Ձեր վստահելի աղբյուրը

ԱԺ «Լուսավոր Հայաստան» խմբակցության պատգամավոր Անի Սամսոնյանը դեկտեմբերի 8-ին ԱԺ հայտարարությունների ժամին հայտնել էր, որ հայ ռազմագերիների խնդրի հետ կապված փակ քննարկման ժամանակ «Իմ քայլը» խմբակցության անդամ Մարիա Կարապետյանը, ով ամենաշատն է շահագրգռված եղել, որպեսզի հարցը քննարկվի փակ ռեժիմով, ասել էր, թե Ադրբեջանում հայ ռազմագերիների հետ լավ են վարվում:

Այսօր ԱԺ-ում լրագրողների հետ զրույցում Մարիա Կարապետյանը հերքեց, որ ինքը նման բան է  հայտարարել:

«Այն հոլովակներից հետո, որ պտտվում են մեր գերիների մասով, երևակայությունից դուրս է, որ Ազգային ժողովի որևէ պատգամավոր ասեր՝ մեր գերիներին լավ են վերաբերվում: Այս վերագրումը չի կարող հիմք ունենալ»,- նշեց իշխանական պատգամավորը:

Նա նաև ասաց, որ փակ են անցկացրել նիստը, քանի որ զգայուն հարցեր էին քննարկվելու, հաճախ հարկավոր է հաշվի առնել հարազատների զգացմունքներն այս հարցի վերաբերյալ:

Լրագրողների հետ ճեպազրույցում Անի Սամոսնյանը կրկնեց իր՝ երեկ արած հայտարարությունը:

«Մարիա Կարապետյանն այն պատգամավորներից էր, ով մինչև վերջ պնդում էր, հատուկ ելույթ էլ ունեցավ, որ մենք քաղաքական դիվիդենտներ ենք շահում ռազմագերիների հարցի քննարկումից: Ըստ էության, մենք փակ նիստի ժամանակ հասկացանք, թե ինչու էր նա պնդում, որ այդ հանդիպումը փակ լինի, քանի որ նա այդ փակ նիստի ժամանակ մեզ հետ կռիվ էր անում, մասնավորապես, Էդմոն Մարուքյանի հետ, թե ինչու ենք բարձրաձայնել Ադրբեջանի զորահանդեսում նախատեսվող այն մտայնության մասին, որ մեր ռազմագերիներին կարող են ցույց տալ: 

Նա բերում էր մի փաստարկ, որ ինքը չի կարծում՝ Ադրբեջանը նման բան կանի, քանի որ չի խախտում միջազգային կոնվենցիաները: Ի պատասախան նրան՝ արդյոք դուք չեք տեսնում ինչպես են վերաբերվում մեր ռազմագերինեին, ի՞նչ վատ վերաբերմունք են ցույց տալիս,  տիկին Կարապետյանը որևէ արձագանք չի տվել, թեև հնարավարություն ուներ: Ըստ էության, նրա ասածն այն էր, որ մեր գերիներին Ադրբեջանում վատ չեն վերաբերվում, քանի որ մեր պատասխանը նրան ուղղված ենթադրում էր, որ նա միգուցե կասի՝ այո, վատ են վերաբերվում, բայց չասաց: Ըստ էության պաշտպանում էր Ադրբեջանի շահերը:

Մենք նրան հարցրել ենք՝ եթե կասկածում եք, որ վատ են վերաբերվում, գնացեք ու նայեք տեսանյութերը: Տիկին Կարապետյանը շարունակում էր մեզ հետ կռիվ անել»,- փակ հանդիպումից մանրամասներ փոխանցեց Ա. Սամսոնյանը:

Նա նշեց, որ 2.5 տարի պատգամավոր է այս խորհրդարանում, որևէ մեկին չի զրպարտել:

«Բայց այս վերաբերմունքը պատերազմին, մեր ռազմագերիներին, անպատասխանատու պահվածքը որպես ԱԺ պատգամավոր, երբ պետական կառույցների շատ սուբյեկտներ՝ ՄԻՊ ինստիտուտը, ՄԻԵԴ-ում ՀՀ ներկայացուցիչը, իրավապաշտպաններ օր ու գիշեր ջանք չեն խնայում, որպեսզի միջազգային հանրությանը հասցնեն այն միտքը, որ մեր ռազմագերիների հետ վատ են վարվում, այս ամբողջ պատկերի կողքին նրա անպատասխանատու հայտարարություններն ու մեր նկատմամբ հաճախ հնչող մեղադրանքները, թե ինչու ենք  բարձրաձայնում ռազմագերիների այդ հարցը, կարծում եմ, պարզապես խայտառակություն է ու ամոթ:

Չեք պատկերացում, թե մենք ինչ շոկի մեջ էինք այդ նիստի ընթացքում»,- ասաց «Լուսավոր Հայաստան» խմբակցության անդամը:

Նա նշեց, որ «Իմ քայլը» որևէ հարցի պատասխան չուներ, չէին հրավիրել իշխանության ներկայացուցչի, որպեսզի կարողանային այդ պատասխանները ստանալ:

«Այն փաստարկը, թե մենք կարող ենք խոսել այնպիսի բաների մասին, որ հանրությանը հասանելի չլինի, փուչիկ էր, պարզապես իշխանությունը չէր ուզում այս հարցը քննարկել և վերջ»,- ընգծեց Ա. Սամսոնյանը:

Հարցին՝ կարո՞ղ է բառացի մեջբերել Մարիա Կարապետյանի խոսքը, նա ասաց, որ  ամբողջությամբ չի կարող, քանի որ հանդիպումը փակ է եղել, չի կարող բառ առ բառ ասել:

«Բայց ասեմ, թե ինչից է սկսվել: Մարիա Կարապետյանը մեզ հետ կռիվ էր անում, թե ինչու ենք մենք բարձրաձայնել այն հարցը, որ ռազմագերիներին կարող են ցուցադրել Ադրբեջանում: Մարիա Կարապետյանի կողմից է հարց հնչել, թե դուք ինչո՞ւ եք այդ հարցը բարձրացրել: Գնացեք  Մարիա Կարապետյանից հարցրեք, թե ինչո՞ւ էին դեմ, որպեսզի «Լուսավոր Հայաստան»-ը խոսի ռազմագերիների՝ այդ զորահանդեսում ցուցադրելու հնարավորություն մասին, և ինչո՞ւ է «Լուսավոր Հայաստանը» դիմել միջազգային կառույցներին, որպեսզի նման բան տեղի չունենա»,- ասաց պատգամավորը:

Ա. Սամսոնյանի խոսքով, իրենք այս պահին չունեն կոնկրետ թիվ, թե հայկական կողմը քանի գերի ունի: Ըստ նրա, «Իմ քայլն» էլ չունի, երեկվա հանդիպմանը որևէ թիվ չի նշվել: Պատգամավորի կարծիքով, ճշգրիտ չէ շրջանառվող թիվը՝ 150 գերի: