Ձեր վստահելի աղբյուրը

2020թ. հունվարի 1-ի դրությամբ ՀՀ մշտական բնակչության թվաքանակի ցուցանիշը կազմել է 2 959.7 հազար մարդ։ 2019թ. տարեսկզբի համեմատ այն նվազել է 5600 մարդով կամ 0.2%-ով:

Ազգային վիճակագրական կոմիտեի հրապարակած «Հայաստանի սոցիալական պատկերը և աղքատությունը, 2020» զեկույցի համաձայն, Հայաստանի մշտական բնակչության 47.2 %-ը կազմել են տղամարդիկ, իսկ 52.8%-ը` կանայք: 2020թ-ի տարեսկզբի դրությամբ բնակչության միջին տարիքը կազմել է 36.9 տարի, իսկ տղամարդկանց և կանանց համար, համապատասխանաբար՝ 34.8 և 38.8 տարի։

2019-ին հանրապետությունում գրանցվել է 36 հազար ծնունդ։ Այդ թիվը 600-ով քիչ է 2018-ին գրանցված ծնունդներից, 1700-ով՝ 2017-ին գրանցված ծնունդներից, 4600-ով՝ 2016-ին գրանցված ծնունդներից։

2019թ-ին նախորդ տարվա համեմատ հակառակ ծնունդների մահվան դեպքերն ավելացել են 1.7%-ով։ Ծննդյան և մահվան ցուցանիշների տարբերությունով ձևավորված բնակչության բնական հավելաճը 2019թ. կազմել է 9.8 հազար մարդ՝ 2018թ. 10.8 հազար մարդու համեմատ:

2019-ին մահվան պատճառ են հիմնականում դարձել արյան շրջանառության համակարգի հիվանդությունները և չարորակ նորագոյացությունները։ Դրանց հետևանքով մահերը կազմում են ընդհանուրի շուրջ երեք քառորդը: 2018-ի համեմատ ավելացել են շնչառական օրգանների, չարորակ նորագոյացությունների, արտաքին պատճառների, մարսողական օրգանների հիվանդություններով պայմանավորված մահվան դեպքերը:

2019թ. արձանագրվել է ամուսնության 15 561 և ամուսնալուծության 3 880 դեպք։ Համեմատության համար նշենք, որ 2018-ին գրանցվել է 14 822 ամուսնություն և 3 819 ամուսնալուծություն։

Ընդգծենք, որ այս ցուցանիշները վերաբերում են 2019-ին, երբ չկար կորոնավիրուսի համավարակը, ինչի հետևանքով հազարավոր մարդիկ մահացան, չկար պատերազմը, ինչի հետևանքով հազարավորները մահացան, հաշմանդամ դարձան։