Ձեր վստահելի աղբյուրը

«Այն, ինչ տեղի ունեցավ այս պատերազմի ժամանակ, արդեն իսկ նախանշվել էր 2016-ի Ապրիլյան պատերազմում»,-  այսօր երկրում առաջացած իրավիճակը քննարկելու նպատակով հրավիրված խորհրդարանական լսումների ընթացքում ասաց հեռուստամեկնաբան, հակամարտությունների փորձագետ Նաիրի Հոխիկյանը։

Նրա խոսքով, երկար ժամանակ ինքը բարձրաձյնել է, որ Հայաստանի պետք է սեփական տեղեկատվական արբանյակ, դա պետք է ստեղծվեր 5-րդ սերնդի պատերազմներին դիմակայելու համար։

«Բայց այս տարվա օգոստոս ամսին ՏԿԵ նախարար Հակոբ Արշակյանն իմ այս միտքը մեղմ ասած ծաղրեց. այնինչ  Ադրբեջանը 2012 թվականից արդեն ստեղծել է երկու՝ «Azerspase 1» և «Azerspase 2» արբանյակները, որոնց օգնությամբ և կառավարվում էին «Բայրաքթարները»։ Եվ մենք կարող էինք սեփական արբանյակով գոնե դիմակայել դրանց»,- նշեց նա։

Ըստ Նաիրի Հոխիկյանի, Ադրբեջանն ու Թուրքիան Արցախի հարավում տեղակայել են մեծ թվով ահաբեկիչների, հիմա էլ Քարվաճառում և Քաշաթաղում են պատրաստվում տեղակայել Սիրիայի թուրքմեն ահաբեկիչներին, որոնք հայտնի են իրենց ռուսատյացությամբ.

«Եվ մենք ներքին ատելություն քարոզելու, այլակարծության դեմ պայքարելու փոխարեն պետք է հասկանանք, որ 2021-ին ունենալու ենք շատ ավելի մեծ ճգնաժամ, քան եղավ։ Տեսեք, ԱՄՆ նախագահ ընտրվեց դեմոկրատ Ջո Բայդենը, և ԱՄՆ թիրախում Սիրիայից, Իրաքից ու Լիբիայից հետո Իրանն է հայտնվելու, իսկ վերջին 15 տարիների ընթացքում ԿԻրանի ռազմական ուժերը պարալիզացվել են, և այն, ինչ տեղի կունենա, տեղի կունենա Իսրայելի, ԱՄՆ-ի և ահաբեկիչների համատեղ ուժերի կիրառմամբ, որտեղ իրենց մեծ ներդրումը կունենան Թուրքիան և Արցախի հարավային շրջաններում տեղակայված ահաբեկիչները։

Վստահ եղեք, որ Ջաբրայիլում և Ջրականում տեղակայված բավականին մեծ ռազմաբազայում հիմա 5000-ից ավելի ահաբեկիչներ են տեղակայված, և նրանց կողմից պարբերաբար հարձակումներ են լինում Իրանի շրջանների և սահմանակից տարածքների վրա։ Արդեն բավականին զոհեր կան իրանական զինուժից»։

Հակամարտությունների փորձագետի խոսքով, պատահական չէ, որ Իրանը հենց Արցախի սահմանին է տեղակայել իր ռազմական ուժերի հսկայական հատված։

«Իրանը աշխարհում թերևս ամենամեծ հանքահումքային բազաներից մեկն ունի։ Եվ այս պայքարը, ինչպես Արցախի դեպքում, այնպես էլ Իրանի դեպքում, հիմնականում նպատակ ունի գրավել այդ հանքահումքային ռեսուրսները։ Հաշվի առեք, որ արդեն սպանվել են իրանցի երկու խոշոր գործիչներ, արդեն Իսրայելի կողմից հնչում են հստակ հայտարարություններ Իրանի դեմ, դրանք հունվարի 20-ից հետո ավելի ռազմատենչ բնույթ կկրեն, և մենք ականատես կլինենք մեծ քանակությամբ ահաբեկիչների ներթափանցման՝ Իրանի հյուսիսային շրջաններ։

Եվ մենք պետք է պատրաստ լինենք ավելի մեծ պատերազմի, ավելի մեծ ճգնաժամի։ Եվ 2021-ին մենք ընդհուպ կանգնած ենք լինելու ՀՀ-ի տարածքներ ունենալ-չունենալու հարցի առաջ։ Իմքայլական որոշ պատգամավորներ խնդրել են ինձ այս խնդիրների մասին առայժմ չխոսել, բայց չխոսելը նշանակում է դավաճանել մեր ազգային անվտանգությանը»,- եզրափակեց խոսքը Նաիրի Հոխիկյանը։