Ձեր վստահելի աղբյուրը

Քաղաքական գործիչ, ԱԺ նախկին պատգամավոր Աղվան Վարդանյանը վեցամսյա լռությունից հետո որոշել է հանրությանը խորհելու առիթ տալ՝ հնչեցնելով «13 հարց և բացահայտում»։ Ասուլիսի մեկնարկին նա նշեց, որ Նիկոլ Փաշինյանի իշխանության ողբերգական հետևանքների մասին բազմից խոսելու առիթ ունեցել է։ Այնուհետև քաղաքական գործիչը ներկայացրեց իրեն հետաքրքրող հարցերը։

«Առաջին՝ արդյո՞ք 2019 թվականին արաբական մի երկրում չեն հանդիպել Հայաստանի և Ադրբեջանի երկու բարձրաստիճան պաշտոնյաներ։ Արդյո՞ք Ադրբեջանի ներկայացուցիչը Հայաստանի ներկայացուցչին չի փոխանցել թուղթ, որի վրա աստղաբաշխական գումար է նշված եղել՝ որպես առաջարկ Արցախի հարցը հօգուտ Ադրբեջանի լուծելու։ Եվ երբ մեր պաշտոնյան բորբոքվել է, թե այս ինչ առաջարկ է, դիմացինը շատ կիրթ ասել է՝ մի բորբոքվիր, քեզնից ընդամենը պահանջվում է սա փոխանցել ձեր երկրի ղեկավարին։

Եվ արդյո՞ք, երբ հայ պաշտոնյան երկրի ղեկավարին նույնքան բորբոքված ասել է՝ տես, թե այդ անասուններն ինչ են առաջարկում, մեր երկրի ղեկավարը չի ասել՝ դու հուզական մարդ ես, մի խառնվիր, ուրիշը կզբաղվի»։

Երկրորդ հարցը, որ հնչեցրեց Աղվան Վարդանյանը, վերաբերում էր Նիկոլ Փաշինյանի՝ Ռուսաստանի դեմ արված քայլերին։

«Արդյո՞ք ընտանեկան սուրճի սեղանի շուրջ Նիկոլին չեն ասել մի արա, Ռուսաստանի դեմ քո քայլերը, բանակցությունների ձախողումը հանգեցնելու են պատերազմի։ Իսկ եթե պատերազմ եղավ, հազարավոր զոհեր ենք ունենալու։ Արդյո՞ք նրա կինը չի միջամտել՝ ասելով՝ ի՞նչ է եղել, թող մի 5000 հոգի էլ զոհվի, բա ուզում են հողերը պահել, չե՞ն  ուզում զոհվել»,- ներկայացրեց քաղաքական գործիչը։

Աղվան Վարդանյանին հետաքրքրող երրորդ հարցը հետևյալն է՝ արդյո՞ք 2019 թվականի առաջին կեսին Նիկոլ Փաշինյանը հերթական «հիստերիկ նոպայի» մեջ ասել է՝ Ռուսաստանը, մեր ԱԱԾ-ն և Արցախի ղեկավարությունն իմ դեմ դավադրություն են պատրաստում։

«Չորրորդ. արդյո՞ք 2019 թվականի երկրորդ կեսին, երբ ՌԴ նախագահը շնորհավորել է ՀՀ երկրորդ նախագահի տարեդարձը, դարձյալ հերթական նոպայի մեջ Նիկոլը չի ցանկացել լայվ մտնել ու հայտարարել, որ Հայաստանը դուրս է գալիս ՀԱՊԿ-ից։ Արդյո՞ք մեծ դժվարությամբ են նրան համոզել, որ չանի։

Հինգերորդ. հաշվե՞լ եք՝ վերջին մեկ ամսում Նիկոլը քանի անգամ է զանգել Պուտինին։ Երևի երեսո՞ւն։ Արդյո՞ք մինչև պատերազմը եթե երեք անգամ, առանց կուլիսային խաղերի, զանգեր, դեպքերը այլ զարգացում չէին ունենա։  Հիշեցում՝ մեկ տարուց ավելի Նիկոլը չի կարողացել հանդիպել ՌԴ նախագահին։ Մտածեք՝ ինչո՞ւ չի կարողացել»,- նշեց քաղաքական գործիչը։

Աղվան Վարդանյանի հնչեցրած վեցերորդ հարցում բարձրացվում է պատերազմի անսպասելի չլինելու հարցը, և այդ համատեքստում պաշտպանության նախարարի Հայաստանում չլինելու խնդիրը.

«Նիկոլը հայտարարել է, որ պատերազմն անսպասելի չէր։ Միայն ժամը և գլխավոր ուղղությունը հստակ չգիտեինք։ Այդ դեպքում ինչո՞ւ պաշտպանության նախարարը Հայաստանում չէր և վերադարձավ միայն սեպտեմբերի 28-ի երեկոյան։ Ի՞նչ է, առանց Նիկոլի իմացությա՞ն էր այլ երկրում։ Ինչո՞ւ էր պատերազմից մեկ օր առաջ Հայաստանի ԱԱԾ-ն ծանուցագիր ուղարկել Վիտալի Բալասանյանին, և եթե գար, կալանավորելու էին։ Ինչո՞ւ էին Արցախի պաշտպանական շրջանների հրամանատարները վերջին ամիսներին փոխարինվում անփորձ զինվորականներով։ Ինչո՞ւ արցախյան առաջին, ապրիլյան պատերազմի հաղթողները մեկուսացվեցին ռազմական գործողություններից։

Յոթերորդ. այս ամենի ֆոնին, պատերազմի գրեթե ամբողջ ընթացքում, ի՞նչ էր անում վարչապետի կինն Արցախում։ Նա Գորիսում թաքնվեց միայն այն ժամանակ, երբ ամեն բան խայտառակ ավարտ էր ունեցել։ Գեներալները հրամանատարական կետում նրա բարոյական աջակցության, ոգեշնչման կարի՞քն ունեին, թե՞ պետք էր հետևել, ուղղորդել գծված սցենարի»։

Հնչեցնելով ութերորդ հարցը՝ Աղվան Վարդանյանը նշեց՝ երբ հուլիսյան սահմանային միջադեպը Նիկոլը վերածում էր հերոսամարտի, ասում էր՝ ջախջախել ենք Ադրբեջանին, աջուձախ շքանշաններ էր բաժանում, նվաստացնում էր Ալիևին, չէ՞ր մոտեցնում, արդյո՞ք, պատերազմը։ Նա հետաքրքրվեց՝ հիմա ո՞վ է ում նվաստացնում, ծաղրում, ստորացնում։ Արդյո՞ք որևէ մեկը կարող է հոդաբաշխ բացատրել՝ ինչո՞ւ Նիկոլը չի համարձակվում կես  բառ հակադարձել Ալիևին։ Ինչի՞ց է վախենում։

«Իններորդ. արդյո՞ք ռազմական դրությամբ, խոսքի, մամուլի ազատությունը, կարծիք արտահայտելու իրավունքը սահմանափակելը, սուտ հաղթական տեղեկատվությամբ մարդկանց խաբելը հանրության դիմադրությունը չեզոքացնելու, պարտությունը լիարժեք դարձնելու նպատակ չուներ։

Տասներորդ. 2020թ. մարտի սկզբին Նիկոլը այցելեց Վրաստան։ Արդյո՞ք միակ և անձնական խնդրանքը հարևան երկրի ղեկավարությունից, համարձակության համար բավական խմելուց հետո, եղել է հայկական սիգարետների ազատ տարանցումն ապահովելը»,- ասաց նա։

Քաղաքական գործչի հնչեցրած տասնմեկերորդ հարցը հետևյալն է՝ արդյո՞ք պատերազմի առաջին օրերին ՀՀ-ի անունից, իբրև պաշտոնական բանակցող, Իրանի Իսլամական Հանրապետություն է գործուղվել մի շատ հայտնի խոշոր սեփականատեր։

«Տասներկուերորդ. վերջին ելույթում Նիկոլը հպարտ քաղաքացիներին ասում է՝ մի վախեցեք։ Մի վախեցեք ասում է ամենավերջին վախկոտը։ Նայեք՝ քանի թիկնապահով է շրջապատված, քանի շարք ոստիկան է կառավարության առաջ, իր կեցավայրի շուրջ։ Իբրև իր վերջին հենարան՝ ինչ խաժամուժ է հավաքել կառավարական ամառանոցի տարածքում։

Եվ տասներեքերորդ. արդյո՞ք 2019-ի ամռան այն օրը, երբ Ռ.Քոչարյանին դատարանը ազատ արձակեց, Նիկոլը վախից կուչ է եկել ամառանոցի սենյակներից մեկում ու դողդողացել։ Արդյո՞ք մեծ դժվարությամբ  են նրան դուրս բերել ընկճախտից։ Արդյո՞ք նա այդպես ամբողջ գիշեր դողդողացել է նաև տարիներ առաջ Կոշի կալանավայրում՝ կին փաստաբանի ձեռքը բռնած։ Արդյո՞ք այդ նույն օրերին, երբ ամառանոցի դիմացի լանջին խոտերը հրդեհվել են, Նիկոլը հիստերիայի մեջ աղաղակել է՝ գալիս է, գալիս է, սա Քոչարյանն է ազդանշան ուղարկում։ Եվ արդյո՞ք մինչև Ֆելիքս Ցոլակյանը չի զանգել, չի ասել, թե մենք ենք խոտերը վառել, կանխարգելիչ հրդեհ է, ամեն ինչ վերահսկողության տակ է, Նիկոլը չի հանգստացել։ Մի վախեցեք ասում է մեկը, ով մի շաբաթ բունկերից դուրս չէր գալիս։ Նախավարչապետական շրջանի վախկոտության բազմաթիվ դրվագներին չանդրադառնամ։ Եվ՝ փողի հանդեպ առանձնահատուկ սիրուն։ Արդյո՞ք սխալված կլինեմ, եթե ենթադրեմ, որ այս և այլ դրվագների տիրապետում են տարբեր երկրների համապատասխան մարմինները»,- ներկայացրեց Աղվան Վարդանյանը։

Ամփոփելով խոսքը՝ քաղաքական գործիչը նշեց՝ մի անգամ Նիկոլն ասել է՝ մեր ժողովրդին ես բոլորից լավ եմ ճանաչում։

«Եվ ճիշտ է, և սուտ։ Նիկոլը լավ է ճանաչում մեր ժողովրդի՝ առավելագույնը հինգ տոկոս կազմող հատվածին, որի մարմնավորումն է ինքը. անպատիվ, մարդատյաց, անսուրբ, անամոթ, խոստումնազանց, լկտի, սուտասան, բարոյազուրկ, դեմագոգ, սարսափելի վախկոտ ու սարսափելի փողասեր։ Այս տեսակը դեռ իշխանություն է Հայաստանում։ Այս տեսակը չի վերանալու։ Մեր խնդիրն է այս տեսակին օր առաջ հեռացնել իշխանությունից։ Մեր խնդիրն է պետական-հանրային կյանքում այս տեսակի ազդեցությունը ետայսու բացառելը»,- եզրափակեց խոսքը Աղվան Վարդանյանը։