Ձեր վստահելի աղբյուրը

«Ազգային օրակարգ» կուսակցությունն ՀՀ գլխավոր դատախազության շենքի առջև է։  Կուսակցության անդամները պահանջում են քրեական գործ հարուցել վարչապետ Նիկոլ Փաշինյանի գործողությունների փաստերով և դադարեցնել քրեական գործերի անվան տակ քաղաքական հետապնդումները:

«Հետապնդե՛ք կապիտուլյացիա ստորագրած, հայրենիքի մի մասը հանձնած, դավաճան Փաշինյան Նիկոլին, և դադարե՛ք սպասարկել դավաճան իշխանախմբի շահերը և մասնակիցը դարձեք ազգային ազատագրական պայքարի»,- հորդորում են նրանք։

Կուսակցության անդամ Արա Հակոբյանի խոսքով, մենք պարտվել ենք պատերազմում, կորցրել են մեր հայրենիքը, ունենք մարդկային կորուստներ, անհետ կորածներ ու գերեվարվածներ, և այս ամենը, նրա խոսքով, իրականացվել է ՀՀ-ի գործող վարչապետի և նրա վարչախմբի մասնակցությամբ՝ պատերազմի կառավարման տապալմամբ։

«Այս պարագայում մենք ունենք իրավիճակ, որ ՀՀ դատախազությունը պետք է մի շարք գործեր հարուցեր, պետք է քրեական հետապնդումներ սկսեր, որպեսզի պարզաբանվեր, թե ինչպես եղավ, որ մենք այս պատերազմին անպատրաստ էինք, թե ինչպես մեր ունեցած զենքերը չկրակեցին, թե ինչպես եղավ, որ այն գեներալները, որոնք պետք է մասնակցեին պատերազմի կառավարմանը, տարբեր բունկերներից դուրս մղվեցին, թե ինչպես այդ բունկերներում հայտնվեցին մարդիկ, որոնք պետք է չլինեին այդտեղ։ Ո՞վ պետք է այս ամենի համար պատասխան տա։ Բայց ՀՀ դատախազությունը այս ամենի վերաբերյալ գործեր հարուցելու փոխարեն շարունակում է սպասարկել տապալված վարչախմբի շահերը, շարունակում է սպասարկել տապալված վարչապետին։ Մարդու, ով այս պարտությունը կերտեց, մարդու, ով առաջին պատասխանատուն է այս ամենի համար»,- նշեց նա։

Ըստ Արա Հակոբյանի, պետք է դատախազությունը վերջ տա ընդդիմադիրների հետապնդումներին, քանի որ վերջիններս պայքարում են այս ամենի դեմ.

«Դատախազությունը պետք է կատարի իր պարտականությունը՝ ծառայել ոչ թե գործող վարչախմբին, այլ՝ ՀՀ-ին, պետությանը»։