Ձեր վստահելի աղբյուրը

Վայոց Ձորում սկսվում է ինքնապաշտպանական և ընդվզման շարժում՝ ընդդեմ վարչապետ Նիկոլ Փաշինյանի պաշտոնավարման։

Ֆերմեր Տիգրան Եղոյանը լրագրողների հետ զրույցում հայտնեց, որ ինքը դեռ մեկ տարի առաջ հայտարարություն է տարածել, ասելով, որ ՀՀ հարավային շրջանը դարձել է խոցելի։ Այդ հայտարարությունից հետո, իր խոսքով, այսօրվա իշխանություն կոչված «վիժվածքները» Քասախի իր սեփական տարածքից 5 մլն դրամի գողություն են կազմակերպել, գործը հանձնվել է ոստիկանություն, բայց որևէ տեղաշարժ չկա։

«Հարավային շրջանում, մասնավորապես՝ Վայոց Ձորում մարզպետ է նշանակվել մարդ (Տրդատ Սարգսյան, խմբ.), ում խորհրդականը սպայի է ծեծի ենթարկել. վերջինս ութ ամիս է՝ կոմայից դուրս չի գալիս։ Եվ երբ այս ամենի վերաբերյալ ես իմ բողոքի ձայնը բարձրացրի, մարզպետ կոչվածն ինձ դատի տվեց ու դրամական փոխհատուցում է պահանջում։ Դա այն մարզպետն է, որին Փաշինյանը նշանակել է ՔՊ-ի աշխատակազմի ղեկավար»,- ներկայացրեց ֆերմերը։

Նրա խոսքով, այս ամենը պիտի լիներ, քանի որ 2018 թվականին Հայաստանի նախագահի աթոռին բազմեց «անգլիական լրտեսը», որից հետո՝ տեղի ունեցավ իշխանափոխություն.

«Եկան ու ամեն ինչ կազմաքանդեցին։ Ես բարձրաձայնում էի գյուղատնտեսության խնդիրները, ասում էի, որ մեր ՀԷԿ-երից ջուրը գողանում են, Նախիջևանն են հարստացնում։ Նույնը շարունակվեց։ Ասում էի, որ գյուղացին հարավային շրջանից դուրս է գալիս։ Սա պետք է լիներ, քանի որ այդ մարդիկ եկան իշխանության ու զինվորականներին նսեմացրին, սևերի ու սպիտակների բաժանեցին մարդկանց։ Եվ դա, ի վերջո բերեց նրան, որ այսօր այս ազգադավ «Գվիդոնը», ազգը պառակտելով կապիտուլյացիայի ենթարկեց Արցախը։ Եվ այսօր էլ արդեն վտանգված են ՀՀ հարավային շրջանները։ Եթե գյուղացին հարավային շրջանի իր հողերը վաճառքի է հանում, վերացնում է իր անասունը, ուրեմն սա արդեն իսկ դավադրություն է մեր ժողովրդի հանդեպ»։

Տիգրան Եղոյանը նշեց, որ ժամ առաջ այս իշխանությունները պետք է հեռանան։ Նա ցավ հայտնեց, որ դեռևս կան քաղաքական գործիչներ, որոնք ասում են՝ պետք է սպասել և տեսնել՝ ինչ է լինելու։

«Ինչի՞ն  սպասենք. աշխարհում չտեսնված երևույթ է, որ պարտված ղեկավարը հանդգնում է ասել՝ դեռ անելիք ունի։ Ի՞նչ անելիք ունի, երբ այսօր բազում անհայտ կորածներ կան։ Եվ այսօր ասում են՝ տեսնենք ՌԴ-ն ու ԱՄՆ-ն ինչ պիտի անեն, գրող ու ցավ պիտի անեն, ի՞նչ անեն, եթե մեր վարչապետը որևէ բան չի անում։ Բարոյալքեցին մեր բանակը, և թող որևէ մեկը չասի, որ այս պատերազմում մենք պարտվել ենք, քանի որ թշնամին զորեղ էր։

Սա դավադրություն էր, որովհետև ես իմ սեփական աչքերով տեսել եմ Ջաբրայիլի տարածաշրջանում ինչ է եղել։ Թող որևէ մեկն ասի, որ հարձակման հրաման է եղել։ Ոչ մի ճակատում մենք չենք ունեցել հարձակման հրաման, եղել է նահանջ։ Ասել են նահանջեք, վերջը մենք դրանց կշրջափակենք, կջարդենք, կավիրենք։ Եվ ի՞նչ տեղի ունեցավ, խաբեությամբ, դավադրությամբ, Նիկոլ Փաշինյան դավաճանը պառակտեց ազգն ու կապիտուլյացիայի ենթարկեց Արցախը»,- նշեց ֆերմերը։

Եվ հիմա, ըստ Տիգրան Եղոյանի, Նիկոլ Փաշինյանը վեց ամիս է ուզում, որպեսզի Սյունիքը հանձնի.
«Բայց Սյունիքը տեսավ, որ պետություն չկա, որ չկա իշխանություն։ Դրա համար էլ տեղական իշխանություններն են կանգնել ու պահում իրենց հողը։ Ուրեմն գնացեք հող կերեք ու սատկեք։ Ես վստահ եմ՝ անառիկ է պահվելու Սյունիքը»։