Ձեր վստահելի աղբյուրը

Ընդդիմադիր 17 ուժերի կողմից անցումային շրջանում վարչապետի  թեկնածու առաջադրված Վազգեն Մանուկյանը հմուտ քաղաքական գործիչ և հմուտ բանակցող է, ունի պետական կառավարման հարուստ փորձ։ Panorama.am-ի հետ զրույցում այսպես բնութագրեց ընդդիմության միասնական թեկնածուին  ՀՀԿ երիտասարդական կազմակերպության նախագահ Հայկ Մամիջանյանը։

Հ. Մամիջանյանի հետ զրուցել ենք ընդդիմադիր ուժերի ընտրության,  Նիկոլ Փաշինյանի հրաժարականի ուղիների և վարչապետի մեկ այլ թեկնածուի մասին։

Panorama.am- Ինչո՞ւ «Հայրենիքի փրկության շարժումը» անցումային կառավարության ղեկավարի պաշտոնում առաջադրեց Վազգեն Մանուկյանի թեկնածությունը։

Հ. Մամիջանյան-Հաշվի առնելով Վազգեն Մանուկյանի անձը, որն իր մեջ ներառում է անցած ուղին, համոզմունքները, կարող եմ ասել, որ ունի բոլոր այն անհրաժեշտ  ունակությունները, որպեսզի այս տուրբուլենտ ժամանակներում ստանձնի թե գործադիր իշխանությունը, ոչ պակաս կարևոր՝  նաև բանակցային գործընթացը։

Վազգեն Մանուկյանը հմուտ քաղաքական գործիչ և հմուտ բանակցող է։

Հավի առնելով այն պայմաններով, որոնցով ընդդիմադիր 17 ուժերն  առաջադրել են Վազգեն Մանուկյանին՝ պաշտոնը ստանձնելուն պես կասեցնել կուսակցական գործունեությունը, կազմակերպել արտահերթ ընտրություններ, չառաջադրվել ընտրություններում, կարծում եմ, սա լավագույն տարբերակն է  մեր երկիրն այս ամոթալի իրավիճակից դուրս բերելու համար։

Պարոն Մանուկյանն ունի պետական կառավարման հարուստ փորձ։ Կարծում եմ՝  այս ճգնաժամից երկիրը դուրս բերելու հերթը հմուտ քաղաքական գործիչներինն ու կառավարիչներինն է։

Հարց-Վազգեն Մանուկյանի թեկնածությունն առաջադրելու մասին հայտարարությունից հետո սկսվեց նրան ուղղված քննադատությունները։ Ուղղորդվա՞ծ են այդ քննադատությունը։

Հ. Մամիջանյան-Մեր երկրում, որտեղ գերթե այս պահին որևէ պետական ինստիտուտ չի գործում, քանի որ Փաշինյանն ու իր թիմը դրանց նկատմամբ ալերգիա, վախ ունի, նորմալ աշխատող միակ ինստիտուտն իր ֆեյքագործարաններն ու ֆեյքաբուծարաններն են։ Կարծիք անգամ լինել չի կարող, որ դա ուղղորդված չէր։

Ինչ վերաբերում է  հնչած կարծիքներին, շատ հետաքրքիր է յուրաքանչյուր քաղաքացու կարծիք, իսկ երբ կիսաքաղաքական կիսագործիչները փորձում են կասկածի տակ դնել մի մարդու հետագիծ, որն ավելի երկար ժամանակ է զբաղվել քաղաքականությամբ, քան իրենք քայլում են, ծիծաղելի է։ Նման զանգվածի կարծիքը հասարակության որևէ մեկին չի հետաքրքրում։

Այդ զանգվածը մեկ տարբերակ ուներ՝ լուռ, ամոթով, գոնե այդ դեպքում մասմաբ պահելով սեփական արժանապատվությունը, հեռանային հայտարարության հրապարակումից հետո։ Դեռևս մի մասը հնարավորություն ունի լքել դավաճանական խունտան։

Հարց- Ինչպե՞ս եք տեսնում Նիկոլ Փաշինյանի հեռացումը։

Հ.Մամիջանյան- Մեջբերում անեմ՝ իշխանությունից հրաժարվել կարող է միայն այն մարդը, որն իշխանությունից ավելի թանկ բան ունի։ Փորձը ցույց է տալիս, որ Փաշինյանն իշխանությունից թանկ բան չունի։

Անցնցում եղանակով եմ տեսնում, մեր երկրին ցնցումներ պետք չեն։ Օրենքով թույլատրվող եղանակները, ողջ գործիքակամզը պետք է օգտագործել, յուրաքանչյուր քաղաքացի իր տեղում անի ամեն ինչ, որպեսզի այս դավաճանների ոհմակը հեռանա՝ գործադուլ, դասադուլ, խաղաղ ակցիաներ, անհնազանդության դրսևորումներ՝ խաղաղ։

Վստահ եմ, որ այդ գործընթացն  արդեն դրված է։ Փողոցները փակելու ժամանակ շատ քիչ են դեպքերը, երբ խցանումների մեջ կանգնած վարորդները դժգոհություն են հայտնում, մի մասը լուռ սպասում է, մի մասն ազդանշաններով կամ գոռոցներով համաձայնություն է հայտնում «Նիկոլ դավաճան» կոչին։

Մենք ունենք քաղաքական- հասարակական կոնսենսուուս – 1։ Այդ  -1-ը Փաշինյանն է։
Բոլորը, բացի Փաշինյանից, վստահ են, որ Փաշինյանը պետք է հեռանա։

Իսկ Ազգային ժողովի մեծամասնության ձեռքերում  հիմա ընդամենը  մի բան է՝ իրենց համբավը։  Բացարձակ որևէ աղերս չունեն պետական կառավարման հետ, չունեն իշխանություն որպես այդպիսին, «Իմ քայլի» յուրաքանչյուր  պատգամավոր իր ձեռքում ունի իր բարի համբավն ու արժանապատվությունը, եթե մի վայրկյան շուտ միանա համազգային շարժմանը, հնարավորություն ունի փրկել իր արժանապատվությունը։

Հարց-«Լուսավոր Հայաստան» կուսակցությունը վարչապետի իր թեկնածուն ունի՝ Էդմոն Մարուքյան։

Հ.Մամիջանյան-Չէի ուզի որևէ կոշտ ձևակերպում անել այս պահին։ Համարում եմ, որ բոլորս միասին ունենք մեկ խնդիր՝ դավաճանին հեռացանել  իշխանությունից, իշխանության բերել ազգանվեր, գործադիրում լավ կառավարման փորձ ունեցող գործչի, որը չունի քաղաքական պայքարի ամբիցիա։

Էդմոն Մարուքյանի հիմնական քաղաքական փորձն օրենսդիրում է, գործող ակտիվ քաղաքական գործիչ է, դժվար է  ասել, որ նա անկողմնակալ ու ապակուսակցական, ապաքաղաքական մոտեցումներ կարող է ունենալ։ Գոնե այդ երկու կետով անհամաձայնություն կա։