Ձեր վստահելի աղբյուրը

«Այսօր վարչապետը հարցուպատասխանի է գնալու Ազգային ժողով: Մենք գտնում ենք, որ ԱԺ-ն հարցուպատասխանի ժամանակ չունի, պետք է մի օրակարգով նիստ անի՝ քննարկի Նիկոլ Փաշինյանի պաշտոնանկության հարցը, իսկ Նիկոլ Փաշինյանը ԱԺ-ում հերթական սուտ խոսելու առիթ պետք է չունենա, ինքը ընդամենը մեկ բան պետք է անի՝ ներկայացնի հրաժարականի տեքստը»,- ասաց «Հայրենիքի փրկության շարժման» համակարգող, ՀՅԴ Հայաստանի ԳՄ ներկայացուցիչ Իշխան Սաղաթելյանը դեպի ԱԺ երթի ժամանակ, որտեղ էլ պետք է անցկացնեն Փաշինյանի հրաժարականի պահանջով հանրահավաք։

Նա նշեց, որ հենց այս պահանջով են գնում իրենց բողոքն արտահայտելու։ Ի. Սաղաթելյանն ասաց, որ իրենց բողոքի ակցիաները խաղաղ են, իրենց պահանջը պետք է տեղ հասցնեն ու իրականություն դարձնեն:

««Նիկոլ, հեռացիրը» դա միայն կոչ չէ, դա հայ ժողովրդի պահանջն է, Փաշինյանի հեռացումով հնարավորություն կունենան փրկել մեր հայրենիքը»,- ասաց նա:

Ըստ նրա, օր օրի շարժումը թափ է հավաքում. «Ես չեմ պատկերացնում, որ հայ մարդը կկարողանա հանդուժել այն ղեկավարությանը, որի գործունեության արդյունքում կորցրինք մեր հայրենիք Արցախի 70 տոկոսը, ունենք 5 հազար զոհ և չեմ կարծում, որ հայ մարդու արժանապատվությունը թույլ տա, որ Նիկոլը շարունակի մնալ այդ պաշտոնին և մսխել մեր պետականության վերջին փշուրները»:

Նա նշեց, որ ՀՀ նոր իշխանություններին որոշելու է ժողովուրդը իր քվեարկության միջոցով։

«Մենք նոր կառավարության կազմավորման համար  որևէ անձի թեկնածություն, կուսակցական քվոտաներ չենք քննարկել, քանի որ խնդիրը դա չէ, քանի որ այս պահին մեր գլխավոր խնդիրն է հեռացնել Նիկոլին, ձևավորել կառավարություն, որը կարող է այս իրավիճակից դուրս  բերել երկիրը: Կառավարության  մաս են կազմելու հասարակության կողմից ընդունելի, իրենց ոլորտներում հաջողություն գրանցած պրոֆեսիոնալ մարդիկ»,- ասաց Ի. Սաղաթելյանը:

Նա նշեց, որ «Լուսավոր Հայաստան»  կուսակցության հետ քննարկումները շարունակվում են, երեկ երեկոյան էլ հանդիպում է կայացել: Ի. Սաղաթելյանն ասաց, որ դեռ չեն մեկնաբանում  հանդիպման արդյունքները, խոսակցությունները շարունակվոմ են, կարծում է՝ արդյունք կունենան: