Ձեր վստահելի աղբյուրը

Գիտական առումով որևէ քննադատության չի դիմանա ադրբեջանական կողմի  տեսակետը՝ Արցախի եկեղեցիներն աղվանական ներկայացնելու հետ կապված, սակայն հայկական կողմը հսկայական աշխատանք ունի անելու: Լրագրողների հետ հանդիպմանն ասաց  ՀՀ ԳԱԱ Մանուկ Աբեղյանի անվան գրականության ինստիտուտի տնօրեն, բանասիրական գիտությունների դոկտոր Վարդան Դևրիկյանը:

«Մենք մեր տեսակետն աշխարհին պետք է ներկայացնենք հիմնավորված:  Դա հնարավոր է կատարել միջգիտակարգային միջոցներով, այսինքն՝ պետք է լինի Պատմության, Արևելագիտության ինստիտուտների, ազգագրության հստակ աշխատանք»,- նշեց նա:

Վ.Դևրիկյանի խոսքով, պատերազմի ժամանակ ինֆորմացիոն պատերազմում  պարտվել ենք, դրանցից հետո քարտեզագրաման պատերազմում էլ, ըստ էության, տանուլ ենք տալիս:

«Քարտեզագրական պատերազմում էլ Ադրբեջանն առարկայորեն մեր երկրի վրա նպաստավոր դիրքեր է գրավում:  Հայտարարում եմ, որ սկսվում է պատմամշակութային պատերազմ: Այդ պայմաններում, եթե ընդունվի «Բարձրագույն կրթության և գիտության մասին» օրենքի ներկայացված նախագիծը, այն այս պատերազմում մեզ ուղիղ գծով կտանի պարտության:

Ինչո՞ւ համար է նման օրենքը տարվում Ազգային ժողով: Նախագիծն ուղարկողները դա գիտակացո՞ւմ են, թե՞ նպաստում են, որպեսզի կրենք նոր պարտություններ»,- ասաց բանասիրական գիտությունների դոկտորը:

Վարդան Դևրիկյանը մասնակցել է Արցախյան առաջին պատերազմին, 2016 թվականի Ապրիլյան պատերազմին, իսկ այս պատերազմին ոչ: Քանի որ ականտես չի եղել, չկարողացավ կոնկրետ պատասխանել, թե ինչն էր հայկական կողմի պարտության պատճառը:

«Տարբեր, հակասական բաներ էինք լսում: Ամեն դեպքում մեր երկրի ներսի մթնոլորտը  որևէ առումով  նպաստավոր չի եղել, որպեսզի մենք կարողանայինք պատերազմում հաղթել, ավելի արդյունավետ դիմադրություն  ցույց տայինք: Հասարակության պառակտվածությունը, շատ հարցերում ինքնավստահությունը…  Պատմությունն ամենամեծ դատավորն է, այդ հարցերը վեր կհանի,  բայց ամեն դեպքում  հիմա մենք պետք է սթափ կարողանանք նայել, ամեն օր պարտությունների ընթացքի մեջ ենք:

Պետք է մի կետում դիրքավորվենք, դրանից այն կողմ չնահանջենք և փորձենք առաջ գնալ: Այսօրվա մեր բոլոր քայլերը պետք է  նպատակամղված լինեն դրան:  Եթե դա չարվեց, արդեն ինձ իրավունք կվերապահեմ շատերի նման մտածելու, որ այս  պարտությունը կանխամտածված էր»,- ասաց Վարդան Դևրիկյանը: