Ձեր վստահելի աղբյուրը

Արցախյան պատերազմում անհետ կորած մի քանի տասնյակ անձանց հարազատներն մինչ այս պահը ձյան տակ են, սպասում են Պաշտպանության նախարարության շենքի մոտ։

Նրանք պնդում են՝ ուղեկցողի սխալի պատճառով 40 մարդ չկա։ Բոլորը մեկնել են Էջմածնի զորամասից, կոչվել է քիմիկների ջոկատ։

«Մեզ ասում են՝ ուղեկցողը չգիտենք որտեղ է։ Նա պետք է զինվորներին ուղեկցեր Ա կետից Բ կետ, որտեղ պետք է դիրքավորվեին, սակայն Բ կետում գյուղապետը չի դիմավորել նրանց, ուղեկցողը նրանց տարել է Ց կետ, որն արդեն գրավված է եղել հակառակորդի կողմից։ Թշնամին իրենց դիմավորել է։ Հիմա էլ այստեղ ականջները փակել են, խլացել են, նստել են իրենց աթոռների վրա»,- ասում են հարազատները։

Նրանց հասած տեղեկությունների համաձայն, ուղեկցողը մթության պատճառով մոլորվել է, չորս կմ հեռու է գնացել նախատեսված վայրից։

«Մեզ ասում են՝ չենք ճանաչում ուղեկցողին։ Բայց նման բան հնարավոր չէ, եթե զորք են վստահում, ո՞նց կարող են չճանաչել։ Բայց այստեղ խնդիրն այդ մարդն էլ չի։ Մի մարդու, որ կասի՝ տեղանքը ճանաչում է, չի կարելի զորք վստահել»,- նշում են հարազատները։

Անհետ կորածների հարազատներն ասացին՝ սպասում են ՊՆ-ում քննարկում անեն, իրենց պատասխան տան։

«Մեր հույսը միայն գերենալ Մուրադովն է, որ Արցախից գալու է, մասնակցի այս քննարկմանը։ Մենք հույս ունենք, որ նա այս հարցը կլուծի»,- ընդգծեց նրանցից մեկը։