Ձեր վստահելի աղբյուրը

ՀՀ ոստիկանության Արտաշատի բաժնում ոստիկանները ծեծել են և բռնություն գործադրել Արարատի մարզպետարանի դիմացից բերման ենթարկված  ՀՅԴ Նիկոլ Աղբալյան ուսանողական միության անդամ Գերասիմ Վարդանյանին: Yerkir.am-ին տեղեկացրել է  Գերասիմ Վարդանյանը, որն այժմ գտնվում է ոստիկանության Արտաշատի բաժնում:

«Բաժին բերման ենթարկելուց  հետո ոստիկաններով թափվեցին վրաս և սկսեցին հարվածել: Ես, իհարկե, հնարավորության սահմաններում թույլ չտվեցի, որ Նիկոլի ռեժիմին ծառայող այդ թափթփուկները հագուրդ տան իրենց մոլուցքին, այդուհանդերձ, փաստ է, որ գահավիժող ռեժիմն ամեն գնով ուզում է գոնե մի քանի ժամով երկարացնել իր կյանքը, որը թույլ չենք տալու»,- պատմել է նա:

Գերասիմ Վարդանյանը նաև նշել է, որ, չնայած իրեն հարվածող ոստիկանների տմարդի պահվածքին, այդուհանդերձ, հայտնվել են նաև իրենց արժանապատիվ պահող ոստիկաններ և հանդարտեցրել  իրավիճակը:

«Մարզպետ Գարիկն ու ինձ հարվածող ոստիկան կոչեցյալները պատասխան են տալու: Այս ամենը վերջանալուց հետո՝ թող դրանք մտածեն, թե ոնց են այս մարզում ապրելու, ոնց են ինձ նայելու և ինձ հանդիպելուց ուր են փախչելու»,- հավելել է Գ. Վարդանյանը:

 Արարատի մարզպետարանի դիմաց բողոքի ակցիայի մասնակիցների հետ վեճի էին բռնվել մի խումբ քաղաքացիներ։ «Մարզպետի խունտան է»,-տեղեկացրել էր ակցիայի մասնակիցներից մեկը։

Խոչընդոտողների մեջ  նրանք նկատել են նաև Արարատի մարզպետի օգնականին և ասել, որ նրանք սադրիչներ են։

Ակցիայի մասնակիցներն իրենց կողմնակիցներին կոչ են արել չտրվել Փաշինյանի կազմակերպած սադրանքներին։ Ոստիկանները սկսել են  բերման ենթարկել ակցիայի մասնակիցներին, որոնց թվում եղել նաև ՀՅԴ անդամ Գերասիմ Վարդանյանը։