Ձեր վստահելի աղբյուրը

«Մենք կարիք ունենք, նոր բյուջեի, քանի որ 2021 թվականի բյուջեն իներցիոն է, չի համապատասխանում այն մարտահրավեներին, որոնք ունենք և մենք դեմ ենք քվեարակելու դրան»,-խմբակցության անունից ունեցած ելույթում բյուջեի նախագծի քննարկման ժամանակ հայտնեց «Լուսավոր Հայաստան»  խմբակցության պատգամավոր Արկադի Խաչատրյանը:

Նկատելով, որ կորոնավիրուսի համաճարակի և պատերազմի հետևանքով այս տարի սպասվում է շուրջ 8 տոկոս տնտեսական անկում՝ պատգամավորը նկատեց, որ դրան գումարվել է նաև խրոնիկ դարձած կապիտալ ծախսերի կատարման անկարողությունը, որը բերել է  տնտեսական աճի պոտենցիալի կտրուկ նվազման:

Նրա խոսքով, 2021 թվականի բյուջեի նախագիծը, որը մշակվել էր մինչև պատերազմի մեկնարկը, նույնիսկ մակրոտնտեսական ցուցանիշների վերանայման պայմաններում, չի համապատասխանում ներկայիս մարտահրավերներին:

«Առանց ներդրումների և կապիտալ ծախսերի կատարման անկարողության պայմաններում, մենք չենք կարող խոսել արդյունաբերության և տնտեսության արդիականացման մասին»,- նկատեց Արկադի Խաչատրյանը:

Պատգամավորի խոսքով, տնտեսական սպասումները և անորոշությունները հիմք են տալիս ենթադրելու, որ եթե շատ արագ չկարգավորվի միջավայրը, այն կարող է արտագաղթի բերել:

«Արտագաղթը և դեմոգրաֆիկ կազմի փոփոխությունը չի կարող չհանգեցնել մարդկային կապիտալի նվազեցմանը, իսկ մարդկային կապիտալը տնտեսական զարգացման շարժիչ ուժն է»,- հայտարարեց Խաչատրյանը և նկատեց, որ առանց մարդկային կապիտալի և ներդրումների աճի, հնարավոր չէ խոսել տնտեսության զարգացման և  վերագնգնման մասին:

Պատգամավորի խոսքով, երկրի քաղաքական անկայության և անորոշությունների շուտափույթ կարգավորման դեպքում կարելի է կարգավորել մարդկանց վարքագիծը և վերականգնել տնտեսական ակտիվությունը:

«Եթե հանկարծ խաթարվի նաև ֆինանսական կայունությունը և խարխլվի մակրոկայությունը, որը միակն է, որը մենք այսօր ունենք, կկուտակվեն ռիսկեր նաև տնտեսական աղետի ուղղությամբ, որը որևէ պարագայում թույլատրել չի կարելի»,- շեշտեց «Լուսավոր Հայաստան» խմբակցության պատամավորը:


Նա նկատեց, որ կապիտալ ծախսերի կատարողականի ավելացումը, յալ ծախսերի արդյունավետության բարձրացումն անհրաժեշտ միջոցառումներ են առաջընթացի համար:

Արկադի Խաչատրյանը հայտարարեց, որ գոտիները պետք է շատ խիստ ձգել և ծախսերը բացարձակ  անհրաժեշտ ուղղություններով անել:

Նկատելով, որ երկրին անհրաժեշտ է ռազմական, տնտեսական և սոցիալական բաղադրիչներով նոր ռազմավարություն՝ պատգամավորը եզրակացրեց. «Լուծումն անցումնային տեխնոկրատ կառավարության ձևավորումն է, որն ի զորու կլինի կարգավորել և վերականգնել քաղաքական կայունությունը, հանրային համերաշխությունը, կկարողանա մոբիլիզացնել բոլոր մարդկային ռեսուրսները՝ առանց սևի ու սպիտակի»:

Նրա համոզմամբ, նոր ռազմավարությունը պետք է կառուցվի բանակի մարտունակության բարձրացման վրա, զինվորը պետք է լինի ավելի հմուտ, կրթված և տեխնոլոգիապես հագեցած, որպեսզի մարտունակությունը լինի բարձր, քան թշնամիների մոտ է:

«Ես կարծում եմ, որ սահմանների խնդրի լուծումը պետք է լինի պայամագրային զինծառայողների թվաքանակի ավելացումը: Օրինակ, եթե 4500 պայմանագրային զենծառայող կարողանանք ներգրավել ամսական 350 հազար դրամ աշխատավարձով՝ տարեկան կպահանջվի շուրջ 19 մլրդ դրամ, գրեթե նույնքան, որքան այս բյուջեով նախատեսված է, որպես պարգևատրման ֆոնդ»,- նկատեց Խաչատրյանը

Կապիտալ ծախսեր կատարելիս, ըստ պատգամավորի, պետք է ուշադրություն դարձնել ռազմական ենթակառուցվածքների, սահմանների ամրապնդման, ինժեներական կառույցների վրա:

Անդրադառնալով պետական պարտքի կայունացման հարցին՝ Արկադի Խաչատրյանը շեշտեց.  «Մյուս տարվա կտրվածքով մենք հաստատուն քայլերով գնում ենք դեպի 70 տոկոս, որը չափազանց բարձր պետական պարտք է, իսկ դոլարի կուրսի փոփոխությունը բերելու է նաև ընթացիկ ծախսերի ավելացման>>:

Արկադի Խաչատրյանը հայտնեց, որ կցանկանար դահլիճում տեսնել էկոնոմիկայի նորանշանակ նախարարին, որը հայտարարել էր, որ հաջորդ տարի ապահովելու է տնտեսության երկնիշ աճի, այն դեպքում, երբ բյուջեով 3.2 տոկոս է նշված և հարց ուղղեց Ատոմ Ջանջուղազյանին, թե արդյո՞ք Էկոնոմիկայի նախարարը ծանոթացել է բյուջեի նախագծին: