Ձեր վստահելի աղբյուրը

«Այսօր ունենք կորսված Արցախ։ Ադրբեջանը պատերազմով վերցրել է Արցախի 3763 կմ տարածքը, իսկ 4000 կմ-ից ավելի տարածք Նիկոլ Փաշինյանը հանձնել է առանց կրակոցի»,-  այսօր երկրում առաջացած իրավիճակը քննարկելու նպատակով հրավիրված խորհրդարանական լսումների ընթացքում ասաց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը։

Նրա խոսքով, մենք այսօր ունենք բացարձակ անիշխանություն և չունենք պետություն։ Պատգամավորը նշեց, որ Սյունիքի և Գեղարքունիքի սահմանամերձ համայնքներում գյուղացիներն ու գյուղապետերն են պահում մեր հայրենիքը։

«Մենք այսօր ունենք նաև Հայաստանի տարածքային ամբողջականության ռեալ վտանգ, քանի որ քիչ առաջ խոսեցի նաև Խնձորեսկի գյուղապետի հետ, թուրքը գտնվում է Խնձորեսկից ընդամենը 600 մետր հեռավորության վրա։ Եվ այլևս այդպես է իրավիճակը Սյունիքի բազմաթիվ գյուղերում։ Մեր երկրի սահմանը ճշտվում է GPS-ով։ Եղել եմ Սոթքում, Վարդենիսից մի քանի կմ հեռու մեր հայրենիքը վերջանում է, որովհետև ադրբեջանցին իր GPS-ով կանգնած ճշտում է մեր հայրենիքի սահմանը։ Արցախը հանձնածն էլ ասում է՝ դե այդպես է, պիտի վերադառնանք խորհրդային Հայաստանի և խորհրդային Արցախի սահմաններին»,- ներկայացրեց Նաիրա Զոհրաբյանը։

Նա նշեց, որ խոսել է ԳԱԱ մասնագետների հետ, և նրանք ասել են՝ երիցս սուտ է, թե մենք անցնում ենք խորհրդային Հայասանի սահմաններին, քանի որ այդպես էլ գծված չեն եղել այդ սահմանները.

«Բայց եթե անգամ ընդունենք, որ վերադառնում ենք խորհրդային սահմաններին, ուրեմն հարցնում եմ՝ Նիկոլ, ինչո՞ւ չես վերադարձնում խորհրդային Հայաստանի տարածքում գտնվող Արծվաշենը»։

Բացի այդ, Նաիրա Զոհրաբյանը վստահություն հայտնեց, որ հնարավոր էր խուսափել պատերազմից, եթե մենք չունենայինք մի «ֆեյք» իշխանություն, որն իշխանության է եկել դագաղներով, ատելության և նախկիններին մերժելու հողի վրա, որն այսօր էլ իր իշխանությունը պահում է «ֆեյք» իրականությամբ՝ հասարակությանը պառակտելով։

«Մենք, այո՛, ունեինք մի քանի օրվա պատերազմի ռեսուրս, բայց մեզ 2.7 տարի ասում էին՝ գնված «Օսա-ԱԿ»-ները մետաղի ջարդոններ չեն, բայց պարզվեց՝ մետաղի ջարդոն են։ Իսկ ՍՈւ-երն էլ, որ գնված էին միայն Նիկոլի ընտանիքի սելֆիների համար, պատերազմի համար պիտանի չէին։ Մեզ ասում էին՝ նոր պատերազմը նոր տարածքների համար է լինելու, մենք էլ հավատում էինք։ Բայց պարզվեց, որ մենք ունեինք մաքսիմում մեկ շաբաթվա պատերազմի ռեսուրս, բայց մեր հերոսական տղաները «Բայրակթարների» դեմ պայքարեցին 44 օր»,- նշեց պատգամավորը։

Նա  նկատեց՝ այսօր այս իշխանությունը չի կարող զբաղվել անգամ ռազմագերիների հարցով, մի իշխանություն, որն այսօր Ադրբեջանի թիվ մեկ «կարիկատուրան» է, չի կարող զբաղվել այդ խնդրով.

«Ինձ մի տեսանյութ ուղարկեցին, որ Ադրբեջանում բոլոր մեքենաների ազդանշանները Նիկոլ Փաշինյանի մասին ծաղրական երգի հնչյուններն են։ Սա մեր բոլորի ամոթն է։ Նա չի կարող Ադրբեջանի հետ բանակցել ռազմագերիների վերադարձի հարցով։ Այսօր մենք տեսնում ենք, որ մեր ռազմագերիների վերադարձի հարցով զբաղվում է ՌԴ-ն։ ՀՀ իշխանության որևէ կառույց այսօր դե ֆակտո ներգրավված չէ այդ գործընթացի մեջ»։

Ըստ Նաիրա Զոհրաբյանի, այս իրավիճակից մի ելք կա՝ Նիկոլ Փաշինյանի հեռացումը։

«Նա պետք է հեռանա խաղաղ, իր կամքով։ Բայց ես չեմ հավատում, որ Նիկոլ Փաշինյանը կտա հրաժարական. նա մինչև չհրահրի քաղաքացիական բախումներ, չի հեռանա։ Պիտի ամեն ինչ անենք, որ քաղաքացիական բախումներ չլինեն։ Հիշեք նրա խոսքը իջևանյան դեպքերի հետ կապված.  «Ես ուզում եմ տեսնել արյան գետեր»։  Մենք ամեն ինչ պիտի անենք, որ երկրում վերականգնենք համերաշխության մթնոլորտը։ Հայը հայի արյուն չպիտի թափի։ Եթե նա չհեռանա, իսկ ես վստահ եմ, որ նա հրաժարական չի տալու, լինելու են անհնազանդության ակցիաներ։ Այո՛, չկա որևէ շենք, որ մենք չկարողանանք մտնել, որովհետև մեր պայքարը արդար է, մենք ուզում ենք փրկել այն, ինչ մնացել է Արցախից, և մենք ուզում ենք փրկել Հայաստանը։ Դրա միակ խոչընդոտը Նիկոլ Փաշինյանն է»,- եզրափակեց խոսքը պատգամավորը։