Ձեր վստահելի աղբյուրը

«Եթե իմ խոսքը մի քիչ հակառուսական հնչի, ներողամիտ եղեք, որովհետև իմ խոսքն ավելի հայամետ է, որը ցավոք սրտի այսօր հակառուսական պետք է հնչի։ Ի սկզբանե համոզված եմ, որ այս խաղը վաղուց խաղացված խաղ էր՝ պատերազմը չսկսված»,-«Լուսավոր Հայաստան» խմբակցության կազմակերպած խորհրդարանական լսումների ժամանակ հայտնեց ազգագրական պարերի մասնագետ Գագիկ Գինոսյանը։

Նրա համոզմամբ, գործընթացների շղթան, ներառյալ Շուշին, նախօրոք որոշված է եղել, նաև պլանավորված է եղել ռուսական զորքերի ներկայությունը Արցախում: 

Գինոսյանը գտնում է, որ կատարվածը նեոսովետիզմ է, որը վտանգում է Հայաստանի անկախությունը։

Նա կոչ արեց մտածել, թե ինչպես գործընթացնրին  ուրիշ ընթացք տալ, ինչի համար Նիկոլ Փաշինյանը պետք է հեռանա, բայց նախորդ ուժերն էլ չպետք է գան, քանի որ կշարունակեն նույն գիծը:

«Եվ ակնհայտ է, որ որևէ մեկը ստրկամիտ մտածելակերպից դեռ դուրս չի եկել։ Այն, որ հայտարարվեց, թե վերջապես ռուսական ալիքներից համաձայնություն ունենք համապետական և մայրաքաղաքային ալիքներով հեռարձակելու ռուսական ալիքները, սրանք առաջին քայլերն են, ծաղիկներն են, որոնք հետո դառնալու են մեծ մարգագետին կամ այգի»,-նկատեց Գագիկ  Գինոսյանը։

Բանախոսը համոզմունք հայտնեց, որ եթե «Իմ քայլը» խմբակցությունը մեծամասնություն է մնալու, ապա վարչապետի փոփոխությունը հարց չի լուծի և ցանկացած առաջադրված փոփոխություն ուղղակի կկասեցվի։

«Իրենք վարչապետ չեն ունենա, բայց թույլ էլ չեն տա, որ Ազգային ժողովը որոշումներ կայացնի՝ երկրում ինչ-որ փոփոխություններ անելու նպատակով»,-նկատեց  Գինոսյանը։

Նրա համոզմամբ, բանակը չէր կարող լինել մարտունակ, քանի որ չունի ազգային գաղափարախոսություն և քանի դեռ ամբողջ գեներալիտետը ռուսական ակադեմիա են անցած և ռուսական դաստիարակություն ստացած, ռուսիզմ ունեցող բանակ է լինռլու։