Ձեր վստահելի աղբյուրը

«Բացի նրանից, որ Վազգեն Մանուկյանն ունի շատ մեծ և դրական պետական կառավարման փորձ, անցած ճանապարհ, անձնական կյանք, նա նաև մասնագիտական բարձր հմտությունների է տիրապետում»,- panorama.am-ի հետ զրույցում «Հայրենիքի փրկության շարժման»  վարչապետի միասնական թեկնածուին  ներկայացրեց «Բարգավաճ Հայաստան» խմբակցության պատգամավոր Արման Աբովյանը:

Նրա խոսքով, Վազգեն Մանուկյանն այն կոմպրոմիսային ֆիգուրն է, որի հիմնական նպատակը լինելու է երկրի իրավիճակի կայունացումը և նոր ընտրությունների նախապատրաստումը:

Պատասխանելով «Հայրենիքի փրկության շարժման» հետագա անելիքների մասին հարցին՝ Արման Աբովյանն անդրադարձավ միայն նպատակներին և ձեռմպահ մնաց անելիքներից խոսելուց: 

«Նպատակը միակն է՝ Նիկոլ Փաշինյանի և այս կառավարության շուտափույթ հեռանալը և երկրի ղեկավարման ղեկն այն ուժերին վստահելը, որոնք ի զորու են գոնե սկսել այս ծանրագույն բարոյահոգեբանական, սոցիալական, տնտեսական ճգնաժամից դուրս գալու պրոցես»,- հայտարարեց «Բարգավաճ  Հայաստան» խմբակցության պատգամավորը:

panorama.am-ի դիտարկմանը, թե Նիկոլ Փաշինյանը չի ցանկանում հեռանալ՝ Արման Աբովյանը նկատեց. «Ուզելով կամ չուզելով չէ, շատ պարզ պատճառով՝ որովհետև գոյություն ունեն իրավական և սահմանադրական մեխանիզմներ, որոնք միանշանակ օգտագործվելու են, բացի դրանից ժողովուրդն է բերել իրեն իշխանության և հենց ժողովուդն է պահանջում իր հեռանալը»: