Ձեր վստահելի աղբյուրը

«Ազգային օրակարգ» կուսակցության խորհրդի անդամ Վարազդատ Հարությունյանը նամակ-կոչ է հղել Փաստաբանների պալատի խորհրդի անդամներին՝ Նիկոլ Փաշինյանի հրաժարականի հարցով միավորվելու մասին։

«Ազգային օրակարգ» կուսակցության հանրային կապերի թիմի տարածած նամակ-կոչում ասված է.

«ՀՀ Փաստաբանների պալատի խորհրդին
Հարգելի՛ Խորհրդի անդամներ
Իմ խորին համոզմամբ՝

ա) 2020 թվականի սեպտեմբերի 27-ից հայկական երկու պետությունների դեմ սանձազերծված թուրք-ադրբեջանական ռազմական ոտնձգության ամբողջ ընթացքում ՀՀ գործադիր և օրենսդիր իշխանությունների կողմից պետական և պատերազմի բացարձակ ձախողակ կառավարումը,
բ) ՀՀ վարչապետ Նիկոլ Փաշինյանի կողմից նոյեմբերի 10-ին կնքված խայտառակ կապիտուլացիոն համաձայնագիրը, որով հայությունը զրկվեց իր հայրենքի մի մասից,
գ) նույն այդ իշխանությունների կողմից շարունակվող ներհայկական պառակտումների խորացման քաղաքականությունը,
դ) թշնամու կողմից պատերազմի ընթացքում և մինչ այժմ շարունակվող մարդու իրավունքների կոպտագույն և լայնածավալ խախտումների վերացմանն ուղղված իշխանությունների արդյունավետ քայլերի բացակայությունը,
ե) վերջնարդյունքում ստեղծված խորը սոցիալ-տնտեսական և անվտանգային ճգնաժամը հաղթահարելու ունակության ի սպառ բացակայությունը,
զ) մեր հայրենիքի համար դեռևս չսպառված անվտանգային մարտահրավերները,
է) հետագա բանակցություններում կապիտուլացիոն փաստաթուղթ ստորագրած Նիկոլ Փաշինյանի մասնակցության անհնարինությունը ստեղծել են Նիկոլ Փաշինյանի և իշխող վարչախմբի ամբողջական հեռացման բացարձակ անհրաժեշտություն։

Գտնում եմ նաև, որ նշված անհրաժեշտությամբ պայմանավորված հասարակական պահանջը պետք է ձևակերպվի և ներկայացվի ոչ միայն հրապարակում և փողոցում, այլ նաև դրանից դուրս՝ տարբեր հասարակական միավորումների, գիտական, ստեղծագործական և մասնագիտական միությունների կողմից։

ՀԱՇՎԻ ԱՌՆԵԼՈՎ իրական քաղաքացիական հասարակության մեջ փաստաբանական համայնքի առանցքային դերը և մարդու իրավունքների պաշտպանության բոլոր օրինական միջոցները գործադրելու մեր մասնագիտական և բարոյական պարտականությունը
ՀԱՆՈՒՆ հայրենիքի և մեր ժողովրդի փրկության ու արժանապատիվ գոյության

ԽՆԴՐՈՒՄ ԵՄ՝

Հրավիրել Փաստաբանների պալատի խորհրդի նիստ և քննարկել ՀՀ վարչապետ Նիկոլ Փաշինյանի և նրա գլխավորած կառավարության անհապաղ հրաժարականը պահանջելու մասին հայտարարություն ընդունելու հարցը:

ՀՀ փաստաբանական պալատի անդամ՝ Վարազդատ Հարությունյան (արտոնագիր՝ թիվ 2426)

ՍՈՒՅՆ ԴԻՄՈՒՄԸ ԲՈԼՈՐ ՓԱՍՏԱԲԱՆՆԵՐԻ ՀԱՄԱՐ ԲԱՑ Է ՄԻԱՆԱԼՈՒ ՀԱՄԱՐ»։