Ձեր վստահելի աղբյուրը

«Լուսավոր Հայաստան»  խմբակցության պատգամավոր Արմեն Եղիազարյանը խորհրդարանում հարց ուղղեց ՀՀ վարչապետին. «Պարոն Փաշինյան, այս ընթացքում փաստացի ակնհայտ դարձավ, որ ձեր գլխավորած կառավարությունը տապալեց և ձախողեց երկրի կառավարումը բոլոր ոլորտներում, տապալեց երկրի տարածքային ամբողջականությունը և հիմա մեկը մեկի հետևից դուք նախարարներ ու մարզպետներ եք փոխում: Դրանով ինչի եք ուզում հասնել: Արդեն ակնհայտ է, որ ձեզ և ձեր կառավարությանը չի հաջողվել պրոֆեսիոնալների թիմ հավաքել և  երկիրը կառավարել: Արդյո՞ք մեկ անգամ ձախողվելը բավարար չէր ձեր համար, ի՞նչ եք կարծում»:

Նիկոլ Փաշինյան.«Պարոն Եղիազարյան, կարծում եմ, որ դուք իրավունք ունեք ունենալ Ձեր գնահատականը, բայց էլի ուզում եմ ձեր ուշադրությունը հրավիրել այն փաստին, որ մեր բոլորի ջանքերը պետք է գործադրված լինեն նրան, որ այդ գնահատականը տալու հնարավորությունը ունենա այն սուբյեկտը, որը վերջնական գնահատական տալու իրավունք ունի և խոսքը Հայաստանի ժողովրդի մասին է: Ես կարծում եմ, որ մենք կունենանք այդ առիթը և ժողովուրդը հնարավորություն կունենա գնահատել և՛ մեր, և՛ ձեր, և՛ մյուսների գործունեությունը: Իսկ այս պահին կարող եմ ասել, որ ՀՀ-ում կարծիք ասելու իրավունքի ազատությունը երաշխավորված է՝ առավել ևս՝ ԱԺ պատգամավորի և դուք կարող եք արտահայտել կարծիքը և տեսակետը»:

Արմեն Եղիազարյան. «Պարոն Փաշինյան, դուք փաստացի ապացուցեցիք, որ ի վիճակի չէիք և հիմա ել ի վիճակի չեք երկիրը կառավարելու: Դուք պետք է օր առաջ հեռանաք և հնարավորություն տաք փրկել այն, ինչ դեռևս մնացել է մեր երկրից և ուզում եմ հարցնել՝ ինչո՞ւ չեք ուզում հեռանալ, հեռացեք և վերջապես տվեք շանսը, որ ժողովուրդը որոշի, թե ով պետք է կառավարի երկիրը և այն հանի այս ծայրահեղ ծանր վիճակից»:

Նիկոլ Փաշինյան. «Գործնականում ձեր խմբակցության նախորդ պատգամավորների հարցերն այդ ծիրի մեջ էին և կարծում եմ, որ նույն հարցին տարբեր պատասխաններ չեմ կարող տալ և իմ պատասխանը նույնպես նույն ծիրի մեջ է, ինչը որ ասացի»: