Ձեր վստահելի աղբյուրը

«Մի մտահոգիչ կետ կա այստեղ, որ մենք այս ամենը կիրառելու արդյունքում կուսակցություններ ենք փակելու, որովհետև կան կուսակցություններ, որոնք ունեն անուն, պատմական գործունեություն են ծավալել  այաստանի Հանրապետությունում և այսօր այդպես չեն գործում»,- «Կուսակցությունների մասին» սահմանադրական օրենքում փոփոխություններ և լրացումներ կատարելու մասին օրենքի նախագծի քննարկման ժամանակ հայտնեց «Լուսավոր Հայաստան» խմբակցության պատգամավոր Գևորգ Գորգիսյանը:

Նա հռետորական հարցադրում արեց, թե արդյոք ճիշտ է այդ կուսակցությունների փակումը և առաջարկեց նախագծի նոր դրույթները կիրառել ընտրություններին մասնակցած կուսակցությունների, կամ ֆինանսական շրջանառությունը ինչ-որ սահմանից ավելի իրականացնողների կամ պետական ֆինանսավորում ստացածների նկատմամբ:

«Ճի՞շտ է արդյոք փակել կուսակցությունները, որոնք այլևս գործունեություն չեն ծավալում, բայց ունեն գաղափարական հենք և, միգուցե, ինչ-որ պահի կվերադառնան»,-հարցրեց պատգամավորը:

Գևորգ Գորգիսյանը նկատեց, որ «Կուսակցությունների մասին» սահմանադրական օրենքում փոփոխություններ և լրացումներ կատարելու մասին նախագծի քննարկմանը մասնակցել են շատ քիչ կուսակցություններ, իսկ «Իմ քայլը» խմբակցությունից մասնակցել են ոչ կուսակցականներ, որոնք չեն առնչվել կուսակցություններ ստեղծելու գործընթացին:

Նա առաջարկեց առաջինից երկրորդ ընթերցման ժամանակահատվածում քննարկումներ իրականացնել արտախորհրդարանական կուսակցությունների հետ:

«Լուսավոր Հայաստան» խմբակցության պատգամավորն, անդրադառնալով օրենքի նախագծի այն դրույթին, որով կուսակցությունների ֆինանսական վերահսկողության լիազորությունը տրվում է Կոռուպցիայի կանխարգելման հանձնաժողովին, հայտնեց, որ վերջինիս վրա դրվում է նոր պարտավորություններ, բայց լիազորությունները չի ավելացվում: