Ձեր վստահելի աղբյուրը

«Նիկոլ Փաշինյանը  զբաղված է կեղծիքով։ Պատերազմի պատճառը եղել է  ինքը, երկիրը իր գլխավորությամբ տարել է պարտության, հիմա փորձում է  գտնել մեղավորների։ Բոլորը  մեղավոր են,  բացի իրենից»,- դեպի կառավարական առանձնատուն երթի ժամանակ լրագրողներին ասաց ՀՅԴ ԳՄ ներկայացուցիչ Իշխան Սաղաթելյանը։

Նա նշեց, որ Փաշինյանը երկիրը հասցրել է պատերազմի, իսկ պատերազմի ընթացքում իր անկարողության, անգործունեության, կեցվածքի շնորհիվ երկիրը տարավ պարտության։

«Նա շարունակում է  պառակտել մեր հասարակությանը, ժողովրդին, խոսել թալանից։  Տո թալանչին էլ, պառակտիչն էլ ինքն է։ Երկիրը բերել, հացրել է այս վիճակին, շարունակում է մեղավորներ փնտրել։ Պետք է ունենա արժանապատվություն, գիտակցություն, թողնի ու հեռանա, որպեսզի կարողանանք փրկել մեր երկիրը»,- ասաց նա։

Ի. Սաղաթելյանը համոզված է, որ Վազգեն Մանուկյանն այն անձնավորությունն է, որ կարող է   գլխավոր հակաճգնաժամային կառավարությունը, լուծել խնդիրները։

«Համաժողովրդական ճնշման տակ պետք է հեռանա Նիկոլ Փաշինյանը»,- ասաց նա։

Դիտարկմանը, որ «Լուսավոր հայաստան» կուսակցությունը վարչապետի իր թեկնածուն ունի, Ի. Սաղաթելյանն ասաց. «Այն քաղաքական ուժը, ով առաջադրում է  սեփական վարչապետի թեկնածուն,  մի պայման պետք է ընդունի՝ հաջորդ ընտրություններին չի մասնակցելու։ Հիմա Էդմոն Մարուքյանը կամ մյուս ուժերը  ընդունո՞ւմ են այդ պայմանը։

Համաձայնությամբ առաջադրում ենք մի թեկնածու, որը հաջորդ ընտրություններին չի մասնակցելու»։

Դիտարկմանը, որ Հայաստանի ներքաղաքական կյանքում շատ կարևոր են Ռուսաստանից եկող ազդակները, Իշխան Սաղաթելյանը ասաց. «Հայաստանի ներքաղաքական կյանքին վերաբերող ցանկացած հարց պետք է լուծվի Հայաստանի ներսում: Դա միանշանակ է, չի քննարկվում: Այդ որոշումները պետք է կայացնեն Հայաստանի քաղաքական ուժերն ու հայ ժողովուրդը: Այն հակաքարոզչությունը, որ Մոսկվայում թեկնածու  է որոշվել, անընդունելի է և չի կարող այդպես լինել»:

Արտահերթ ընտրություններին մասնակցել-չմասնակցելու հարցերը, ըստ նրա, դեռ չեն քննարկել. «Այսօր, այս պահին  մենք ունենք շատ առաջնահերթ խնդիրներ՝ փրկել մեր երկիրը: Մեզ սպասվում է սոցիալ-տնտեսական կոլապս, հումանիտար աղետ: Հիմա գլխավոր խնդիրն է հեռացնել Նիկոլին և փորձել լուծել այդ խնդիրները: Մեկ տարի հետո ընտրություններին, թե ով ում հետ կմասնակցի, ինչ քաղաքական դաշինքներ կլինեն, անիմաստ է  հիմա այդ մասին խոսելը։ Ամեն դեպքում որևէ քննարկում չենք ունեցել այդ մասին»:

Ի.Սաղաթելյանի խոսքով, այս ընթացքում առաջ են եկել բազմաթիվ խնդիրներ և ժողովրդի շահերը պաշտպանելու համար իշխանություն չկա:

«Կոնկրետ հարց եմ ասում՝ Լաչինի միջանցքի 2.5 կմ-ի հատվածը: Այսօր այն ինչ տեղի է ունենում Սյունիքում, հենց հիմա խնդիր է դրված, որ Կուբաթլուի ու Զանգելանի դիրքերը հանձնեն: Չկա պետություն, բանակը մնացել է անտեր, թուրքի առաջ կանգնած: Չկա ԱԳՆ, չկա վարչապետ: ՀՅԴ անունից կարող եմ ասել, որ մենք երբեք չենք կարող համակերպվել Շուշիի ու Հադրութի կորստի հետ: Սա չի նշանակում, որ մենք մեր ժողովրդին տանելու ենք նոր պատերազմի, նոր արկածախնդրության»,-ասաց նա:

ՀՅԴ ԳՄ ներկայացուցիչն անլուրջ, անիրատասական  համարեց վարչապետ Նիկոլ Փաշինյանի կողմից 6-ամսյա ճանապարհային քարտեզ մշակելու և իրագործելու հայտարարությունը. «Ի՞նչ պետք է անի Նիկոլ Փաշինյանը, որ մինչև հիմա չի կարողացել անել: Ինքը 2,5 տարի ժամանակ ուներ բարեփոխումներ անելու, երկիր կառուցելու: Ինքը ձախողել է, չի կարողացել:  Հիմա ևս 6 ամիս ուզում է, որ ի՞նչ անի:

Ինքը ունի մեկ ճանապարհ՝ անցնցում, անարյուն կատարի իշխանության փոխացնում և նոր սադրանքների չդիմի: Եթե մի քաղաքացու քթից արյուն թափվի, դրա մեղավորը Նիկոլ Փաշինյանն է: Մենք մեր բողոքի ձայնն ենք բարձրացնում, մենք պարբերաբար տեղեկություններ ունենում ենք, որ կան սադրիչ խմբեր և կոչ ենք անում դրանց հեռու պահել այս պրոցեսներից»: