Ձեր վստահելի աղբյուրը

«Մենք կստիպենք Փաշինյանին տեսնել իրականությունը: Կարծում եմ՝ ամեն օր սկսում է արդեն իրականությունը հասկանալ»,- ԱԺ դիմաց հանրահավաքի ժամանակ լրագրողներին ասաց «Մեկ հայաստան» կուսակցության նախագահ Արթուր Ղազինյանը:

Նա նշեց, որ կա բժշկական տերմին՝ մարդը ձևավորում է  իր իրականությունը, տեղավորվում է այդ իրականության մեջ, մերժում է  դրանից դուրս ամեն ինչ:

«Հիմա  մենք գործ ունենք այդ մարդու հետ, գործ ունենք հոգեպես անառողջ մի մարդու հետ, ով իր կյանքի երազանքին հասնելով՝ 2.5 տարի արել է գործողություններ, որոնք այսօր հանգեցրել են հայկական պետականության անկմանը:

Իր հեռանալն իր կամքով լինի, կամքից անկախ, կուզի, թե ոչ, իրականություն է դառնալու»,- ասաց Ա.Ղազինյանը:

Նա նշեց, որ այսօր կա Փաշինյանի հեռացման  համազգային կոնսենսուս, սփյուռքի բոլոր օջախները,  հայկական ծագմամբ բոլոր հայտնի գործարարները,  երկու կաթողիկոսները, համայնքների ղեկավարները, քաղաքական ուժերը, բացի իր խմբակից, միասին պահանջում են քաղաքական իշխանության հեռացում:

«Հավաստիացնում եմ՝ այսօր նա իշխանություն չունի Հայաստանում, պետք է ընդամենն իրեն հասկացնել, որ այլևս ավարտված մարդ ես, կործանված քաղաքական գործիչ, լուռ նստես ու սպասես քո դատաստանին, ընդ որում՝  քրեական գործով գործող օրենսդրության սահմաններում: Լրջագույն հանցագործ է, պատմական մասշտաբի հանցագործի հետ գործ ունենք»,- ասաց Ա. Ղազինյանը:

Անդրադառնալով ՀՀ երրորդ նախագահ Սերժ Սարգսյանի և Բելառուսի նախագահի օրերս սոցիալական ցանցերում տարածված ձայնագրությանը, Արթուր Ղազինյանն ասաց, որ դա իրենց համար նորություն չէր։

«Նրանք, ովքեր ծանոթ են Հայաստանի քաղաքական կյանքին և գիտեն՝ ինչ է կատարվել վերջին 20-25 տարվա ընթացքում, դա իրենց համար նորություն չէր։ Դա նորություն էր այն մարդկանց համար, որոնք ապրել են հորինված իրականության մեջ և իրենք փորձել են հավատալ ինչ-որ մի բանի, և այդ հավատը իրենց մոտ ձևավորել է համոզմունք, իսկ այդ համոզմունքը կեղծ իրականություն է, որի մեջ նրանք ապրել և  շարունակում են ապրել։ Իրենք շոկի ենթարկվեցին՝ լսելով, որ Հայաստանի երրորդ նախագահը Ալիևին ավելի մեծ գումար է առաջարկել, որպեսզի նա հրաժարվի այդ 7 տարածքներից։ Ասել, որ նախկինում եղել է որևէ քայլ դեպի նրան, որպեսզի հանձնվի Արցախի տարածքային ամբողջականությանը վերաբերվող որևէ հողի կտոր, դա առնվազն խելացնորություն է»,- ասաց Ա. Ղազինյանը։