Ձեր վստահելի աղբյուրը

Անհետ կորած զինծառայողների հարազատները Էջմիածնի զորամասի դիմաց ակցիայից հետո այժմ Երևանում են՝ Ռուսաստանի Դաշնության դեսպանության դիմաց: Նրանք  նամակ հանձնեցին ՌԴ դեսպանության ներկայացուցչին՝ խնդրելով օգնել իրենց երեխաներին գտնելու, վերադարձնելու հարցում:

Ծնողները նշում են, որ ևս մի քանի անգամ նամակ հանձնել են ՌԴ դեսպանություն, սակայն պատասխան չեն ստացել:

«Մենք այդ նամակներով խնդրում ենք գտնել մեր 34 երեխաներին»,- նշեց ծնողներից մեկը:

Նրանց ներկայացմամբ, զինծառայողները Զանգելանի շրջանում թշնամու կողմից շրջափակման մեջ են ընկել:

Դեսպանությունից հետո նրանք պատրաստվում են գնալ պաշտպանության նախարարություն՝ ակնկալելով հանդիպում նախարար Վաղարշակ Հարությունյանի հետ:

Ծնողներն արդեն հանդիպում ունեցել են Նիկոլ Փաշինյանի հետ, ով ասել է, որ այդ 5 շրջանները Ադրբեջանի հսկողության տակ են, ոչ մի ձև չեն կարողանում բանակցություններ վարել, մնում է օգնի երրորդ պետությունը:

Նրանք համոզված են, որ այս հարցը կարող է լուծել միայն Ռուսաստանը, այդ մասին նաև, ըստ հարազատների, Փաշինյանն է ասել:

«Արդեն 40 օր սպասում ենք, Հայաստանից ոչ մի օգնություն չկա: Սպասում ենք Ռուսաստանին, միակ հույսը դա է»,- ընդգծեց ծնողներից մեկը:

Ծնողներն ասացին, որ  տեսանյութեր են տեսել, այդ խմբից արդեն 6-7 հոգի գերեվարվել են: Կան ծնողներ, ովքեր ասում են՝ տեղեկություն ունեն, որ իրենց տղաները զոհվել են, նաև անտառներում թաքնվողներ կան: 

Ակցիայի մասնակիցներից մեկն ասաց, որ ինքը տեսել է ադրբեջանական տեսանյութերից մեկում գերեվարվածների մեջ իր եղբորը, ձեռքերը կապված, հրելով, խփելով տանում են:

«Գոնե երաշխիք լինի, որ նրանց կյանքին, առողջությանը վտանգ չի սպառնա: Մենք  միայն պահանջում ենք այն, ինչ եռակողմ հայտարարության մեջ նշված է»,- նշեց ակցիայի մասնակիցը: