Ձեր վստահելի աղբյուրը

«Ժառանգություն» կուսակցության վարչության նախագահ Նարինե Դիլբարյանը ԱԺ հանրային լսումների ժամանակ հայտարարեց, որ Նիկոլ Փաշինյանի հեռանալու հարցի շուրջ ձևավորվել է հանրային կոնսենսուս, բայց կարևորեց հետագա անելիքները, քանի որ խորհրդարանի կազմը և Սահմանադրությունը չափազանց սահմանափակ ելքեր են ընձեռում և պետք է կարողանալ այդ սահմանափակ ելքերի շրջանակում գործել:

Նա գտնում է, որ իրավիճակից դուրս գալու միակ սահմանադրական ու անցնցում եղանակը խորհրդարանի միջոցով առաջ գնալն է, բայց նաև համոզմունք հայտնեց, որ այն չի արտահայտում հանրության տեսակետները: Ըստ Դիլբարյանի, հեղափոխության էյֆորիայի ֆոնին անցկացված ընտրությունները միայն սահմանափակ ուժերի էին հնարավորություն ընձեռել խորհրդարանում հայտնվելու:

«Ինչ ենք անում, ո՞վ է գալու, և ես շատ կցանկանայի, որ այդ «ովը» ճշտեինք, որ չի լինելու պարզապես անձ, այլ ծրագրի, գաղափարների համախմբում»,- հայտարարեց  Դիլբարյանը և շեշտեց, որ տեսել են, թե ինչի հանգեց այն իրողությունը և պետության անվտանգությունը, երբ փորձ, մասնագիտական կարողունակություն չունեցող մարդիկ ստանձնեցին պաշտոններ՝ բազմաթիվ շենքեր գրավելով:

Նրա կարծիքով,  վարչապետի թեկնածու առաջադրած բոլոր ուժերը պետք է ներկայացնեն այն թիմը, որոնց միջոցով առաջ են գնալու և լուծելու են առկա խնդիրները:

«Կրկին անձ չենք կարող ընտրել, մի անգամ մերժեցինք Սերժին, և տեղի ունեցան աղետալի դեպքեր, բացարձակ անփորձ կամ ժամանակը ցույց կտա՝ ինչպիսի իշխանություն եկավ»,- հայտարարեց Նարինե Դիլբարյանը: