Ձեր վստահելի աղբյուրը

Երևանի ընդհանուր իրավասության դատարանում, դատավոր Արթուր Մկրտչյանի նախագահությամբ, այսօր հետաձգվեց ՊԵԿ նախկին նախագահ, ՀՀ ֆինանսների նախկին նախարար Գագիկ Խաչատրյանի գործով դատական նիստը։ Դատական նիստին չէր ներկայացել Գագիկ Խաչատրյանն՝ առողջական վատ վիճակի պատճառով։

«Գագիկ Խաչատրյանը դատական նիստին չէր կարողացել ներկայանալ, քանի որ առողջական վիճակը թույլ չի տալիս, որ դատական նիստերին մասնակցի»,- լրագրողների հետ զրույցում ասաց պաշտպան Երեմ Սարգսյանը։

Ըստ նրա, այս մեկ տարվա ընթացքում պետական մարմիններն ամեն ինչ արեցին, որ միայն բացասական դինամիկա տեղի ունենա. «Այսինքն այն, որ բուժման, վիրահատության կարիք ուներ ու թույլ չէին տալիս, հասավ խնդիրը նրան, որ նույն դիրքում երկար նստելուց ուժեղ ցավեր են առաջանում, ինչն անհնարին է դարձնում նիստին մասնակցությունը»:

Ե. Սարգսյանի խոսքով, դատարանին են ներկայացրել բժշկական փաստաթուղթ, ազատ արձակվելուց հետո բժշկական կոնսիլիում էր տեղի ունեցել, որը ևս արձանագրել է  բացասական դինամիկան։

Պաշտպանը հայտնեց, որ դատարան միջնորդություն էին ներկայացրել՝ խնդրելով թույլ տալ Գագիկ Խաչատրյանին մեկնել Գերմանիա և բուժում ստանալ, սակայն դատարանը մերժել է միջնորդությունը. «Ինձ համար, ըստ էության պատճառներն անհասկանալի էին: Պատճառաբանություններն այնպիսին էին, որ Հայաստանում հնարավոր է պատշաճ բուժօգնություն ստանալ: Բայց մոռանում են, որ հենց պետությունն  առողջապահության նախարարի մակարդակով երկու բժշկական կոնսիլիում է անցկացրել, արձանագրել էին, որ Հայաստանում հնարավոր չէ այդ վիրահատությունը կատարել: Հիմա այսքանով հանդերձ ասել, որ Հայաստանում հնարավոր է պատշաճ բուժում ստանալ, հիմնավոր չէ»:

Ե. Սարգսյանն ասաց, որ Գագիկ Խաչատրյանը բուժում ստանում է տանը, քանի որ հաշվի առնելով ստեղծված իրավիճակը՝ կորոնավիրուս, պատերազմ, հնարավոր չէ բուժումն իրականացնել ստացիոնար։

«Բայց բոլոր բժիշկները պնդում են, որ այս հիվանդության միակ բուժումը վիրահատություն է, դրանից բացի ինչ արվում է, փորձում են փոքր-ինչ մեղմել վիճակը»,- նշեց պաշտպանը:

Ըստ Ե. Սարգսյանի, անձը պետք է վիրահատվի, որ կարողանա մասնակցել դատական նիստերին և եթե պետությունն այս միջոցները չի ձեռնարկում, նշանակում է, որ դիտավորյալ գործողություններ են կատարում, այդ թվում՝ խոշտանգման հետ կապված, որովհետև երբ անձն ունի սուր ցավեր և պետությունն այնպես է անում, որ ինքը պարտադրված այս ցավերը կրի, ավելի խորանան, դա նշանակում է խոշտանգում, վատ վերաբերմունք։

Նա հայտնեց, որ ՄԻԵԴ-ը բոլորովին վերջերս կրկին նամակ է ուղարկել ՀՀ կառավարություն և իրենց՝ հայտարարելով, որ, եթե կողմերն ընդհանուր հայտարարի չգան այդ հարցում, Եվրոպական դատարանը նախաձեռնելու է նաև խոշտանգման քննության վարույթ. պետությանը կոնկրետ հարցադրումներ է ներկայացնելու՝ խոշտանգում եղե՞լ է, թե՞ ոչ: 

«Ամեն անգամ, երբ դիմում էինք ներկայացնում ՄԻԵԴ, ՄԻԵԴ-ը պահանջում էր պարզաբանում, հրատապ կարգով փորձաքննություն էին կատարում հավանաբար իրենց ընտրած կոնկրետ փորձագետների մասնակցությամբ, որպեսզի հերքեն իրենց իսկ կողմից տրված կոնսիլիումը, որ բուժման կարիք չունի։ Այս մեթոդը ՄԻԵԴ-ում ևս կասկածի տեղիք է տվել, թե ինչպես է ստացվում, որ մինչև Եվրոպական դատարան դիմելը կոնսիլիում եք անում և գտնում եք, որ կա բժշկական միջամտության կարիք, Եվրոպական դատարանի հարցերից հետո անում եք փորձաքննություն և նշում եք, որ ընդամենը ցավազրկող պետք է խմի: Պետական մարմինները թույլ չեն տվել նույնիսկ կինեզոթերապիա ստանալ»,- մանրամասնեց պաշտպանը։

Հիշեցնենք, որ  Գագիկ Խաչատրյանը հոկտեմբերի 29-ին գրավի դիմաց ազատ է արձակվել։

Հարցին՝ արդյո՞ք Գագիկ Խաչատրյանի խափանման միջոցը փոխվել է ի կատարումն ՄԻԵԴ-ի որոշման, Ե.Սարգսյանը պատասխանեց, որ միանշանակ չի կարող ասել, թե կոնկրետ որ հանգամանքն է հաշվի առնվել:

«Իմ կարծիքով բոլոր հանգամանքները համակցության մեջ են գնահատվել, այդ թվում Եվրոպական դատարանի որոշումը։ Մի այլ բան է, թե կառավարության ներկայացուցիչներն ինչ են ասում ՄԻԵԴ-ի որոշման վերաբերյալ, բայց այս անգամ ՄԻԵԴ-ի կողմից շատ կոշտ նամակ էր և այն իրենից ենթադրում էր, որ խոշտանգման վարույթ է սկսվում։ Քննության առարկա են դառնալու նաև այն հանգամանքները, որ պետությունը խոչընդոտել է, որ անձն իր իրավունքներն իրացնի, այդ թվում Եվրոպական դատարանի մասով: Կարծում եմ՝ լավ էին հասկանում, որ եթե շարունակեր Գագիկ Խաչատրյանը կալանքի տակ մնալ, ավելի էին ամրապնդվելու խոշտանգման վարույթի հիմքերը։ Բայց, ինձ թվում է, ամբողջ համակցության մեջ է գնահատվել ու որոշումը կայացվել»,-նշեց պաշտպանը:

Գագիկ Խաչատրյանի գործով հաջորդ նիստը տեղի կունենա 2021 թվականի հունվարի 18-ին: