Ձեր վստահելի աղբյուրը

Ինչպես արդեն հայտնել ենք՝ «Հայրենիքի փրկության շարժումը» անցումային կառավարության ղեկավարի՝ ՀՀ վարչապետի պաշտոնում առաջադրել  է Վազգեն Մանուկյանի թեկնածությունը։

Ինչո՞ւ հենց Վազգեն Մանուկյանը, արդյո՞ք արդարացված է նրա ընտրությունը. այս և այլ հարցերի շուրջ Panorama.am-ը զրուցել է ՀՅԴ ԳՄ անդամ Լիլիթ Գալստյանի հետ։

Panorama.am. Տիկի՛ն Գալստյան, ինչո՞ւ առաջադրվեց հենց Վազգեն Մանուկյանի թեկնածությունը։ Ըստ Ձեզ արդարացվա՞ծ է այս ընտրությունը։

Լ. Գալստյան. Իր բարձր քաղաքական որակներով, ազգային-պետական մտածողությամբ կառավարչական և ռազմավարական խնդիրներ լուծելու կարողությանբ  Վազգեն Մանուկյանը կարող է երկիրը դուրս բերել այս խայտառակ պարտությունից ու  կոլապսից, այն իրավիճակից,  ինչին մեզ հանգեցրին Նիկոլ Փաշինյանն ու իր վարչախումբը։

Եթե Նիկոլ Փաշինյանը խայտառակ պարտության, կապիտուլյացիայի և հայրենազրկության խորհրդանիշ է, ապա Վազգեն Մանուկյանը ազգային, պետական գործիչ է, մտավորական, որի ողջ կենսագրությունն առնչվում է մեր պետականության և հաղթանակների հետ։

Նա Հայաստանի երրորդ հանրապետության առաջին վարչապետն է, կամավորական ջոկատների հիմքի վրա բանակ կերտելու ակունքներում կանգնած մարդ, հաղթանակ կերտած Պաշտպանության նախարար։

Panorama.am. Չնայած, հանրության լայն շրջանակների կողմից արդեն քննարկվում է Վազգեն Մանուկյանի վարչապետության հարցը, այնուամենայնիվ, ՀՀ գործող վարչապետը, կարծեք թե, մտադրություն չունի հրաժարական ներկայացնելու։ Ավելին, նա Կառավարությունում կադրային փոփոխություններ է իրականացնում, վեցամսյա գործողությունների պլան ներկայացնում։ Այս դեպքում,  ինչպե՞ս պետք է հասնել Նիկոլ Փաշինյանի հրաժարականին։

Լ. Գալստյան. Այժմ բնական է, որ մտասևեռված, ամբարտավան, սեփական պարտությունը չգիտակցող Նիկոլ Փաշինյանն ու իր շուրջը մնացած փոքր խմբակն ամեն գնով փորձում են պահել իշխանությունը, բայց իրականությունն այն է, որ կատարվածը ունի մեկ առայժմ բարոյական գնահատական՝ դավաճանություն։ Բայց հեռու չէ իրավակաբ գնահատական տալու ժամանակը։

Դավաճան Նիկոլ արտահայտությունն, ըստ էության,  ընդդիմադիր քաղաքական ուժերինն չէ, այլ ժողովուրդն է նրան այդ գնահատականը տվել։ Բնական է, որ Նիկոլ Փաշինյանը պիտի կանգնի նաև քաղաքական և իրավական պատասխանատվության առջև, թե ինչպես եղավ, որ Հայաստանին պարտադրվեց  այս խայտառակ պարտությունը, թե ինչպես այս 2.5 տարիների ընթացքում Նիկոլ Փաշինյանը հետևողականորեն փոշիացրեց մեր պետականության ինստիտուտը։

Նիկոլ Փաշինյանը կարողացավ  բացի Արցախի հողերի կորստից, Արցախի պետականության հեռանկարի անորոշությունից, նաև Հայաստանը կանգնեցնել պետական անվտանգության սպառնալիքի առջև։ Այսօր մենք կանգնած ենք նաև ինքնիշխանության կորստի վտանգի առջև։

Նիկոլ Փաշինյանի՝ իշխանության մնալու յուրաքանչյուր ժամը հղի է նոր սպառնալիքներով։ Արդեն պարտված վարչապետն ունակ չէ բանակցություններ վարելու, իսկ մենք այսօր տեսնում ենք, որ ողջ Հայաստանի երկայնքով, սահմանագծման հարցերով թուրքերի հետ ժողովրդական բանակցության մեջ են մտել բնակիչներն ու համայնքապետերը։ Բոլորը բանակցում են, բացի պետությունից։ Այսօր Հայաստանում իշխանություն չկա։ Մենք արձանագրում ենք մի մարդու, որն ուղղակի զբաղեցնում է վարչապետի պաշտոնը, բայց ինստիտուցիոնալ իշխանություն ՀՀ-ում չկա։

Հանրային ընդվզման ճանապարհով հնարավոր կլինի Նիկոլ Փաշինյանին տուն ճանապարհել։ Իսկ հետո արդեն նա կենթարկվի քաղաքական ու իրավական պատասխանատվության: