Ձեր վստահելի աղբյուրը

«Ընդդիմադիր 17 քաղաքական ուժերի կողմից ձևավորված «Հայրենիքի փրկության խորհուրդը» Վազգեն Մանուկյանի թեկնածությունն է առաջադրել վարչապետի պաշտոնում այն պարզ պատճառով, որ նա ունի փորձառություն, անցած ճանապարհ»,- լրագրողների հետ զրույցում ասաց «Հայրենիք» կուսակցության նախագահ Արթուր Վանեցյանը՝ պատասխանելով հարցին, թե ինչո՞ւ ձեր թեկնածությունը չառաջադրվեց վարչապետի պաշտոնում:

Վազգեն Մանուկյանը, նրա խոսքով, վարչապետ ընտրվելու դեպքում կասեցնելու է իր կուսակցական գործունեությունը, լինելու է ապակուսակցական վարչապետ, որոշակի ժամանակ անց պարտավորվելու է անցկացնել արտահերթ խորհրդարանական ընտրություններ, որին ինքը չի մասնակցելու, չի աջակցելու որևէ քաղաքական ուժի:

«Դա հիմնական այն պատճառներից էր, որը մեզ թույլ տվեց որոշում կայացնել ու առաջադրել նրա թեկնածությունը»,- նշեց Ա, Վանեցյանը:

Դիտարկմանը՝ այստեղից կարելի է եզրակացնել, որ ինքը մասնակցելու է արտահերթ ընտրություններին, դրա համար իր թեկնածությունը չի առաջադրվել, նա պատասխանեց. «Անպայման, մենք մասնակցելու ենք արտահերթ խորհրդարանական ընտրություններին, ինչպես բոլոր քաղաքական ուժերը ձգտելու ենք այդ ընտրություններին հավաքել մեծամասնություն»:

Նրա խոսքով, ընտրությունները լինելու են մեկ տարվա ընթացքում:

Հարցին՝ արդյո՞ք Վազգեն Մանուկյանը այն թեկնածուն է այս անցումային փուլում, որին ժողովուրդը կարող է վստահել՝ հաշվի առնելով նրա նկատմամբ հակասական  կարծիքները,  նախկինում էլ քննադատություն կար նրա նկատմամբ, Արթուր Վանեցյանը պատասխանեց.

«Անթերի մարդ աշխարհում չկա: Վազգեն Մանուկյանի վերաբերյալ կարծիքները, օրինակ, որը կմատնանշե՞ք: Նա ի՞նչ է՝ կոռուպցիոնե՞ր է, թալանչի՞ է, հայրենասե՞ր չէ, անգրագե՞տ է: Մի մարդ է, որը եղել է Հայաստանի երրորդ Հանրապետության առաջին վարչապետը, եղել է Ղարաբաղ կոմիտեի ղեկավարը, բանակաշինության մեջ ունեցել է ամենամեծ լուման: Պաշտպանության նախարար դառնելուց հետո մեր բանակը դարձել է կանոնավոր»:

Նա նաև ընդգծեց՝ Վ.Մանուկյանն իր անցած ճանապարհով, ունեցած փորձով կարող է նստել բանակցային սեղանի շուրջ, լուծել Հայաստանի առջև ծառացած դժվարագույն խնդիրները:

Արթուր Վանեցյանն ասաց, որ իրենք որևէ պարագայում չեն հայտարարել՝ եռակողմ հայտարարությունը չեղարկելու են, իսկ փոփոխությունների մասին առաջիկայում անպայման կխոսեն: Նշեց նաև, որ դեկտեմբերի 5-ի հանրահավաքի ժամանակ Վազգեն Մանուկյանը ելույթ կունենա ու կներկայացնի առաջիկա անելիքները:

Հարցին՝ մամուլում կային տեղեկություններ, որ Վազգեն Մանուկյանի թեկնածության շուրջ սլաքները Ռուսաստանից են եկել, Ա. Վանեցյանն ասաց. «Եկեք պայմանավորվենք, որ ներքին քաղաքական հարցերը լուծվում են բացառապես ներքին լսարանում ներքին քաղաքական ուժերի համաձայնությամբ: Այո, Ռուսաստանը մեր ռազմավարական կարևորագույն գործընկերն է, կարծում եմ՝ Հայաստանի ներքին հարցերը պետք է լուծեն Հայաստանի քաղաքացիներն ու Հայաստանի քաղաքական, հասարակական շրջանակները»:

Ա. Վանեցյանն ասաց, որ հանրության մեջ կա գրեթե 100 տոկոս կոնսենսուս, որ Նիկոլ Փաշինյանն այլևս ոչ մի տեսանկյունից իրավունք չունի զբաղեցնել ՀՀ վարչապետի պաշտոնը:

«Համոզված եմ, գիտեմ՝ այդ մոտեցումը կա խորհրդարանում: Միանշանակ առաջնային մանդատ ունեցող մարմինը՝ Ազգային ժողովը, պետք է ի վերջո նոր վարչապետի ընտրության հարցը լուծի:  Այսօր իրականում կա այդ պահանջը, որ նոր վարչապետ պետք է լինի, ուղղակի պետք է շարունակենք մեծացնել հանրային ճնշման մեխանիզմները, կարճ ժամանակահատվածում պատգամավորները դուրս կգան իրենց ներքին վախերից և կքվեարկեն ժողովրդի թեկնածուի օգտին»,- նշեց «Հայրենիք» կուսակցության ղեկավարը: 

Նա ընդգծեց, որ Նիկոլ Փաշինյանի՝ մեկ օր ավելի իշխանության ղեկին մնալը ազգային անվտանգության սպառնալիք է մեր երկրի, ժողովրդի համար:

«Մեր ժողովուրդը պետք է գիտակցի, որ այստեղ ոչ թե իշխանության համար պայքար է, ոչ թե քաղաքական պայքար է, այլ պայքար է հանուն հայրենիքի փրկության, բոլորը միահամուռ դուրս գան փողոց, իրենց վճռական խոսքն ասեն ու հեռացնեն ապազգային իշխանություններին: Դրանից հետո շատ արագ Ազգային ժողովը պետք է նախաձեռնի նոր վարչապետի ընտրություն և մեր երկիրը կարողանանք դնել զարգացման  ճիշտ ուղղու վրա»,- ասաց Ա.Վանեցյանը:

«Հայրենիք» կուսակցության նախագահը շեշտեց, որ Հայաստանում քաղաքական ճգնաժամը շատ խորն է, դրա լուծումն առաջիկայում կտրվի: