Ձեր վստահելի աղբյուրը

Ինչպես արդեն հայտնել ենք՝ «Հայրենիքի փրկության շարժումը» անցումային կառավարության ղեկավարի՝ ՀՀ վարչապետի պաշտոնում առաջադրել  է Վազգեն Մանուկյանի թեկնածությունը։

Ինչո՞ւ հենց Վազգեն Մանուկյանը, ի՞նչ անելիքներ և ակնկալիքներ ունեն «Հայրենիքի փրկության շարժման» մասնակիցները. այս և այլ հարցերի շուրջ Panorama.am-ը զրուցել է իրանագետ Վարդան Ոսկանյանի հետ։

Panorama.am. Պարո՛ն Ոսկանյան, ինչո՞ւ առաջադրվեց հենց Վազգեն Մանուկյանի թեկնածությունը։ Ըստ Ձեզ արդարացվա՞ծ է այս ընտրությունը։

Վ. Ոսկանյան. Վազգեն Մանուկյանը «Հայրենիքի փրկության շարժման» առաջադրած թեկնածուն է, և մեկ տարի ժամկետով է լինելու նրա վարչապետությունը։ Հաշվի առնելով այն աղետալի իրավիճակը, որ ստեղծվել է Հայաստանում և Արցախում, նախատեսվող մեկ տարի ժամանակահատվածի համար վարչապետը պետք է լինի այնպիսի անձ, որն ունի պետական գործունեության լրջագույն փորձ, հանդիսանում է ՀՀ-ի հիմնադիր հայրերից, ընկալելի և ընդունելի է հանրության, հասարակության, Հայաստանի ապագայով մտահոգ հատվածի կողմից,  խորհրդանշում է նաև մեր հաղթանակներն ու Արցախյան շարժումը։ Իսկ Վազգեն Մանուկյանն, ըստ իս, համապատասխանում է նշված բոլոր չափորոշիչներին։

Շատ կարևոր է, որ մենք գիտակցենք՝ գործելու է արժանավորների քաղաքական թիմ, այսինքն՝ ստեղծվելու է ժամանակավոր կառավարություն՝ քաղաքական և արտակուսակցական ուժերի լայն ներգրավմամբ, և այն պետք է կայունացնի Հայաստանում առկա իրավիճակը, հնարավորության սահմաններում բարելավի մեր բանակցային դիրքերը, ինչը մեզ համար չափազանց արդիական է՝ նոյեմբերի 9-ի խայտառակ հայտարարությունից հետո։ Պետք է ունենանք կառավարություն, որն ընձեռված բոլոր չնչին հնարավորությունները կօգտագործի՝ ապահովվելու համար մեր պետության անվտանգությունը, կզբաղվի մարդասիրական և սոցիալ-տնտեսական ոլորտներում առկա խնդիրներով։ Դրանից հետո արդեն, բնականաբար, կանցկացվեն ընտրություններ, որտեղ արդեն ՀՀ քաղաքացիներն, ըստ իրենց քաղաքական կողմնորոշումների, կկատարեն ընտրություն։

Panorama.am. Չնայած, հանրության լայն շրջանակների կողմից արդեն քննարկվում է Վազգեն Մանուկյանի վարչապետության հարցը, այնուամենայնիվ, ՀՀ գործող վարչապետը, կարծեք թե, մտադրություն չունի հրաժարական ներկայացնելու։ Ավելին, նա Կառավարությունում կադրային փոփոխություններ է իրականացնում, վեցամսյա գործողությունների պլան ներկայացնում։ Այս դեպքում,  ինչպե՞ս է  «Հայրենիքի փրկության շարժումը» հասնելու Նիկոլ Փաշինյանի հրաժարականին։

Վ. Ոսկանյան.  Բնական է, որ սահմանադրական ճանապարհից որևէ շեղում չի լինելու, և «Հայրենիքի փրկության շարժումը» գնալու է բացառապես սահմանադրական ուղիով՝ օգտագործելով այդ շրջանակում առկա ողջ գործիքակազմը՝ խաղաղ բողոքի ակցիաներ, երթեր, հանրահավաքներ և այլն։

Բայց նաև կարևոր է մի հանգամանքի վրա ուշադրություն դարձնել. ակցիայի մասնակիցների նկատմամբ ոստիկանության կիրառած բիրտ ուժը, ձերբակալությունները, ըստ էության, պատրանք են այն բանի, որ Հայաստանում դեռևս գոյություն ունի Նիկոլ Փաշինյանի իշխանություն։ Իրականության մեջ այդ իշխանությունը գոյություն չունի։ Որպես ապացույց կարող ենք բերել այն հանգամանքը, որ սահմանազատման գործընթացում կոնկրետ գյուղացիներն ու գյուղապետերն են զբաղված թշնամու հետ խնդիրներ լուծելով։ Իսկ դա ցուցիչ է, որ Նիկոլ Փաշինյանի իշխանությունը չի տարածվում ՀՀ ողջ տարածքի վրա, և այդ իշխանությունն, ըստ էության, չունի այն ներուժն ու վստահությունը, որով այսուհետ կկարողանա կառավարել մեր երկիրը։

Panorama.am. Նշեցիք, որ Նիկոլ Փաշինյանի հրաժարականի պահանջը լինելու է  սահմանադրական ճանապարհով, արդյո՞ք դա նախատեսում է նաև խորհրդարանական մեծամասնության հետ համագործակցություն, որի արդյունքում գուցե խորհրդարանը վարչապետին անվստահություն հայտնի։

Վ. Ոսկանյան. Կարծում եմ, որ խորհրդարանի «Իմ քայլը» խմբակցությունում կան պարկեշտ մարդիկ. այս ընթացքում արդեն  որոշ մարդիկ դուրս են եկել այդ խմբակցությունից։ Բնականաբար, սահմանադրական ուղին ենթադրում է նաև խորհրդարանի առաջնային մասնակցություն, քանի որ Հայաստանը խորհրդարանական հանրապետություն է։  Ուստի այդ ուղղությամբ էլ է «Հայրենիքի փրկության շարժումը» աշխատանքներ ծավալելու։

Panorama.am. Այսինքն՝ սպասվո՞ւմ են հանդիպումներ և բանակցություններ «Իմ քայլը» խմբակցության պատգամավորների հետ։

Վ. Ոսկանյան. Կոնկրետ գործողությունների ծրագիրը կներկայացվի դեկտեմբերի 5-ին կայանալիք հանրահավաքի ընթացքում։