղբայրը։

Զինծառայողների ծնողները նշում են, որ սա 4 հոգու ցավ չէ, այլ 34  ծնողի, որոնց որդիներն այսօր չկան:

«Մենք եկել ենք այստեղ ու մեր երեխաներին ենք ուզում՝ մեռած, կենդանի: Պատկերացնում ենք՝ ինչ վիճակում ենք:  Չգիտեմ՝ իմ երեխեն գերի է, մահացած է, անտառում է, տկլոր է, սոված է, ի՞նչ է: Հասկանում եմ՝ գնացել է հայրենիքը պաշտպանելու, բա իրենք չեն մտածո՞ւմ, որ հային պահողին պետք է տեր կանգնեն: Ասում են՝ գեներալն է հրաման տվել: Ինչո՞ւ է գեներալը նման հրաման տվել, ինչո՞ւ է տարել այնտեղ, որտեղ արդեն թուրքն էր, թուրքը վերցրել էր:  

42 օր մեզ խաբում են անընդհատ: Ուզում եմ մեզ ճիշտ պատասխան տան, սկսեն որոնողական աշխատանքներ ու հանեն մեր երեխաներին»,- նշեց անհետ կորածի մայրը:

Մեկ այլ ծնող դիմեց Աննա Հակոբյանին. «Թող Աննա Հակոբյանը գա՝ որպես կին, որպես մայր, ոնց որ ինքն էր ասում, մեր դեմ կանգնի ու մեր պատասխանը տա: Ո՞ւր ա էդ Աննա Հակոբյանը, թող գա, ես իրեն սպասում եմ»:

«Մարդ պետք է լինի, մարդկություն պետք է ունենա»,- արձագանքեց մեկ այլ ծնող:

Մի քանի ծնող կարողացան Պաշտպանության նախարարության շենք մտնել: Նրանց փոխանցեցին, որ զբաղվում են խնդրով, առաջիկա  օրերի ընթացքում կպատասխանեն: Ծնողներն ասացին, որ այսօր դադարեցնում են ակցիան, կսպասեն պատասխանի: